શતપથબ્રાહ્મણમ્ · અધ્યાય 9.2.2

પ્રત્યેત્યાગ્નિં પ્રહરિષ્યન્ । આહુતીશ્ચ જુહોતિ સમિધશ્ચાદધાત્યેતદ્વા એનં દેવા એષ્યન્તં પુરસ્તાદન્નેનાપ્રીણન્નાહુતિભિશ્ચ સમિદ્ભિશ્ચ તથૈવૈનમયમેતદેષ્યન્તં પુરસ્તાદન્નેન પ્રીણાત્યાહુતિભિશ્ચ સમિદ્ભિશ્ચ સ વૈ પઞ્ચગૃહીતં ગૃહ્ણીતે તસ્યોક્તો બન્ધુઃ -

અથ ષોડશગૃહીતં ગૃહ્ણીતે । ષોડશકલઃ પ્રજાપતિઃ પ્રજાપતિરગ્નિરાત્મસમ્મિતેનૈવૈનમેતદન્નેન પ્રીણાતિ યદુ વા આત્મસમ્મિતમન્નં તદવતિ તન્ન હિનસ્તિ યદ્ભૂયો હિનસ્તિ તદ્યત્કનીયો ન તદવતિ સમાન્યાં સ્રુચિ ગૃહ્ણીતે સમાનો હિ સ યમેતત્પ્રીણાતિ વૈશ્વકર્મણાભ્યાં જુહોતિ વિશ્વકર્માઽયમગ્નિસ્તમેવૈતત્પ્રીણાતિ તિસ્ર આહુતીર્જુહોતિ ત્રિવૃદગ્નિર્યાવાનગ્નિર્યાવત્યસ્ય માત્રા તાવતૈવૈનમેતદન્નેન પ્રીણાતિ -

અથ સમિધ આદધાતિ । યથા તર્પયિત્વા પરિવેવિષ્યાત્તાદૃક્તદૌદુમ્બર્યો ભવન્ત્યૂર્ગ્વૈ રસ ઉદુમ્બર ઊર્જૈવૈનમેતદ્રસેન પ્રીણાત્યાર્દ્રા ભવન્ત્યેતદ્વૈ વનસ્પતીનામનાર્તં જીવં યદાર્દ્રં તદ્યદેવ વનસ્પતીનામનાર્તં જીવં તેનૈનમેતત્પ્રીણાતિ ઘૃતે ન્યુત્તા ભવન્ત્યાગ્નેયં વૈ ઘૃતં
સ્વેનૈવૈનમેતદ્ભાગેન સ્વેન રસેન પ્રીણાતિ સર્વાં રાત્રિં વસન્તિ તત્ર હિ તા રસેન સમ્પદ્યન્તે તિસ્રઃ સમિધ આદધાતિ ત્રિવૃદગ્નિર્યાવાનગ્નિર્યાવત્યસ્ય માત્રા તાવતૈવૈનમેતદન્નેન પ્રીણાતિ -

યદ્વેવૈતા આહુતીર્જુહોતિ । એતદ્વા એનં દેવા એષ્યન્તં પુરસ્તાદન્નેન સમસ્કુર્વન્નેતાભિરાહુતિભિસ્તથૈવૈનમયમેતદેષ્યન્તં પુરસ્તાદન્નેન સંસ્કરોત્યેતાભિરાહુતિભિઃ -

સ વૈ પઞ્ચગૃહીતં ગૃહ્ણીતે । પઞ્ચધાવિહિતો વા અયં શીર્ષન્પ્રાણો મનો વાક્પ્રાણશ્ચક્ષુઃ શ્રોત્રમેતમેવાસ્મિન્નેતત્પઞ્ચધાવિહિતં શીર્ષન્પ્રાણં દધાત્યગ્નિસ્તિગ્મેન શોચિષેતિ તિગ્મવત્યા શિર એવાસ્યૈતયા સંશ્યતિ તિગ્મતાયૈ -

અથ ષોડશગૃહીતં ગૃહ્ણીતે । અષ્ટૌ પ્રાણા અષ્ટાવઙ્ગાન્યેતામભિસમ્પદં સમાન્યાં સ્રુચિ ગૃહ્ણીતે સમાને હ્યેવાત્મન્નઙ્ગાનિ ચ પ્રાણાશ્ચ ભવન્તિ નાના જુહોત્યઙ્ગેભ્યશ્ચ તત્પ્રાણેભ્યશ્ચ વિધૃતિં કરોતિ વૈશ્વકર્મણાભ્યાં જુહોતિ વિશ્વકર્માઽયમગ્નિસ્તમેવૈતત્સંસ્કરોતિ તિસ્ર આહુતીર્જુહોતિ ત્રિવૃદગ્નિર્યાવાનગ્નિર્યાવત્યસ્ય માત્રા તાવતૈવૈનમેતદન્નેન સંસ્કરોતિ સપ્તદશભિરૃગ્ભિઃ સપ્તદશઃ પ્રજાપતિઃ પ્રજાપતિરગ્નિર્યાવાનાગ્નિર્યાવત્યસ્ય માત્રા તાવતૈવૈનમેતત્સંસ્કરોત્યેકવિંશતિગૃહીતેન દ્વાદશ માસાઃ પઞ્ચઽર્તવસ્ત્રય ઇમે લોકા અસાવાદિત્ય એકવિંશ એતામભિસમ્પદમ્ -

યદ્વેવૈતાઃ સમિધ આદધાતિ । એતદ્વા એનં દેવાઃ સર્વં કૃત્સ્નં સંસ્કૃત્યાથૈનમેતેનાન્નેનાપ્રીણન્નેતાભિઃ સમિદ્ભિસ્તથૈવૈનમયમેતત્સર્વં કૃત્સ્નં સંસ્કૃત્યાથૈનમેતેનાન્નેન પ્રીણાત્યેતાભિઃ સમિદ્ભિરૌદુમ્બર્યો ભવન્ત્યાર્દ્રા ઘૃતે ન્યુત્તાઃ સર્વાં રાત્રિં વસન્તિ તસ્યોક્તો બન્ધુરુદેનમુત્તરાં નયેન્દ્રેમં પ્રતરાં નય યસ્ય કુર્મો ગૃહે હવિરિતિ યથા યજુસ્તથા બન્ધુસ્તિસ્રઃ સમિધ આદધાતિ ત્રિવૃદગ્નિર્યાવાનગ્નિર્યાવત્યસ્ય માત્રા તાવતૈવૈનમેતદન્નેન પ્રીણાતિ તિસ્ર આહુતીર્જુહોતિ તત્ષટ્ તસ્યોક્તો બન્ધુઃ -