શતપથબ્રાહ્મણમ્ · અધ્યાય 6.2.3

એતદ્વૈ દેવા અબ્રુવન્ । ચેતયધ્વમિતિ ચિતિમિચ્છતેતિ વાવ તદબ્રુવંસ્તેષાં ચેતયમાનાનાં પ્રજાપતિરિમાં પ્રથમાં સ્વયમાતૃણ્ણાં ચિતિમપશ્યત્તસ્માત્તાં પ્રજાપતિનોપદધાતિ -

તમગ્નિરબ્રવીત્ । ઉપાહમાયાનીતિ કેનેતિ પશુભિરિતિ તથેતિ પશ્વિષ્ટકયા હ તદુવાચૈષા વાવ પશ્વિષ્ટકા યદ્દૂર્વેષ્ટકા તસ્માત્પ્રથમાયૈ સ્વયમાતૃણ્ણાયા અનન્તર્હિતા દૂર્વેષ્ટકોપધીયતે તસ્માદસ્યા અનન્તર્હિતા ઓષધયોઽનન્તર્હિતાઃ પશવોઽનન્તર્હિતોઽગ્નિરનન્તર્હિતો હ્યેષ એતયોપૈત્ -

તેઽબ્રુવન્ । ચેતયધ્વમેવેતિ ચિતિમિચ્છતેતિ વાવ તદબ્રુવન્નિત ઊર્ધ્વમિચ્છતેતિ તેષાં ચેતયમાનાનામિન્દ્રાગ્ની ચ વિશ્વકર્મા ચાન્તરિક્ષં દ્વિતીયાં સ્વયમાતૃણ્ણાં ચિતિમપશ્યંસ્તસ્માત્તામિન્દ્રાગ્નિભ્યાં ચ વિશ્વકર્મણા ચોપદધાતિ -

તાન્વાયુરબ્રવીત્ । ઉપાહમાયાનીતિ કેનેતિ દિગ્ભિરિતિ તથેતિ દિશ્યાભિર્હ તદુવાચ તસ્માદ્દ્વિતીયાયૈ સ્વયમાતૃણ્ણાયા અનન્તર્હિતા દિશ્યા ઉપધીયન્તે તસ્માદન્તરિક્ષાદનન્તર્હિતા દિશોઽનન્તર્હિતો વાયુરનન્તર્હિતો હ્યેષ એતાભિરુપૈત્ -

તેઽબ્રુવન્ । ચેતયધ્વમેવેતિ ચિતિમિચ્છતેતિ વાવ તદબ્રુવન્નિત ઊર્ધ્વમિચ્છતેતિ તેષાં ચેતયમાનાનાં પરમેષ્ઠી દિવં તૃતીયં સ્વયમાતૃણ્ણાં ચિતિમપશ્યત્તસ્માત્તાં પરમેષ્ઠિનોપદધાતિ -

તમસાવાદિત્યોઽબ્રવીત્ । ઉપાહમાયાનીતિ કેનેતિ લોકમ્પૃણયેતિ તથેત્યેષ વાવ લોકમ્પૃણાત્મના હૈવ તદુવાચ તસ્માત્તૃતીયા સ્વયમાતૃણ્ણાનન્તર્હિતા લોકમ્પૃણાયા ઉપધીયતે તસ્માદસાવાદિત્યોઽનન્તર્હિતો દિવોઽનન્તર્હિતો હ્યેષ એતયોપૈત્ -

તદેતા વાવ ષડ્દેવતાઃ । ઇદં સર્વમભવન્યદિદં કિં ચ તે દેવાશ્ચઽર્ષયશ્ચાબ્રુવન્નિમા વાવ ષડ્દેવતા ઇદં સર્વમભૂવન્નુપ તજ્જાનીત યથા વયમિહાપ્યસામેતિ તેઽબ્રુવંશ્ચેતયધ્વમિતિ ચિતિમિચ્છતેતિ વાવ તદબ્રુવંસ્તદિચ્છત યથા વયમિહાપ્યસામેતિ તેષાં ચેતયમાનાનાં દેવા દ્વિતીયાં ચિતિમપશ્યન્નૃષયશ્ચતુર્થીમ્ -

તેઽબ્રુવન્ । ઉપ વયમાયામેતિ કેનેતિ યદેષુ લોકેષૂપેતિ તથેતિ તદ્યદૂર્ધ્વં પૃથિવ્યા અર્વાચીનમન્તરિક્ષાત્તેન દેવા ઉપાયંસ્તદેષા દ્વિતીયા ચિતિરથ યદૂર્ધ્વમન્તરિક્ષાદર્વાચીનં દિવસ્તેનઽર્ષય ઉપાયંસ્તદેષા ચતુર્થી ચિતિઃ -

તે યદબ્રુવન્ । ચેતયધ્વમિતિ ચિતિમિચ્છતેતિ વાવ તદબ્રુવન્યચ્ચેતયમાના અપશ્યંસ્તસ્માચ્ચિતયઃ -

પ્રજાપતિઃ પ્રથમાં ચિતિમપશ્યત્ । પ્રજાપતિરેવ તસ્યા આર્ષેયં દેવા દ્વિતીયાં ચિતિમપશ્યન્દેવા એવ તસ્યા આર્ષેયમિન્દ્રાગ્ની ચ વિશ્વકર્મા ચ તૃતીયાં ચિતિમપશ્યંસ્ત એવ તસ્યા આર્ષેયમૃષયશ્ચતુર્થીં ચિતિમપશ્યન્નૃષય એવ તસ્યા આર્ષેયં પરમેષ્ઠી પઞ્ચમીં ચિતિમપશ્યત્પરમેષ્ઠ્યેવ તસ્યા આર્ષેયં સ યો હૈતદેવં ચિતીનામાર્ષેયં વેદાર્ષેયવત્યો હાસ્ય બન્ધુમત્યશ્ચિતયો ભવન્તિ -