શતપથબ્રાહ્મણમ્ · અધ્યાય 5.5.3

૫.૫.૩ કેશવપનીયોઽતિરાત્રઃ
અભિષેચનીયેનેષ્ટ્વા । કેશાન્ન વપતે તદ્યત્કેશાન્ન વપતે વીર્યં વા એતદપાં રસઃ સમ્ભૃતો ભવતિ યેનૈનમેતદભિષિઞ્ચતિ તસ્યાભિષિક્તસ્ય કેશાન્પ્રથમાન્પ્રાપ્નોતિ સ યત્કેશાન્વપેતૈતાં શ્રિયં જિહ્માં વિનાશયેદ્વ્યુદુહ્યાત્તસ્માત્કેશાન્ન વપતે -

સંવત્સરં ન વપતે । સંવત્સરસમ્મિતા વૈ વ્રતચર્યા તસ્માત્સંવત્સરં ન વપતે સ એષ વ્રતવિસર્જનીયોપયોગો નામ સ્તોમો ભવતિ કેશવપનીયઃ -

તસ્યૈકવિંશં પ્રાતઃસવનમ્ । સપ્તદશં માધ્યન્દિનં સવનં પઞ્ચદશં તૃતીયસવનં સહોક્થૈઃ સહ ષોડશિના સહ રાત્ર્યા -

ત્રિવૃદ્રાથન્તરઃ સંધિર્ભવતિ । એષ એવૈકવિંશો ય એષ તપતિ સ એતસ્માદેકવિંશાદપયુઙ્ક્તે સ સપ્તદશમભિપ્રત્યવૈતિ સપ્તદશાત્પઞ્ચદશં પઞ્ચદશાદસ્યામેવ ત્રિવૃતિ પ્રતિષ્ઠાયાં પ્રતિતિષ્ઠતિ -

તસ્ય રથન્તરં પૃષ્ઠં ભવતિ । ઇયં વૈ રથન્તરમસ્યામેવૈતત્પ્રતિષ્ઠાયાં પ્રતિતિષ્ઠત્યતિરાત્રો ભવતિ પ્રતિષ્ઠા વા અતિરાત્રસ્તસ્માદતિરાત્રો ભવતિ -

સ વૈ ન્યેવ વર્તયતે કેશાન્ન વપતે વીર્યં વા એતદપાં રસઃ સમ્ભૃતો ભવતિ યેનૈનમેતદભિષિઞ્ચતિ તસ્યાભિષિક્તસ્ય કેશાન્પ્રથમાન્પ્રાપ્નોતિ સ યત્કેશાન્વપેતૈતાં શ્રિયં જિહ્માં વિનાશયેદ્વ્યુહ્યાદથ યન્નિવર્તયતે તદાત્મન્યેવૈતાં શ્રિયં નિયુનક્તિ તસ્માન્ન્યેવ વર્તયતે કેશાન્ન વપતે તસ્યૈષૈવ વ્રતચર્યા ભવતિ યાવજ્જીવં નાસ્યાં પ્રતિતિષ્ઠતિ -

આસન્દ્યા ઉપાનહા ઉપમુઞ્ચતે । ઉપાનડ્ભ્યામધિ યદસ્ય યાનં ભવતિ રથો વા કિંચિદ્વા સર્વં વા એષ ઇદમુપર્યુપરિ ભવત્યર્વાગેવાસ્માદિદં સર્વં ભવતિ યો રાજસૂયેન યજતે તસ્માદસ્યૈષૈવ વ્રતચર્યા ભવતિ યાવજ્જીવં નાસ્યાં પ્રતિતિષ્ઠતિ -