શતપથબ્રાહ્મણમ્ · અધ્યાય 5.5.2

૫.૫.૨ દ્વાદશ પ્રયુજાં હવીંષિ
સ વૈ પ્રયુજાં હવિર્ભિર્યજતે । તદ્યત્પ્રયુજાં હવિર્ભિર્યજત ઋતૂન્વા એતત્સુષુવાણો યુઙ્ક્તે ત એનમૃતવો યુક્તા વહન્ત્યૃતૂન્વા પ્રયુક્તાનનુચરતિ તસ્માત્પ્રયુજાં હવિર્ભિર્યજતે -

તાનિ વૈ દ્વાદશ ભવન્તિ । દ્વાદશ વૈ માસાઃ સંવત્સરસ્ય તસ્માદ્દ્વાદશ ભવન્તિ માસિમાસિ યજેતેત્યાહુઃ કો વેદ મનુષ્યસ્ય તસ્માન્ન માસિમાસિ યજેત શમ્યાપરાવ્યાધે શમ્યાપરાવ્યાધ એવ ષડ્ભિર્યજતે પ્રાઙ્યાનથ પુનરાવૃત્તઃ શમ્યાપરાવ્યાધે શમ્યાપરાવ્યાધ એવ ષડ્ભિર્યજતે -

તદુ તથા ન કુર્યાત્ । ષડેવૈતાનિ પૂર્વાણિ હવીંષિ નિર્વપતિ સમાનબર્હીંષિ તાસાં દેવતાનાં રૂપં યથા શિશિરે યુક્ત્વા પ્રાઞ્ચ આપ્રાવૃષં યાયુસ્તત્ષડૃતૂન્યુઙ્ક્તે ત એનં ષડૃતવો યુક્તાઃ પ્રાઞ્ચ આપ્રાવૃષં વહન્તિ ષડ્વઽર્તૂન્પ્રયુક્તાનાપ્રાવૃષમનુચરતિ પૂર્વાગ્નિવાહાં દ્વૌ દક્ષિણા -

ષડેવોત્તરાણિ હવીંષિ નિર્વપતિ । સમાનબર્હીંષિ તાસાં દેવતાનાં રૂપં યથા પુનરાવર્તેરન્વાર્ષિકમભિ તત્ષડૃતૂન્યુઙ્ક્તે ત એનં ષડૃતવો યુક્તા વાર્ષિકમભિ વહન્તિ ષડ્વર્તૂન્પ્રયુક્તાન્વાર્ષિકમનુચરતિ પૂર્વાગ્નિવાહાં દ્વૌ દક્ષિણા તદ્યત્પૂર્વાગ્નિવાહો દક્ષિણઽર્તૂન્વા એતત્સુષવાણો યુઙ્ક્તે વહન્તિ વા અનડ્વાહસ્તસ્માત્પૂર્વાગ્નિવાહો દક્ષિણા -

તદ્ધ સ્મૈતત્પુરા કુરુપઞ્ચાલા આહુઃ । ઋતવો વા અસ્માન્યુક્તા વહન્ત્યૃતૂન્વા પ્રયુક્તાનનુચરામ ઇતિ યદેષાં રાજાનો રાજસૂયયાજિન આસુસ્તદ્ધ સ્મ તદભ્યાહુઃ -

આગ્નેયોઽષ્ટાકપાલઃ પુરોડાશો ભવતિ । સૌમ્યશ્ચરુઃ સાવિત્રો દ્વાદશકપાલો વાઽષ્ટાકપાલો વા પુરોડાશો બાર્હસ્પત્યશ્ચરુસ્ત્વાષ્ટ્રો દશકપાલઃ પુરોડાશો વૈશ્વાનરો દ્વાદશકપાલ એતાનિ ષટ્પૂર્વાણિ હવીંષિ ભવન્તિ -

ષડેવોત્તરે ચરવઃ । સારસ્વતશ્ચરુઃ પૌષ્ણશ્ચરુર્મૈત્રશ્ચરુઃ ક્ષૈત્રપત્યશ્ચરુર્વારુણશ્ચરુરાદિત્યશ્ચરુરેત ઉ ષડુત્તરે ચરવઃ -

અથ પશુદ્વયમ્
અથ શ્યેનીં વિચિત્રગર્ભામદિત્યા આલભતે । તસ્યા એષૈવાવૃદ્યાઽષ્ટાપદ્યૈ વશાયા ઇયં વા અદિતિરસ્યા એવૈનમેતદ્ગર્ભં કરોતિ તસ્યા એતાદૃશ્યેવ શ્યેની વિચિત્રગર્ભા દક્ષિણા -

અથ પૃષતીં વિચિત્રગર્ભાં મરુદ્ભ્ય આલભતે । તસ્યા એષૈવાવૃદ્વિશો વૈ મરુતો વિશામેવૈનમેતદ્ગર્ભં કરોતિ તસ્યા એતાદૃશ્યેવ પૃષતી વિચિત્રગર્ભા દક્ષિણા -

એતૌ પશુબન્ધૌ । તદેતાવેવ સન્તાવન્યથેવાલભન્તે યામદિત્યા આલભન્ત આદિત્યેભ્યસ્તામાલભન્તે સર્વં વા આદિત્યાઃ સર્વસ્યૈવૈનમેતદ્ગર્ભં કરોતિ યામ્મરુદ્ભ્ય આલભન્તે વિશ્વેભ્યસ્તાં દેવેભ્ય આલભન્તે સર્વં વૈ વિશ્વે દેવાઃ સર્વસ્યૈવૈનમેતદ્ગર્ભં કરોતિ -