શતપથબ્રાહ્મણમ્ · અધ્યાય 5.3.2

૫.૩.૨ અથોપરિયાગાઃ
ઉપરિષ્ટાદ્રત્નાનાં સૌમારૌદ્રેણ યજતે । સ શ્વેતાયૈ શ્વેતવત્સાયૈ પયસિ શૃતો ભવતિ તદ્યદુપરિષ્ટાદ્રત્નાનાં સૌમારૌદ્રેણ યજતે -

સ્વર્ભાનુર્હ વા આસુરઃ । સૂર્યં તમસા વિવ્યાધ સ તમસા વિદ્ધો ન વ્યરોચત તસ્ય સોમારુદ્રાવેવૈતત્તમોઽપાહતાં સ એષોઽપહતપાપ્મા તપતિ તથો એવૈષ એતત્તમઃ પ્રવિશત્યેતં વા તમઃ પ્રવિશતિ યદયજ્ઞિયાન્યજ્ઞેન પ્રસજત્યયજ્ઞિયાન્વા એતદ્યજ્ઞેન પ્રસજતિ શૂદ્રાંસ્ત્વદ્યાંસ્ત્વત્તસ્ય સોમારુદ્રાવેવૈતત્તમોઽપહતઃ સોઽપહતપાપ્મૈવ દીક્ષતે તદ્યચ્છ્વેતાયૈ શ્વેતવત્સાયૈ પયસિ શૃતો ભવતિ કૃષ્ણં વૈ તમસ્તત્તમોઽપહન્તિ તસ્યૈષૈવ શ્વેતા શ્વેતવત્સા દક્ષિણા -

સ હૈતેનાપિ યજેત । યોઽલં યશસે સન્નયશો ભવતિ યો વા અનૂચાનઃ સોઽલં યશસેસન્નયશો ભવતિ યો ન યશો ભવતિ સ તમસા વૈ સ તત્પ્રાવૃતો ભવતિ તસ્ય સોમારુદ્રાવેવૈતત્તમોઽપહતઃ સોઽપહતપાપ્મા જ્યોતિરેવ શ્રિયા યશસા ભવતિ -

અથ મૈત્રાબાર્હસ્પત્યં ચરું નિર્વપતિ । હ્વલતિ વા એષ યો યજ્ઞપથાદેત્યેતિ વા એષ યજ્ઞપથાદ્યદયજ્ઞિયાન્યજ્ઞેન પ્રસજત્યયજ્ઞિયાન્વા એતદ્યજ્ઞેન પ્રસજતિ શૂદ્રાંસ્ત્વદ્યાંસ્ત્વન્મિત્રાબૃહસ્પતી વૈ યજ્ઞપથો બ્રહ્મ હિ મિત્રો બ્રહ્મ હિ યજ્ઞો બ્રહ્મ હિ બૃહસ્પતિર્બ્રહ્મ હિ યજ્ઞસ્તત્પુનર્યજ્ઞપથમપિપદ્યતે સોઽપિપદ્યૈવ યજ્ઞપથં દીક્ષતે તસ્માન્મૈત્રાબાર્હસ્પત્યં ચરું નિર્વપતિ -

તસ્યાવૃત્ । યા સ્વયમ્પ્રશીર્ણાઽઽશ્વત્થી શાખા પ્રાચી વોદીચી વા ભવતિ તસ્યૈ મૈત્રમ્પાત્રં કરોતિ વરુણ્યા વા એષા યા પરશુવૃક્ણાઽથૈષા મૈત્રી યા સ્વયમ્પ્રશીર્ણા તસ્માત્સ્વયમ્પ્રશીર્ણાયૈ શાખાયૈ મૈત્રં પાત્રં કરોતિ -

અથાતચ્ય દધિ । વિનાટ આસિચ્ય રથં યુક્ત્વાઽઽબધ્ય દેદીયિતવા આહ તદ્યત્સ્વયમુદિતં નવનીતં તદાજ્યં ભવતિ વરુણ્યં વા એતદ્યન્મથિતમથૈતન્મૈત્રં યત્સ્વયમુદિતં તસ્માત્સ્વયમુદિતમાજ્યમ્ભવતિ -

દ્વેધા તણ્ડુલાન્કુર્વન્તિ । સ યેઽણીયાંસઃ પરિભિન્નાસ્તે બાર્હસ્પત્યા અથ યેસ્થવીયાંસોઽપરિભિન્નાસ્તે મૈત્રા ન વૈ મિત્રઃ કં ચન હિનસ્તિ ન મિત્રં કશ્ચન હિનસ્તિ નૈનં કુશો ન કણ્ટકો વિભિનત્તિ નાસ્ય વ્રણશ્ચનાસ્તિ સર્વસ્ય હ્યેવ મિત્રો મિત્રમ્ -

અથ બાર્હસ્પત્યં ચરુમધિશ્રયતિ । તં મૈત્રેણ પાત્રેણાપિદધાતિ તદાજ્યમાનયતિ તત્તણ્ડુલાનાવપતિ સ એષ ઊષ્મણૈવ શ્રપ્યતે વરુણ્યો વા એષ યોઽગ્નિના શૃતોઽથૈષ મૈત્રો ય ઊષ્મણા શૃતસ્તસ્માદૂષ્મણા શૃતો ભવતિ તયોરુભયોરવદ્યન્નાહ મિત્રાબૃહસ્પતિભ્યામનુબ્રૂહીત્યાશ્રાવ્યાહ મિત્રાબૃહસ્પતી યજેતિ વષટ્કૃતે જુહોતિ -