શતપથબ્રાહ્મણમ્ · અધ્યાય 4.6.6

૪.૬.૬ યજ્ઞોપચારઃ
દેવા હ વૈ યજ્ઞં તન્વાનાઃ । તેઽસુરરક્ષસેભ્ય આસઙ્ગાદ્બિભયાં ચક્રુસ્તે હોચુઃ કો નો દક્ષિણત આસિષ્યતેઽથાભયેઽનાષ્ટ્ર ઉત્તરતો યજ્ઞમુપચરિષ્યામ ઇતિ -

તે હોચુઃ । ય એવ નો વીર્યવત્તમઃ સ દક્ષિણત આસ્તામથાભયેઽનાષ્ટ્ર ઉત્તરતો યજ્ઞમુપચરિષ્યામ ઇતિ -

તે હોચુઃ । ઇન્દ્રો વૈ નો વીર્યવત્તમ ઇન્દ્રો દક્ષિણત આસ્તામથાભયેઽનાષ્ટ્ર ઉત્તરતો યજ્ઞમુપચરિષ્યામ ઇતિ -

તે હેન્દ્રમૂચુઃ । ત્વં વૈ નો વીર્યવત્તમોઽસિ ત્વં દક્ષિણત આસ્વાથાભયેઽનાષ્ટ્ર ઽઉત્તરતો યજ્ઞમુપચરિષ્યામ ઇતિ -

સ હોવાચ । કિં મે તતઃ સ્યાદિતિ બ્રાહ્મણાચ્છંસ્યા તે બ્રહ્મસામ ત ઇતિ તસ્માદ્બ્રાહ્મણાચ્છંસિનં પ્રવૃણીત ઇન્દ્રો બ્રહ્મા બ્રાહ્મણાદિતીન્દ્રસ્ય હ્યેષા સ ઇન્દ્રો દક્ષિણત આસ્તાથાભયેઽનાષ્ટ્ર ઉત્તરતો યજ્ઞમુપાચરંસ્તસ્માદ્ય એવ વીર્યવત્તમઃ સ્યાત્સ દક્ષિણત આસીતાથાભયેઽનાષ્ટ્ર ઉત્તરતો યજ્ઞમુપચરેયુર્યો વૈ બ્રાહ્મણાનામનૂચાનતમઃ સ એષાં વીર્યવત્તમોઽથ યદિદં ય એવ કશ્ચ બ્રહ્મા ભવતિ કુવિત્તૂષ્ણીમાસ્ત ઇતિ તસ્માદ્ય એવ વીર્યવત્તમઃ સ્યાત્સ દક્ષિણત આસીતાથાભયેઽનાષ્ટ્ર ઉત્તરતો યજ્ઞમુપચરેયુસ્તસ્માદ્બ્રાહ્મણા દક્ષિણત આસતેઽથાભયેઽનાષ્ટ્ર ઉત્તરતો યજ્ઞમુપચરન્તિ -

સ યત્રાહ । બ્રહ્મન્ત્સ્તોષ્યામઃ પ્રશાસ્તરિતિ તદ્બ્રહ્મા જપત્યેતં તે દેવસવિતર્યજ્ઞં પ્રાહુર્બૃહસ્પતયે બ્રહ્મણે તેન યજ્ઞમવ તેન યજ્ઞપતિં તેન મામવ સ્તુત સવિતુઃ પ્રસવ ઇતિ સોઽસાવેવ બન્ધુરેતેન ન્વેવ ભૂયિષ્ઠા ઇવોપચરન્તિ -

અનેન ત્વેવોપચરેત્ । દેવ સવિતરેતદ્બૃહસ્પતે પ્રેતિ તત્સવિતારં પ્રસવાયોપધાવતિ સ હિ દેવાનાં પ્રસવિતા બૃહસ્પતે પ્રેતિ બૃહસ્પતિર્વૈ દેવાનાં બ્રહ્મા તદ્ય એવ દેવાનાં બ્રહ્મા તસ્મા એવૈતત્પ્રાહ તસ્માદાહ બૃહસ્પતે પ્રેતિ -

અથ મૈત્રાવરુણો જપતિ । પ્રસૂતં દેવેન સવિત્રા જુષ્ટં મિત્રાવરુણાભ્યામિતિ તત્સવિતારં પ્રસવાયોપધાવતિ સ હિ દેવાનાં પ્રસવિતા જુષ્ટમ્મિત્રાવરુણાભ્યામિતિ મિત્રાવરુણૌ વૈ મૈત્રાવરુણસ્ય દેવતે તદ્યે એવ મૈત્રાવરુણસ્ય દેવતે તાભ્યામેવૈતત્પ્રાહ તસ્માદાહ જુષ્ટં મિત્રાવરુણાભ્યામિતિ -