શતપથબ્રાહ્મણમ્ · અધ્યાય 4.6.5

૪.૬.૫ ગ્રહોપાસનાબ્રાહ્મણમ્
એષ વૈ ગ્રહઃ । ય એષ તપતિ યેનેમાઃ સર્વાઃ પ્રજા ગૃહીતાસ્તસ્માદાહુર્ગ્રહાન્ગૃહ્ણીમ ઇતિ ચરન્તિ ગ્રહગૃહીતાઃ સન્ત ઇતિ -

વાગેવ ગ્રહઃ । વાચા હીદં સર્વં ગૃહીતં કિમુ તદ્યદ્વાગ્ગ્રહઃ -

નામૈવ ગ્રહઃ । નામ્ના હીદં સર્વં ગૃહીતં કિમુ તદ્યન્નામ ગ્રહો બહૂનાં વૈ નામાનિ વિદ્માથ નસ્તેન તે ન ગૃહીતા ભવન્તિ -

અન્નમેવ ગ્રહઃ । અન્નેન હીદં સર્વં ગૃહીતં તસ્માદ્યાવન્તો નોઽશનમશ્નન્તિ તે નઃ સર્વે ગૃહીતા ભવન્ત્યેષૈવ સ્થિતિઃ -

સ ય એષ સોમગ્રહઃ । અન્નં વા એષ સ યસ્યૈ દેવતાયા એતં ગ્રહં ગૃહ્ણાતિ સાસ્મૈ દેવતૈતેન ગ્રહેણ ગૃહીતા તં કામં સમર્ધયતિ યત્કામ્યા ગૃહ્ણાતિ સ ઉદ્યન્તં વાદિત્યમુપતિષ્ઠતેઽસ્તં યન્તં વા ગ્રહોઽસ્યમુમનયાર્ત્યા ગૃહાણાસાવદો મા પ્રાપદિતિ યં દ્વિષ્યાદસાવસ્મૈ કામો મા સમર્ધીતિ વા ન હૈવાસ્મૈ સ કામઃ સમૃધ્યતે યસ્મા એવમુપતિષ્ઠતે -