શતપથબ્રાહ્મણમ્ · અધ્યાય 4.6.3

અથાતઃ પશ્વયનસ્યૈવ । પશ્વેકાદશિન્યૈવેયાત્સ આગ્નેયં પ્રથમમ્પશુમાલભતેઽથ વારુણમથ પુનરાગ્નેયમેવમેવૈતયા પશ્વેકાદશિન્યેયાત્ -

અથો અપ્યૈન્દ્રાગ્નમેવાહરહઃ પશુમાલભેત । અગ્નિર્વૈ સર્વા દેવતા અગ્નૌ હિ સર્વાભ્યો દેવતાભ્યો જુહ્વતીન્દ્રો વૈ યજ્ઞસ્ય દેવતા તત્સર્વાશ્ચૈવૈતદ્દેવતાનાપરાધ્નોતિ યો ચ યજ્ઞસ્ય દેવતા તાં નાપરાધ્નોતિ -

અથાત સ્તોમાયનસ્યૈવ । આગ્નેયમગ્નિષ્ટોમ આલભેત તદ્ધિ સલોમ યદાગ્નેયમગ્નિષ્ટોમ આલભેત યદ્યુક્થ્યઃ સ્યાદૈન્દ્રાગ્નં દ્વિતીયમાલભેતૈન્દ્રાગ્નાનિ હ્યુક્થાનિ યદિ ષોડશી સ્યાદૈન્દ્રં તૃતીયમાલભેતેન્દ્રો હિ ષોડશી યદ્યતિરાત્રઃ સ્યાત્સારસ્વતં ચતુર્થમાલભેત વાગ્વૈ સરસ્વતી યોષા વૈ વાગ્યોષા રાત્રિસ્તદ્યથાયથં યજ્ઞક્રતૂન્વ્યાવર્તયત્યેતાનિ ત્રીણ્યયનાનિ તેષાં યતમત્કામયેત તેનેયાદ્દ્વા ઉપાલમ્ભ્યૌ પશૂ સૌર્યં દ્વિતીયં પશુમાલભતે વૈષુવતેઽહન્પ્રાજાપત્યં મહાવ્રતે -