શતપથબ્રાહ્મણમ્ · અધ્યાય 4.5.6

૪.૫.૬ પાત્રાવકાશમન્ત્રાઃ
એષ વૈ પ્રજાપતિઃ । ય એષ યજ્ઞસ્તાયતે યસ્માદિમાઃ પ્રજાઃ પ્રજાતા એતમ્વેવાપ્યેતર્હ્યનુ પ્રજાયન્તે સ આશ્વિનં ગ્રહં ગૃહીત્વાવકાશાનવકાશયતિ -

સ ઉપાંશુમેવ પ્રથમમવકાશયતિ । પ્રાણાય મે વર્ચોદા વર્ચસે પવસ્વેત્યથોપાંશુસવનં વ્યાનાય મે વર્ચોદા વર્ચસે પવસ્વેત્યથાન્તર્યામમુદાનાય મે વર્ચોદા વર્ચસે પવસ્વેત્યથૈન્દ્રવાયવં વાચે મે વર્ચોદા વર્ચસે પવસ્વેત્યથ મૈત્રાવરુણં ક્રતૂદક્ષાભ્યાં મે વર્ચોદા વર્ચસે પવસ્વેત્યથાશ્વિનં શ્રોત્રાય મે વર્ચોદા વર્ચસે પવસ્વેત્યથ શુક્રામન્થિનૌ ચક્ષુર્ભ્યાં મે વર્ચોદસૌ વર્ચસે પવેથામિતિ -

અથાગ્રયણમ્ । આત્મને મે વર્ચોદા વર્ચસે પવસ્વેત્યથોક્થ્યમોજસે મે વર્ચોદા વર્ચસે પવસ્વેત્યથ ધ્રુવમાયુષે મે વર્ચોદા વર્ચસે પવસ્વેત્યથામ્ભૃણૌ વિશ્વાભ્યો મે પ્રજાભ્યો વર્ચોદસૌ વર્ચસે પવેથામિતિ વૈશ્વદેવૌ વા અમ્ભૃણાવતોહિ દેવેભ્ય ઉન્નયન્ત્યતો મનુષ્યેભ્યોઽતઃ પિતૃભ્યસ્તસ્માદ્વૈશ્વદેવાવમ્ભૃણૌ -

અથ દ્રોણકલશમ્ । કોઽસિ કતમોઽસીતિ પ્રજાપતિર્વૈ કઃ કસ્યાસિ કો નામાસીતિ પ્રજાપતિર્વૈ કો નામ યસ્ય તે નામામન્મહીતિ મનુતે હ્યસ્ય નામ યં ત્વા સોમેનાતીતૃપામેતિ તર્પયતિ હ્યેનં સોમેન સ આશ્વિનં ગ્રહં ગૃહીત્વાન્વઙ્ગમાશિષમાશાસ્તે સુપ્રજાઃ પ્રજાભિઃ સ્યામિતિ તત્પ્રજામાશાસ્તે સુવીરો વીરૈરિતિ તદ્વીરાનાશાસ્તે સુપોષઃ પોષૈરિતિ તત્પુષ્ટિમાશાસ્તે -

તાન્વૈ ન સર્વમિવાવકાશયેત્ । યો ન્વેવ જ્ઞાતમવકાશયેદ્યો વાસ્ય પ્રિયઃ સ્યાદ્યો વાનૂચાનોઽનૂક્તેનૈનાન્પ્રાપ્નુયાત્સ આશ્વિનં ગ્રહં ગૃહીત્વા કૃત્સ્નં યજ્ઞં જનયતિ તં કૃત્સ્નં યજ્ઞં જનયિત્વા તમાત્મન્ધત્તે તમાત્મન્કુરુતે -