શતપથબ્રાહ્મણમ્ · અધ્યાય 2.6.4

૨.૬.૪ સર્વશેષઃ
તદ્યદાહુઃ । સાકમેધૈર્વૈ દેવા વૃત્રમઘ્નંસ્તૈર્વેવ વ્યજયન્ત યેયમેષાં વિજિતિસ્તામિતિ સર્વૈર્હ ત્વેવ દેવાશ્ચાતુર્માસ્યૈર્વૃત્રમઘ્નન્ત્સર્વૈર્વેવ વ્યજયન્ત યેયમેષાં વિજિતિસ્તામ્ -

તે હોચુઃ । કેન રાજ્ઞા કેનાનીકેન યોત્સ્યામ ઇતિ સ હાગ્નિરુવાચ મયા રાજ્ઞા મયાનીકેનેતિ તેઽગ્નિના રાજ્ઞાગ્નિનાનીકેન ચતુરો માસઃ પ્રાજયંસ્તાન્બ્રહ્મણા ચ ત્રય્યા ચ વિદ્યયા પર્યગૃહ્ણન્ -

તે હોચુઃ । કેનૈવ રાજ્ઞા કેનાનીકેન યોત્સ્યામ ઇતિ સ હ વરુણ ઉવાચ મયા રાજ્ઞા મયાનીકેનેતિ તે વરુણેનૈવ રાજ્ઞા વરુણેનાનીકેનાપરાંશ્ચતુરો માસઃ પ્રાજયંસ્તાન્બ્રહ્મણા ચૈવ ત્રય્યા ચ વિદ્યયા પર્યગૃહ્ણન્ -

તે હોચુઃ । કેનૈવ રાજ્ઞા કેનાનીકેન યોત્સ્યામ ઇતિ સ હેન્દ્ર ઉવાચ મયા રાજ્ઞા મયાનીકેનેતિ ત ઇન્દ્રેણૈવ રાજ્ઞેન્દ્રેણાનીકેનાપરાંશ્ચતુરો માસઃ પ્રાજયંસ્તાન્બ્રહ્મણા ચૈવ ત્રય્યા ચ વિદ્યયા પર્યગૃહ્ણન્ -

સ યદ્વૈશ્વદેવેન યજતે । અગ્નિનૈવૈતદ્રાજ્ઞાગ્નિનાનીકેન ચતુરો માસઃ પ્રજયતિ તત્ત્ર્યેની શલલી ભવતિ લોહઃ ક્ષુરઃ સા યા ત્ર્યેની શલલી સા ત્રય્યૈ વિદ્યાયૈ રૂપં લોહઃ ક્ષુરો બ્રહ્મણો રૂપમગ્નિર્હિ બ્રહ્મ લોહિત ઇવ હ્યગ્નિસ્તસ્માલ્લોહઃ ક્ષુરો ભવતિ તેન પરિવર્તયતે તદ્બ્રહ્મણા ચૈવૈનમેતત્ત્રય્યા ચ વિદ્યયા પરિગૃહ્ણાતિ -

અથ યદ્વરુણપ્રઘાસૈર્યજતે । વરુણેનૈવૈતદ્રાજ્ઞા વરુણેનાનીકેનાપરાંશ્ચતુરો માસઃ પ્રજયતિ તત્ત્ર્યેની શલલી ભવતિ લોહઃ ક્ષુરસ્તેન પરિવર્તયતે તદ્બ્રહ્મણા ચૈવૈનમેતત્ત્રય્યા ચ વિદ્યયા પરિગૃહ્ણાતિ -

અથ યત્સાકમેધૈર્યજતે । ઇન્દ્રેણૈવૈતદ્રાજ્ઞેન્દ્રેણાનીકેનાપરાંશ્ચતુરો માસઃ પ્રજયતિ તત્ત્ર્યેની શલલી ભવતિ લોહઃ ક્ષુરસ્તેન પરિવર્તયતે તદ્બ્રહ્મણા ચૈવૈનમેતત્ત્રય્યા ચ વિદ્યયા પરિગૃહ્ણાતિ -

સ યદ્વૈશ્વદેવેન યજતે । અગ્નિરેવ તર્હિ ભવત્યગ્નેરેવ સાયુજ્યં સલોકતાં જયત્યથ યત્સાકમેધૈર્યજત ઇન્દ્ર એવ તર્હિ ભવતીન્દ્રસ્યૈવ સાયુજ્યં સલોકતાં જયતિ -

સ યસ્મિન્હર્તાવમું લોકમેતિ । સ એનમૃતુઃ પરસ્મા ઋતવે પ્રયચ્છતિ પર ઉ પરસ્મા ઋતવે પ્રયચ્છતિ સ પરમમેવ સ્થાનં પરમાં ગતિં ગચ્છતિ ચાતુર્માસ્યયાજી તદાહુર્ન ચાતુર્માસ્યયાજિનમનુવિન્દન્તિ પરમં હ્યેવ ખલુ સ સ્થાનમ્પરમાં ગતિં ગચ્છતીતિ -