શતપથબ્રાહ્મણમ્ · અધ્યાય 2.3.2

૨.૩.૨.
એતા હ વૈ દેવતા યોઽસ્તિ । તસ્મિન્વસન્તીન્દ્રો યમો રાજા નડો નૈષિધોઽનશ્નન્ત્સાંગમનોઽસન્પાંસવઃ -

તદ્વા એષ એવેન્દ્રઃ । યદાહવનીયોઽથૈષ એવ ગાર્હપત્યો યમો રાજાથૈષ એવ નડો નૈષિધો યદન્વાહાર્યપચનસ્તદ્યદેતમહરહર્દક્ષિણત આહરન્તિ તસ્માદાહુરહરહર્વૈ નડો નૈષિધો યમં રાજાનં દક્ષિણત ઉપનયતીતિ -

અથ ય એષ સભાયામગ્નિઃ । એષ એવાનશ્નન્ત્સાંગમનસ્તદ્યદેતમનશિત્વેવોપસંગચ્છન્તે તસ્માદેષોઽનશ્નન્નથ યદેતદ્ભસ્મોદ્ધૃત્ય પરાવપન્ત્યેષ એવાસન્પાંસવઃ સ યો હૈવમેતદ્વેદૈવમ્મય્યેતા દેવતા વસન્તીતિ સર્વાન્હૈવૈતાંલ્લોકાઞ્જયતિ સર્વાંલ્લોકાનનુસંચરતિ -

તેષામુપસ્થાનમ્ । યદેવ સાયં પ્રાતરાહવનીયમુપ ચ તિષ્ઠત ઉપ ચાસ્તે તદેવ તસ્યોપસ્થાનમથ યદેવ પ્રતિપરેત્ય ગાર્હપત્યમાસ્તે વા શેતે વા તદેવ તસ્યોપસ્થાનમથ યત્રૈવ સંવ્રજન્નન્વાહાર્યપચનમુપસ્મરેત્તદેવ તમ્મનસોપતિષ્ઠેત તદેવ તસ્યોપસ્થાનમ્ -

અથ પ્રાતઃ । અનશિત્વા મુહૂર્તં સભાયામાસિત્વાપિ કામં પલ્યયેત તદેવ તસ્યોપસ્થાનમથ યત્રૈવ ભસ્મોદ્ધૃતમુપનિગચ્છેત્તદેવ તસ્યોપસ્થાનમેવમુ હાસ્યૈતા દેવતા ઉપસ્થિતા ભવન્તિ -

યજમાનદેવત્યો વૈ ગાર્હપત્યઃ । અથૈષ ભ્રાતૃવ્યદેવત્યો યદન્વાહાર્યપચનસ્તસ્માદેતં નાહરહરાહરેયુર્ન હ વા અસ્ય સપત્ના ભવન્તિ યસ્યૈવં વિદુષ એતં નાહરહરાહરન્ત્યન્વાહાર્યપચનો વા એષઃ -

ઉપવસથ એવૈનમાહરેયુઃ । યત્રૈવાસ્મિન્યક્ષ્યન્તો ભવન્તિ તથો હાસ્યૈષોઽમોઘાયાહૃતો ભવતિ -

નવાવસિતે વૈનમાહરેયુઃ । તસ્મિન્પચેયુસ્તદ્બ્રાહ્મણા અશ્નીયુર્યદ્યુ તન્ન વિન્દેદ્યત્પચેદપિ ગોરેવ દુગ્ધમધિશ્રયિતવૈ બ્રૂયાત્તસ્મિન્બ્રાહ્મણાન્પાયયિતવૈ બ્રૂયાત્પાપીયાંસો હ વા અસ્ય સપત્ના ભવન્તિ યસ્યૈવં વિદુષ એવં કુર્વન્તિ તસ્માદેવમેવ ચિકીર્ષેત્ -

તદ્યત્રૈતત્પ્રથમં સમિદ્ધો ભવતિ । ધૂપ્યત ઇવ તર્હિ હૈષ ભવતિ રુદ્રઃ સ યઃ કામયેત યથેમા રુદ્રઃ પ્રજા અશ્રદ્ધયેવ ત્વત્સહસેવ ત્વન્નિઘાતમિવત્વત્સચત એવમન્નમદ્યામિતિ તર્હિ હ સ જુહુયાત્પ્રાપ્નોતિ હૈવૈતદન્નાદ્યં ય એવં વિદ્વાંસ્તર્હિ જુહોતિ -

અથ યત્રૈતત્પ્રદીપ્તતરો ભવતિ । તર્હિ હૈષ ભવતિ વરુણઃ સ યઃ કામયેત યથેમા વરુણઃ પ્રજા ગૃહ્ણન્નિવ ત્વત્સહસેવ ત્વન્નિઘાતમિવ ત્વત્સચત એવમન્નમદ્યામિતિ તર્હિ હ સ જુહુયાત્પ્રાપ્નોતિ હૈવૈતદન્નાદ્યં ય એવં વિદ્વાંસ્તર્હિ જુહોતિ -

અથ યત્રૈતત્પ્રદીપ્તો ભવતિ । ઉચ્ચૈર્ધૂમઃ પરમયા જૂત્યા બલ્બલીતિ તર્હિ હૈષ ભવતીન્દ્રઃ સ યઃ કામયેતેન્દ્રૈવ શ્રિયા યશસા સ્યામિતિ તર્હિ હ સ જુહુયાત્પ્રાપ્નોતિ હૈવૈતદન્નાદ્યં ય એવં વિદ્વાંસ્તર્હિ જુહોતિ -

અથ યત્રૈતત્પ્રતિતરામિવ । તિરશ્ચીવાર્ચિઃ સંશામ્યતો ભવતિ તર્હિ હૈષ ભવતિ મિત્રઃ સ યઃ કામયેત મૈત્રેણેદમન્નમદ્યામિતિ યમાહુઃ સર્વસ્ય વા અયમ્બ્રાહ્મણો મિત્રં ન વા અયં કં ચન હિનસ્તીતિ તર્હિ હ સ જુહુયાત્પ્રાપ્નોતિ હૈવૈતદન્નાદ્યં ય એવં વિદ્વાંસ્તર્હિ જુહોતિ -

અથ યત્રૈતદઙ્ગારાશ્ચાકશ્યન્ત ઇવ । તર્હિ હૈષ ભવતિ બ્રહ્મ સ યઃ કામયેત બ્રહ્મવર્ચસી સ્યામિતિ તર્હિ હ સ જુહુયાત્પ્રાપ્નોતિ હૈવૈતદન્નાદ્યં ય એવં વિદ્વાંસ્તર્હિ જુહોતિ -

એતેષામેકં સંવત્સરમુપેર્ત્સેત્ । સ્વયં જુહ્વદ્યદિ વાસ્યાન્યો જુહુયાદથ યોઽન્યથાન્યથા જુહોતિ યથાપો વાભિખનન્નન્યદ્વાન્નાદ્યં સ સામિ નિવર્તેતૈવં તદથ યઃ સાર્ધં જુહોતિ યથાપો વાભિખનન્નન્યદ્વાન્નાદ્યં તત્ક્ષિપ્રેઽભિતૃન્દ્યાદેવં તત્ -

અભ્રયો હ વા એતા અન્નાદ્યસ્ય યદાહુતયઃ । અભિ હૈવૈતદન્નાદ્યં તૃણત્તિ ય એવં વિદ્વાનગ્નિહોત્રં જુહોતિ -

સા યા પૂર્વાહુતિઃ । તે દેવા અથ યોત્તરા તે મનુષ્યા અથ યત્સ્રુચિ પરિશિનષ્ટિ તે પશવઃ -

સ વૈ કનીય ઇવ પૂર્વામાહુતિં જુહોતિ । ભૂય ઇવોત્તરાં ભૂય ઇવ સ્રુચિ પરિશિનષ્ટિ -

સ યત્કનીય ઇવ પૂર્વામાહુતિં જુહોતિ । કનીયાંસો હિ દેવા મનુષ્યેભ્યોઽથ યદ્ભૂય ઇવોત્તરાં ભૂયાંસો હિ મનુષ્યા દેવેભ્યોઽથ યદ્ભૂય ઇવ સ્રુચિ પરિશિનષ્ટિ ભૂયાંસો હિ પશવો મનુષ્યેભ્યઃ કનીયાંસો હ વા અસ્ય ભાર્યા ભવન્તિ ભૂયાંસઃ પશવો ય એવં વિદ્વાનગ્નિહોત્રં જુહોતિ તદ્વૈ સમૃદ્ધં યસ્ય કનીયાંસો ભાર્યા અસન્ભૂયાંસઃ પશવઃ -