શતપથબ્રાહ્મણમ્ · અધ્યાય 2.1.3

૨.૧.૩.
વસન્તો ગ્રીષ્મો વર્ષાઃ । તે દેવા ઋતવઃ શરદ્ધેમન્તઃ શિશિરસ્તે પિતરો ય એવાપૂર્યતેઽર્ધમાસઃ સ દેવા યોઽપક્ષીયતે સ પિતરોઽહરેવ દેવા રાત્રિઃ પિતરઃ પુનરહ્નઃ પૂર્વાહ્ણો દેવા અપરાહ્ણઃ પિતરઃ -

તે વા એત ઋતવઃ । દેવાઃ પિતરઃ સ યો હૈવં વિદ્વાન્દેવાઃ પિતર ઇતિ હ્વયત્યા હાસ્ય દેવા દેવહૂયં ગચ્છન્ત્યા પિતરઃ પિતૃહૂયમવન્તિ હૈનં દેવા દેવહૂયેઽવન્તિ પિતરઃ પિતૃહૂયે ય એવં વિદ્વાન્દેવાઃ પિતર ઇતિ હ્વયતિ -

સ યત્રોદગાવર્તતે । દેવેષુ તર્હિ ભવતિ દેવાંસ્તર્હ્યભિગોપાયત્યથ યત્ર દક્ષિણાવર્તતે પિતૃષુ તર્હિ ભવતિ પિતૄંસ્તર્હ્યભિગોપાયતિ -

સ યત્રોદગાવર્તતે । તર્હ્યગ્ની આદધીતાપહતપાપ્માનો દેવા અપ પાપ્માનં હતેઽમૃતા દેવા નામૃતત્વસ્યાશાસ્તિ સર્વમાયુરેતિ યસ્તર્હ્યાધત્તેઽથ યત્ર દક્ષિણાવર્તતે યસ્તર્હ્યાધત્તેઽનપહતપાપ્માનઃ પિતરો ન પાપ્માનમપહતે મર્ત્યાઃ પિતરઃ પુરા હાયુષો મ્રિયતે યસ્તર્હ્યાધત્તે -

બ્રહ્મૈવ વસન્તઃ । ક્ષત્રં ગ્રીષ્મો વિડેવ વર્ષાસ્તસ્માદ્બ્રાહ્મણો વસન્ત આદધીત બ્રહ્મ હિ વસન્તસ્તસ્માત્ક્ષત્રિયો ગ્રીષ્મ આદધીત ક્ષત્રં હિ ગ્રીષ્મસ્તસ્માદ્વૈશ્યો વર્ષાસ્વાદધીત વિડ્ઢિ વર્ષાઃ -

સ યઃ કામયેત । બ્રહ્મવર્ચસી સ્યામિતિ વસન્તે સ આદધીત બ્રહ્મ વૈ વસન્તો બ્રહ્મવર્ચસી હૈવ ભવતિ -

અથ યઃ કામયેત । ક્ષત્રં શ્રિયા યશસા સ્યામિતિ ગ્રીષ્મે સ આદધીત ક્ષત્રં વૈ ગ્રીષ્મઃ ક્ષત્રં હૈવ શ્રિયા યશસા ભવતિ -

અથ યઃ કામયેત । બહુઃ પ્રજયા પશુભિઃ સ્યામિતિ વર્ષાસુ સ આદધીત વિડ્વૈ વર્ષા અન્નં વિશો બહુર્હૈવ પ્રજયા પશુભિર્ભવતિ ય એવં વિદ્વાન્વર્ષાસ્વાધત્તે -

તે વા એત ઋતવઃ । ઉભય એવાપહતપાપ્માનઃ સૂર્ય એવૈષાં પાપ્મનોઽપહન્તોદ્યન્નેવૈષામુભયેષાં પાપ્માનમપહન્તિ તસ્માદ્યદૈવૈનં કદા ચ યજ્ઞ ઉપનમેદથાગ્ની આદધીત ન શ્વઃશ્વમુપાસીત કો હિ મનુષ્યસ્ય શ્વો વેદ -