શતપથબ્રાહ્મણમ્ · અધ્યાય 14.6.3

ભુજ્યુબ્રાહ્મણમ્
અથ હૈનં ભુજ્યુર્લાહ્યાયનિઃ પપ્રચ્છ યાજ્ઞવલ્ક્યેતિ હોવાચ મદ્રેષુ ચરકાઃ પર્યવ્રજામ તે પતઞ્ચલસ્ય કાપ્યસ્ય ગૃહાનૈમ તસ્યાસીદ્દુહિતા ગન્ધર્વગૃહીતા તમપૃચ્છામ કોઽસીતિ સોઽબ્રવીત્સુધન્વાઙ્ગિરસ ઇતિ તં યદા લોકાનામન્તાનપૃચ્છામાથૈનમબ્રૂમ ક્વ પારિક્ષિતા અભવન્ક્વ પારિક્ષિતા અભવન્નિતિ તત્ત્વા પૃચ્છામિ યાજ્ઞવલ્ક્ય ક્વ પારિક્ષિતા અભવન્નિતિ -

સ હોવાચ। ઉવાચ વૈ સ તદગચ્છન્વૈ તે તત્ર યત્રાશ્વમેધયાજિનો ગચ્છન્તીતિ ક્વ ન્વશ્વમેધયાજિનો ગચ્છન્તીતિ દ્વાત્રિંશતં વૈ દેવરથાહ્ન્યાન્યયં લોકસ્તં સમન્તં લોકં દ્વિસ્તાવત્પૃથિવી પર્યેતિ તાં પૃથિવીં દ્વિસ્તાવત્સમુદ્રઃ પર્યેતિ તદ્યાવતી ક્ષુરસ્ય ધારા યાવદ્વા મક્ષિકાયાઃ પત્રં તાવાનન્તરેણાકાશસ્તાનિન્દ્રઃ સુપર્ણો ભૂત્વા વાયવે પ્રાયચ્છત્તાન્વાયુરાત્મનિ ધિત્વા તત્રાગમયદ્યત્ર પારિક્ષિતા અભવન્નિત્યેવમિવ વૈ સ વાયુમેવ પ્રશશંસ તસ્માદ્વાયુરેવ વ્યષ્ટિર્વાયુઃ સમષ્ટિરપ પુનર્મૃત્યું જયતિ સર્વમાયુરેતિ ય એવં વેદ તતો હ ભુજ્યુર્લાહ્યાયનિરુપરરામ -