શતપથબ્રાહ્મણમ્ · અધ્યાય 13.2.1

૧૩.૨.૧ અન્નહોમબ્રાહ્મણમ્
પ્રજાપતિર્દેવેભ્યો યજ્ઞાન્વ્યાદિશત્ સ આત્મન્નશ્વમેધમધત્ત તે દેવાઃ પ્રજાપતિમબ્રુવન્નેષ વૈ યજ્ઞો યદશ્વમેધોઽપિ નોઽત્રાસ્તુ ભાગ ઇતિ તેભ્ય એતાનન્નહોમાન્કલ્પયદ્યદન્નહોમાઞ્જુહોતિ દેવાનેવ તત્પ્રીણાતિ -

આજ્યેન જુહોતિ તેજો વા આજ્યં તેજસૈવાસ્મિંસ્તત્તેજો દધાત્યાજ્યેન જુહોત્યેતદ્વૈ
દેવાનાં પ્રિયં ધામ યદાજ્યં પ્રિયેણૈવૈનાન્ધામ્ના સમર્ધયતિ -

સક્તુભિર્જુહોતિ દેવાનાં વા એતદ્રૂપં યત્સક્તવો દેવાનેવ તત્પ્રીણાતિ -

ધાનાભિર્જુહોતિ અહોરાત્રાણાં વા એતદ્રૂપં યદ્ધાનાઃ। અહોરાત્રાણ્યેવ તત્પ્રીણાતિ -

લાજૈર્જુહોતિ નક્ષત્રાણાં વા એતદ્રૂપં યલ્લાજાઃ। નક્ષત્રાણ્યેવ તત્પ્રીણાતિ પ્રાણાય સ્વાહાપાનાય સ્વાહેતિ નામગ્રાહં જુહોતિ નામગ્રાહમેવૈનાંસ્તત્પ્રીણાત્યેકસ્મૈ સ્વાહા દ્વાભ્યાં સ્વાહા શતાય સ્વાહૈકશતાય સ્વાહેત્યનુપૂર્વં જુહોત્યનુપૂર્વમેવૈનાંસ્તત્પ્રીણાત્યેકોત્તરા જુહોત્યેકવૃદ્વૈ સ્વર્ગો લોક એકધૈવૈનં સ્વર્ગં લોકં ગમયતિ પરાચીર્જુહોતિ પરાઙિવ વૈ સ્વર્ગો લોકઃ સ્વર્ગસ્ય લોકસ્યાભિજિત્યૈ -

ઈશ્વરો વા એષઃ પરાઙ્પ્રદઘોર્યઃ પરાચીરાહુતિર્જુહોતિ નૈકશતમત્યેતિ યદેકશતમતીયાદાયુષા યજમાનં વ્યર્ધયેદેકશતં જુહોતિ શતાયુર્વૈ પુરુષઃ।આત્મૈકશતઃ। આયુષ્યેવાત્મન્પ્રતિતિષ્ઠતિ વ્યુષ્ટ્યૈ સ્વાહા સ્વર્ગાય સ્વાહેત્યુત્તમે આહુતી જુહોતિ રાત્રિર્વૈ વ્યુષ્ટિરહઃ સ્વર્ગોઽહોરાત્રે એવ તત્પ્રીણાતિ -

તદાહુઃ યદુભે દિવા વા નક્તં વા જુહુયાદહોરાત્રે મોહયેદ્વ્યુષ્ટ્યૈ સ્વાહેત્યનુદિત આદિત્યે જુહોતિ સ્વર્ગાય સ્વાહેત્યુદિતેઽહોરાત્રયોરવ્યતિમોહાય -