શતપથબ્રાહ્મણમ્ · અધ્યાય 13.1.6

વિભૂર્માત્રા પ્રભૂઃ પિત્રેતિ ઇયં વૈ માતાઽસૌ પિતાઽઽભ્યામેવૈનં પરિદદાત્યશ્વોઽસિ હયોઽસીતિ શાસ્ત્યેવૈનં તત્તસ્માચ્છિષ્ટાઃ પ્રજા જાયન્તેઽત્યોઽસિ મયોઽસીત્યત્યેવૈનં નયતિ તસ્માદશ્વઃ પશૂનાં શ્રૈષ્ઠ્યં ગચ્છત્યર્વાસિ સપ્તિરસિ વાજ્યસીતિ યથાયજુરેવૈતદ્વૃષાસિ નૃમણા અસીતિ મિથુનત્વાય યયુર્નામાસિ શિશુર્નામાસીત્યેતદ્વા અશ્વસ્ય પ્રિયં નામધેયં પ્રિયેણૈવૈનં નામ્નાભિવદતિ તસ્માદપ્યામિત્રૌ સંગત્ય નામ્ના ચેદભિવદતોઽન્યોઽન્યં સમેવ જાનાતે -

આદિત્યાનાં પત્વાન્વિહીતિ આદિત્યાનેવૈનં ગમયતિ દેવા આશાપાલા એતં દેવેભ્યોઽશ્વમ્
મેધાય પ્રોક્ષિતં રક્ષતેતિ શતં વૈ તલ્પ્યા રાજપુત્રા આશાપાલાસ્તેભ્ય એવૈનમ્પરિદદાતીહ રન્તિરિહ રમતામિહ ધૃતિરિહ સ્વધૃતિઃ સ્વાહેતિ સંવત્સરમાહુતીર્જુહોતિ ષોડશ નવતીરેતા વા અશ્વસ્ય બન્ધનં તાભિરેવૈનમ્બધ્નાતિ તસ્માદશ્વઃ પ્રમુક્તો બન્ધનમાગચ્છતિ ષોડશ નવતીરેતા વા અશ્વસ્ય બન્ધનં તાભિરેવૈનં બધ્નાતિ તસ્માદશ્વઃ પ્રમુક્તો બન્ધનં ન જહાતિ -

રાષ્ટ્રં વા અશ્વમેધઃ રાષ્ટ્ર એતે વ્યાયચ્છન્તે યેઽશ્વં રક્ષન્તિ તેષાં ય ઉદૃચં ગચ્છન્તિ રાષ્ટ્રેણૈવ તે રાષ્ટ્રં ભવન્ત્યથ યે નોદૃચં ગચ્છન્તિ રાષ્ટ્રાત્તે વ્યવચ્છિદ્યન્તે તસ્માદ્રાષ્ટ્ર્યશ્વમેધેન યજેત પરા વા એષ સિચ્યતે યોઽબલોઽશ્વમેધેન યજતે યદ્યમિત્રા અશ્વં વિન્દેરન્યજ્ઞોઽસ્ય વિચ્છિદ્યેત પાપીયાન્ત્સ્યાચ્છતં કવચિનો રક્ષન્તિ યજ્ઞસ્ય સંતત્યા અવ્યવચ્છેદાય ન પાપીયાન્ભવત્યથાન્યમાનીય પ્રોક્ષેયુઃ સૈવ તત્ર પ્રાયશ્ચિત્તિઃ -