શતપથબ્રાહ્મણમ્ · અધ્યાય 13.1.7

પ્રજાપતિરકામયત અશ્વમેધેન યજેયેતિ સોઽશ્રામ્યત્સ તપોઽતપ્યત તસ્ય શ્રાન્તસ્ય તપ્તસ્ય સપ્તધાઽઽત્મનો દેવતા અપાક્રામન્ત્સા દીક્ષાઽભવત્સ એતાનિ વૈશ્વદેવાન્યપશ્યત્તાન્યજુહોત્તૈર્વૈ સ દીક્ષામવારુન્દ્ધ યદ્વૈશ્વદેવાનિ જુહોતિ દીક્ષામેવ તૈર્યજમાનોઽવરુન્દ્ધેઽન્વહં જુહોત્યન્વહમેવ દીક્ષામવરુન્દ્ધે સપ્ત જુહોતિ સપ્ત વૈ તા દેવતા અપાક્રામંસ્તાભિરેવાસ્મૈ દીક્ષામવરુન્દ્ધે -

અપ વા એતેભ્યઃ પ્રાણાઃ ક્રામન્તિ યે દીક્ષામતિરેચયન્તિ સપ્તાહં પ્રચરન્તિ સપ્ત વૈ શીર્ષણ્યાઃ પ્રાણાઃ પ્રાણા દીક્ષા પ્રાણૈરેવાસ્મૈ પ્રાણાન્દીક્ષામવરુન્દ્ધે ત્રેધા વિભજ્ય દેવતાં જુહોતિ ત્ર્યાવૃતો વૈ દેવાસ્ત્ર્યાવૃત ઇમે લોકા ઋદ્ધ્યામેવ વીર્ય એષુ લોકેષુ પ્રતિતિષ્ઠતિ -

એકવિંશતિઃ સમ્પદ્યન્તે દ્વાદશ માસાઃ પઞ્ચર્તવસ્ત્રય ઇમે લોકા અસાવાદિત્ય એકવિંશસ્તદ્દૈવં ક્ષત્રં સા શ્રીસ્તદાધિપત્યં તદ્બ્રધ્નસ્ય વિષ્ટપં તત્સ્વારાજ્યમશ્નુતે -

ત્રિંશતમૌદ્ગ્રભણાનિ જુહોતિ ત્રિંશદક્ષરા વિરાડ્વિરાડુ કૃત્સ્નમન્નં કૃત્સ્નસ્યૈવાન્નાદ્યસ્યાવરુદ્ધ્યૈ ચત્વાર્યૌદ્ગ્રભણાનિ જુહોતિ ત્રીણિ વૈશ્વદેવાનિ સપ્ત સમ્પદ્યન્તે સપ્ત વૈ શીર્ષણ્યાઃ પ્રાણાઃ પ્રાણા દીક્ષા પ્રાણૈરેવાસ્મૈ પ્રાણાન્દીક્ષામવરુન્દ્ધે પૂર્ણાહુતિમુત્તમાં જુહોતિ પ્રત્યુત્તબ્ધ્યૈ સયુક્ત્વાય -