શતપથબ્રાહ્મણમ્ · અધ્યાય 13.1.4

પ્રજાપતિરશ્વમેધમસૃજત સોઽસ્માત્સૃષ્ટઃ પરાઙૈત્સ દિશોઽનુપ્રાવિશત્તં દેવાઃ પ્રૈષમૈચ્છંસ્તમિષ્ટિભિરનુપ્રાયુઞ્જત તમિષ્ટિભિરન્વૈચ્છંસ્તમિષ્ટિભિરન્વવિન્દન્ યદિષ્ટિભિર્યજતેઽશ્વમેવ તન્મેધ્યં યજમાનોઽન્વિચ્છતિ -

સાવિત્ર્યો ભવન્તિ ઇયં વૈ સવિતા યો વા અસ્યાં નિલયતે યોઽન્યત્રૈત્યસ્યાં વાવ તમનુવિન્દન્તિ ન વા ઇમાં કશ્ચન તિર્યઙ્નોર્ધ્વોઽત્યેતુમર્હતિ યત્સાવિત્ર્યો ભવન્ત્યશ્વસ્યૈવાનુવિત્ત્યૈ -

તદાહુઃ પ્ર વા એતદશ્વો મીયતે યત્પરાઙેતિ ન હ્યેનં પ્રત્યાવર્તયન્તીતિ યત્સાયં ધૃતીર્જુહોતિ ક્ષેમો વૈ ધૃતિઃ ક્ષેમો રાત્રિઃ ક્ષેમેણૈવૈનં દાધાર તસ્માત્સાયમ્મનુષ્યાશ્ચ પશવશ્ચ ક્ષેમ્યા ભવન્ત્યથ યત્પ્રાતરિષ્ટિભિર્યજત ઇચ્છત્યેવૈનં તત્તસ્માદ્દિવા નષ્ટૈષ એતિ યદ્વેવ સાયં ધૃતીર્જુહોતિ પ્રાતરિષ્ટિભિર્યજતે યોગક્ષેમમેવ તદ્યજમાનઃ કલ્પયતે તસ્માદ્યત્રૈતેન યજ્ઞેન યજન્તે કૢપ્તઃ પ્રજાનાં યોગક્ષેમો ભવતિ -