શતપથબ્રાહ્મણમ્ · અધ્યાય 11.7.1

પશુબન્ધેન યજતે। પશવો વૈ પશુબન્ધઃ સ યત્પશુબન્ધેન યજતે પશુમાનસાનીતિ તેન ગૃહેષુ યજેત ગૃહેષુ પશૂન્બધ્ના ઇતિ તેન સુયવસે યજેત સુયવસે પશૂન્બધ્ના ઇતિ જીર્યન્તિ હ વૈ જુહ્વતો યજમાનસ્યાગ્નયોઽગ્નીન્જીર્યતોઽનુ યજમાનો યજમાનમનુ ગૃહાશ્ચ પશવશ્ચ -

સ યત્પશુબન્ધેન યજતે। અગ્નીનેવૈતત્પુનર્ણવાન્કુરુતેઽગ્નીનાં પુનર્ણવતામનુ યજમાનો યજમાનમનુ ગૃહાશ્ચ પશવશ્ચાયુષ્યો હ વા અસ્યૈષ આત્મનિષ્ક્રયણો ભવતિ માંસીયન્તિ હ વૈ જુહ્વતો યજમાનસ્યાગ્નયસ્તે યજમાનમેવ ધ્યાયન્તિ યજમાનં સંકલ્પયન્તિ પચન્તિ વા અન્યેષ્વગ્નિષુ વૃથા માંસમથૈતેષાં નાતોઽન્યા માંસાશા વિદ્યતે યસ્યો ચૈતે ભવન્તિ -

સ યત્પશુબન્ધેન યજતે। આત્માનમેવૈતન્નિષ્ક્રીણીતે વીરેણ વીરં વીરો હિ પશુર્વીરો યજમાન એતદુ હ વૈ પરમમન્નાદ્યં યન્માંસં સ પરમસ્યૈવાન્નાદ્યસ્યાત્તા ભવતિ તં વૈ સંવત્સરો નાનીજનમતીયાદાયુર્વૈ સંવત્સર આયુરેવૈતદમૃતમાત્મન્ધત્તે -