શતપથબ્રાહ્મણમ્ · અધ્યાય 11.1.8

દેવાશ્ચ વા અસુરાશ્ચ। ઉભયે પ્રાજાપત્યાઃ પસ્પૃધિરે તતોઽસુરા અતિમાનેનૈવ કસ્મિન્નુ
વયં જુહુયામેતિ સ્વેષ્વેવાસ્યેષુ જુહ્વતશ્ચેરુસ્તેઽતિમાનેનૈવ પરાબભૂવુસ્તસ્માન્નાતિમન્યેત પરાભવસ્ય હૈતન્મુખં યદતિમાનઃ -

અથ દેવાઃ અન્યોઽન્યસ્મિન્નેવ જુહ્વતશ્ચેરુસ્તેભ્યઃ પ્રજાપતિરાત્માનં પ્રદદૌ યજ્ઞો હૈષામાસ યજ્ઞો હિ દેવાનામન્નં -

સ દેવેભ્ય આત્માનં પ્રદાય। અથૈતમાત્મનઃ પ્રતિમામસૃજત યદ્યજ્ઞં તસ્માદાહુઃ પ્રજાપતિર્યજ્ઞ ઇત્યાત્મનો હ્યેતં પ્રતિમામસૃજત -

સ એતેન યજ્ઞેન। દેવેભ્ય આત્માનં નિરક્રીણીત સ યદ્વ્રતમુપૈતિ યથૈવ તત્પ્રજાપતિર્દેવેભ્ય આત્માનં પ્રાયચ્છદેવમેવૈષ એતદ્દેવેભ્ય આત્માનં પ્રયચ્છતિ તસ્માદુ સંયત એવૈતાં રાત્રિં ચિચરિષેદ્યથા હવિષા ચરેદેવં હવિર્હ્યેષ દેવાનાં ભવતિ -

અથ યદ્યજ્ઞં તનુતે। યજ્ઞેનૈવૈતદ્દેવેભ્ય આત્માનં નિષ્ક્રીણીતે યથૈવ તત્પ્રજાપતિર્નિરક્રીણીતૈવમથ યદ્ધવિર્નિર્વપતિ હવિષૈવૈતદ્યજ્ઞં નિષ્ક્રીણાતિ હવિરનુવાક્યયાઽનુવાક્યામવદાનેનાવદાનં યાજ્યયા યાજ્યાં વષટ્કારેણ વષટ્કારમાહુત્યા તસ્યાહુતિરેવાનિષ્ક્રીતા ભવતિ -

સ યથાગ્રપ્રશીર્ણો વૃક્ષઃ। એવમસ્યૈષ યજ્ઞો ભવત્યાહુતિમેવાન્વાહાર્યેણ નિષ્ક્રીણાતિ તદ્યદેતદ્ધીનં યજ્ઞસ્યાન્વાહરતિ તસ્માદન્વાહાર્યો નામૈવમુ હાસ્યૈષ સર્વ એવ યજ્ઞો નિષ્ક્રીતો ભવત્યેષ હ વૈ યજમાનસ્યામુષ્મિંલોક આત્મા ભવતિ યદ્યજ્ઞ સ હ સર્વતનૂરેવ યજમાનોઽમુષ્મિંલોકે સમ્ભવતિ ય એવં વિદ્વાન્નિષ્ક્રીત્યા યજતે -