શતપથબ્રાહ્મણમ્ · અધ્યાય 10.6.5

ઉપાસ્યસ્ય હિરણ્યગર્ભસ્ય સ્વરૂપપ્રતિપાદકં બ્રાહ્મણમ્

નૈવેહ કિં ચનાગ્ર આસીત્ મૃત્યુનૈવેદમાવૃતમાસીદશનાયયાશનાયા હિ મૃત્યુસ્તન્મનોઽકુરુતાત્મન્વી સ્યામિતિ સોઽર્ચન્નચરત્તસ્યાર્ચત આપોઽજાયન્તાર્ચતે વૈ મે કમભૂદિતિ તદેવાર્ક્યસ્યાર્કત્વં કં હ વા અસ્મૈ ભવતિ ય એવમેતદર્ક્યસ્યાર્કત્વં વેદ -

આપો વા અર્કઃ તદ્યદપાં શર આસીત્તત્સમહન્યત સા પૃથિવ્યભવત્તસ્યામશ્રામ્યત્તસ્ય શ્રાન્તસ્ય તપ્તસ્ય તેજો રસો નિરવર્તતાગ્નિઃ -

સ ત્રેધાત્માનં વ્યકુરુત આદિત્યં તૃતીયં વાયું તૃતીયં સ એષ પ્રાણસ્ત્રેધાવિહિતસ્તસ્ય પ્રાચી દિક્શિરોઽસૌ ચાસૌ ચેર્માવથાસ્ય પ્રતીચી દિક્પુચ્છમસૌ ચાસૌ ચ સક્થ્યૌ દક્ષિણા ચોદીચી ચ પાર્શ્વે દ્યૌષ્પૃષ્ઠમન્તરિક્ષમુદરમિયમુરઃ સ એષોઽપ્સુ પ્રતિષ્ઠિતો યત્ર ક્વ ચૈતિ તદેવ પ્રતિતિષ્ઠત્યેવં વિદ્વાન્ -

સોઽકામયત દ્વિતીયો મ આત્મા જાયેતેતિ સ મનસા વાચં મિથુનં સમભવદશનાયા મૃત્યુસ્તદ્યદ્રેત આસીત્સ સંવત્સરોઽભવન્ન હ પુરા તતઃ સંવત્સર આસ તમેતાવન્તં કાલમબિભર્યાવાન્ત્સંવત્સરસ્તમેતાવતઃ કાલસ્ય પરસ્તાદસૃજત તં જાતમભિવ્યાદદાત્સ ભાણકરોત્સૈવ વાગભવત્ -

સ ઐક્ષત યદિ વા ઇમમભિમંસ્યે કનીયોઽન્નં કરિષ્ય ઇતિ સ તયા વાચા તેનાત્મનેદં સર્વમસૃજત યદિદં કિં ચર્ચો યજૂંષિ સામાનિ છન્દાંસિ યજ્ઞાન્પ્રજાં પશૂન્ત્સ યદ્યદેવાસૃજત તત્તદત્તુમધ્રિયત સર્વં વા અત્તીતિ તદદિતેરદિતિત્વં સર્વસ્યાત્તા ભવતિ સર્વમસ્યાન્નં ભવતિ ય એવમેતદદિતેરદિતિત્વં વેદ-

સોઽકામયત ભૂયસા યજ્ઞેન ભૂયો યજેયેતિ સોઽશ્રામ્યત્સ તપોઽતપ્યત તસ્ય શ્રાન્તસ્ય તપ્તસ્ય યશો વીર્યમુદક્રામત્પ્રાણા વૈ યશો વીર્યં તત્પ્રાણેષૂત્ક્રાન્તેષુ શરીરં શ્વયિતુમધ્રિયત તસ્ય શરીર એવ મન આસીત્ -

સોઽકામયત મેધ્યં મ ઇદં સ્યાદાત્મન્વ્યનેન સ્યામિતિ તતોઽશ્વઃ સમભવદ્યદશ્વત્તન્મેધ્યમભૂદિતિ તદેવાશ્વમેધસ્યાશ્વમેધત્વમેષ હ વા અશ્વમેધં વેદ ય એનમેવં વેદ -

તમનવરુધ્યેવામન્યત તં સંવત્સરસ્ય પરસ્તાદાત્મન આલભત પશૂન્દેવતાભ્યઃ પ્રત્યૌહત્તસ્માત્સર્વદેવત્યં પ્રોક્ષિતં પ્રાજાપત્યમાલભન્ત એષ વા અશ્વમેધો ય એષ તપતિ તસ્ય સંવત્સર આત્માઽયમગ્નિરર્કસ્તસ્યેમે લોકા આત્માનસ્તાવેતાવર્કાશ્વમેધૌ સો પુનરેકૈવ દેવતા ભવતિ મૃત્યુરેવાપ પુનર્મૃત્યું જયતિ નૈનં મૃત્યુરાપ્નોતિ મૃત્યુરસ્યાત્મા ભવતિ સર્વમાયુરેત્યેતાસાં દેવતાનામેકો ભવતિ ય એવં વેદ-

અથ વંશઃ સમાનમા સાંજીવીપુત્રાત્સાંજીવીપુત્રો માણ્ડૂકાયનેર્માણ્ડૂકાયનિર્માણ્ડવ્યાન્માણ્ડવ્યઃ કૌત્સાત્કૌત્સો માહિત્થેર્માહિત્થિર્વામકક્ષાયણાદ્વામકક્ષાયણો વાત્સ્યાદ્વાત્સ્યઃ શાણ્ડિલ્યાચ્છાણ્ડિલ્યઃ
કુશ્રેઃ કુશ્રિર્યજ્ઞવચસો રાજસ્તમ્બાયનાદ્યજ્ઞવચા રાજસ્તમ્બાયનસ્તુરાત્કાવષેયાત્તુરઃ કાવષેયઃ પ્રજાપતેઃ પ્રજાપતિર્બ્રહ્મણો બ્રહ્મ સ્વયમ્ભુ બ્રહ્મણે નમઃ -