શતપથબ્રાહ્મણમ્ · શ્લોક 10.3-2

ધીરો હ શાતપર્ણેયઃ મહાશાલં જાબાલમુપોત્સસાદ તં હોવાચ કિં માવિદ્વાનુપોદસદ ઇત્યગ્નિં વેદેતિ કમગ્નિં વેત્થેતિ વાચમિતિ યસ્તમગ્નિં વેદ કિં સ ભવતીતિ વાગ્મી ભવતીતિ હોવાચ નૈનં વાગ્જહાતીતિ -

વેત્થાગ્નિમિતિ હોવાચ કિમેવ મા વિદ્વાનુપોદસદ ઇત્યગ્નિં વેદેતિ કમગ્નિં વેત્થેતિ ચક્ષુરિતિ યસ્તમગ્નિં વેદ કિં સ ભવતીતિ ચક્ષુષ્માન્ભવતીતિ હોવાચ નૈનં ચક્ષુર્જહાતીતિ -

વેત્થાગ્નિમિતિ હોવાચ । કિમેવ મા વિદ્વાનુપોદસદ ઇત્યગ્નિં વેદેતિ કમગ્નિં વેત્થેતિ મન ઇતિ યસ્તમગ્નિં વેદ કિં સ ભવતીતિ મનસ્વી ભવતીતિ હોવાચ નૈનં મનો જહાતીતિ -

વેત્થાગ્નિમિતિ હોવાચ। કિમેવ મા વિદ્વાનુપોદસદ ઇત્યગ્નિં વેદેતિ કમગ્નિં વેત્થેતિ શ્રોત્રમિતિ યસ્તમગ્નિં વેદ કિં સ ભવતીતિ શ્રોત્રવાન્ભવતીતિ હોવાચ નૈનં શ્રોત્રં જહાતીતિ -

વેત્થાગ્નિમિતિ હોવાચ કિમેવ મા વિદ્વાનુપોદસદ ઇત્યગ્નિં વેદેતિ કમગ્નિં વેત્થેતિ ય એતત્સર્વમગ્નિસ્તં વેદેતિ તસ્મિન્હોક્ત ઉપાવરુરોહાધીહિ ભોસ્તમગ્નિમિતિ -

સ હોવાચ પ્રાણો વાવ સોઽગ્નિર્યદા વૈ પુરુષઃ સ્વપિતિ પ્રાણં તર્હિ વાગપ્યેતિ પ્રાણં ચક્ષુઃ પ્રાણં મનઃ પ્રાણં શ્રોત્રં યદા પ્રબુધ્યતે પ્રાણાદેવાધિ પુનર્જાયન્ત ઇત્યધ્યાત્મમ્ -

અથાધિદેવતમ્ યા વૈ સા વાગગ્નિરેવ સ યત્તચ્ચક્ષુરસૌ સ આદિત્યો યત્તન્મન એષ સ ચન્દ્રમા યત્તચ્છ્રોત્રં દિશ એવ તદથ યઃ સ પ્રાણોઽયમેવ સ વાયુર્યોઽયં પવતે -

યદા વા અગ્નિરનુગચ્છતિ વાયું તર્હ્યનૂદ્વાતિ તસ્માદેનમુદવાસીદિત્યાહુર્વાયું હ્યનૂદ્વાતિ યદાદિત્યોઽસ્તમેતિ વાયું તર્હિ પ્રવિશતિ વાયું ચન્દ્રમા વાયૌ દિશઃ પ્રતિષ્ઠિતા વાયોરેવાધિ પુનર્જાયન્તે સ યદૈવંવિદસ્માલ્લોકાત્પ્રૈતિ વાચૈવાગ્નિમપ્યેતિ ચક્ષુષાઽઽદિત્યં મનસા ચન્દ્રં શ્રોત્રેણ દિશઃ પ્રાણેન વાયું સ એતન્મય એવ ભૂત્વૈતાસાં દેવતાનાં યાં યાં કામયતે સા ભૂત્વેલયતિ -