શતપથબ્રાહ્મણમ્ · અધ્યાય 10.2.4

સંવત્સરો વૈ પ્રજાપતિઃ અગ્નિરુ સર્વે કામાઃ સોઽયં સંવત્સરઃ પ્રજાપતિરકામયતાગ્ંઇષ સર્વાન્કામાનાત્માનમભિસંચિન્વીયેતિ સ એકશતધાત્માનં વ્યધત્ત સ એકશતધાત્માનં વિધાયાગ્નિં સર્વાન્કામાનાત્માનમભિસમચિનુત સ સર્વે કામા અભવત્તસ્માન્ન કશ્ચન બહિર્દ્ધા કામોઽભવત્તસ્માદાહુઃ સંવત્સરઃ સર્વે કામા ઇતિ ન હ સંવત્સરાત્કશ્ચન બહિર્દ્ધા કામોઽસ્તિ -

તથૈવૈતદ્યજમાનઃ એકશતધાઽઽત્માનં વિધાયાગ્નિં સર્વાન્કામાનાત્માનમભિસંચિનુતે સ સર્વે કામા ભવતિ તસ્માન્ન કશ્ચન બહિર્દ્ધા કામો ભવતિ -

સ યઃ સ સંવત્સરોઽસૌ સ આદિત્યઃ સ એષ એકશતવિધસ્તસ્ય રશ્મયઃ શતં વિધા એષ એવૈકશતતમો ય એષ તપત્યસ્મિન્ત્સર્વસ્મિન્પ્રતિષ્ઠિતસ્તથૈવૈતદ્યજમાન એકશતધાત્માનં વિધાયાસ્મિન્ત્સર્વસ્મિન્પ્રતિતિષ્ઠતિ -

અથ વા એકશતવિધઃ સપ્તવિધમભિસમ્પદ્યત એકશતધા વા અસાવાદિત્યો વિહિતઃ સપ્તસુ દેવલોકેષુ પ્રતિષ્ઠિતઃ સપ્ત વૈ દેવલોકાશ્ચતસ્રો દિશસ્ત્રય ઇમે લોકા એતે વૈ સપ્ત દેવલોકાસ્તેષ્વેષ પ્રતિષ્ઠિતસ્તથૈવૈતદ્યજમાન એકશતધાત્માનં વિધાય સપ્તસુ દેવલોકેષુ પ્રતિતિષ્ઠતિ -

યદ્વેવૈકશતવિધઃ સપ્તવિધમભિસમ્પદ્યત એકશતધા વા અસાવાદિત્યો વિહિતઃસપ્તસ્વૃતુષુ સપ્તસુ સ્તોમેષુ સપ્તસુ પૃષ્ઠેષુ સપ્તસુ છન્દઃસુ સપ્તસુ પ્રાણેષુ સપ્તસુ દિક્ષુ પ્રતિષ્ઠિતસ્તથૈવૈતદ્યજમાન એકશતધાત્માનં વિધાયૈતસ્મિન્ત્સર્વસ્મિન્પ્રતિતિષ્ઠતિ -

યદ્વેવૈકશતવિધઃ સપ્તવિધમભિસમ્પદ્યત એકશતધા વા અસાવાદિત્યો વિહિતઃ સપ્તાક્ષરે બ્રહ્મન્પ્રતિષ્ઠિતઃ સપ્તાક્ષરં વૈ બ્રહ્મર્ગિત્યેકમક્ષરં યજુરિતિદ્વે સામેતિ દ્વે અથ યદતોઽન્યદ્બ્રહ્મૈવ તદ્દ્વ્યક્ષરં વૈ બ્રહ્મ તદેતત્સર્વંસપ્તાક્ષરં બ્રહ્મ તસ્મિન્નેષ પ્રતિષ્ઠિતસ્તથૈવૈતદ્યજમાન એકશતધાત્માનં વિધાય સપ્તાક્ષરે બ્રહ્મન્પ્રતિતિષ્ઠતિ -

તસ્માદુ સપ્તભિઃ સપ્તભિઃ પરિશ્રયન્તિ તસ્માદેકશતવિધઃ સપ્તવિધમભિસમ્પદ્યતેઽથ વૈ સપ્તવિધ એકશતવિધમભિસમ્પદ્યતે -

સપ્તવિધો વા અગ્રે પ્રજાપતિરસૃજ્યત સ એતમેકશતધાત્માનં વિહિતમપશ્યત્પ્રાણભૃત્સુ પઞ્ચાશદિષ્ટકાઃ પઞ્ચાશદ્યજૂંષિ તચ્છતં સાદનં ચ સૂદદોહાશ્ચૈકશતતમે તત્સમાનં સાદયિત્વા હિ સૂદદોહસાઽધિવદતિ સ એતેનૈકશતવિધેનાત્મનેમાં જિતિમજયદિમાં વ્યષ્ટિં વ્યાશ્નુત તથૈવૈતદ્યજમાન એતેનૈકશતવિધેનાત્મનેમાં જિતિં જયતીમાં વ્યષ્ટિં વ્યશ્નુત એવમુ સપ્તવિધ એકશતવિધમભિસમ્પદ્યતે સ ય એવૈકશતવિધઃ સ સપ્તવિધો યઃ સપ્તવિધઃ સ એકશતવિધ ઇતિ નુ વિધાનમ્ -