શતપથબ્રાહ્મણમ્ · અધ્યાય 10.1.2

પ્રજાપતિરિમાંલ્લોકાનૈપ્સત્ સ એતં વયોવિધમાત્માનમપશ્યદગ્નિં તં વ્યધત્ત તેનેમં લોકમાપ્નોત્સ દ્વિતીયં વયોવિધમાત્માનમપશ્યન્મહાવ્રતં તદ્વ્યધત્ત તેનાન્તરિક્ષમાપ્નોત્સ તૃતીયં વયોવિધમાત્માનમપશ્યન્મહદુક્થં તદ્વ્યધત્ત તેન દિવમાપ્નોત્ -

અયં વાવ લોક એષોઽગ્નિશ્ચિતઃ અન્તરિક્ષં મહાવ્રતં દ્યૌર્મહદુક્થં તસ્માદેતાનિ સર્વાણિ સહોપેયાદગ્નિં મહાવ્રતં મહદુક્થં સહ હીમે લોકા અસૃજ્યન્ત તદ્યદગ્નિઃ પ્રથમશ્ચીયતેઽયં હ્યેષાં લોકાનાં પ્રથમોઽસૃજ્યતેત્યધિદેવતમ્ -

અથાધ્યાત્મમ્ મન એવાગ્નિઃ પ્રાણો મહાવ્રતં વાઙ્મહદુક્થં તસ્માદેતાનિ સર્વાણિ સહોપેયાત્સહ હિ મનઃ પ્રાણો વાક્તદ્યદગ્નિઃ પ્રથમશ્ચીયતે મનો હિ પ્રથમં પ્રાણાનામ્ -

આત્મૈવાગ્નિઃ પ્રાણો મહાવ્રતં વાઙ્મહદુક્થં તસ્માદેતાનિ સર્વાણિ સહોપેયાત્સહ હ્યાત્મા પ્રાણો વાક્તદ્યદગ્નિઃ પ્રથમશ્ચીયત આત્મા હિ પ્રથમઃ સમ્ભવતઃ સમ્ભવતિ -

શિર એવાગ્નિઃ પ્રાણો મહાવ્રતમાત્મા મહદુક્થં તસ્માદેતાનિ સર્વાણિ સહોપેયાત્સહ હિ શિરઃ પ્રાણ આત્મા તદ્યદગ્નિઃ પ્રથમશ્ચીયતે શિરો હિ પ્રથમં જાયમાનસ્ય જાયતે તસ્માદ્યત્રૈતાનિ સર્વાણિ સહ ક્રિયન્તે મહદેવોક્થમાતમાં ખ્યાયત આત્મા હિ મહદુક્થમ્ -

તદાહુઃ યદેતાનિ સર્વાણિ સહ દુરુપાપાનિ કૈતેષામુપાપ્તિરિતિ જ્યોતિષ્ટોમ એવાગ્નિષ્ટોમે જ્યોતિષ્ટોમેનૈવાગ્નિષ્ટોમેન યજેત -

તસ્ય વા એતસ્ય જ્યોતિષ્ટોમસ્યાગ્નિષ્ટોમસ્ય ત્રિવૃદ્બહિષ્પવમાનં તદ્વ્રતસ્ય શિરઃ પઞ્ચદશસપ્તદશા ઉત્તરૌ પવમાનૌ તૌ પક્ષૌ પઞ્ચદશં હોતુરાજ્યં સપ્તદશં પૃષ્ઠમેકવિંશં યજ્ઞાયજ્ઞિયં તત્પુચ્છમ્ -

તયોર્વા એતયોઃ પઞ્ચદશસપ્તદશયોર્દ્વાત્રિંશત્સ્તોત્રિયાસ્તતો યાઃ પઞ્ચવિંશતિઃ સ પઞ્ચવિંશ આત્માઽથ યાઃ સપ્તાતિયન્તિ તાઃ પરિમાદઃ પશવો હૈતાઃ પશવઃ પરિમાદ એતાવદ્વૈ મહાવ્રતં તદેતદત્રૈવ મહાવ્રતમાપ્નોતિ -

અથ હોતા સપ્ત છન્દાંસિ શંસતિ ચતુરુત્તરાણ્યેકર્ચાનિ વિરાડષ્ટમાનિ તેષાં તિસ્રશ્ચાશીતયોઽક્ષરાણિ પઞ્ચચત્વારિંશચ્ચ તતો યા અશીતયઃ સૈવાશીતીનામાપ્તિરશીતિભિર્હિ મહદુક્થમાખ્યાયતેઽથ યાનિ પઞ્ચચત્વારિંશત્તતો યાનિ પઞ્ચવિંશતિઃ સ પઞ્ચવિંશ આત્મા યત્ર વા આત્મા તદેવ શિરસ્તત્પક્ષપુચ્છાન્યથ યાનિ
વિંશતિસ્તદાવપનમેતાવદ્વૈ મહદુક્થં તદેતદત્રૈવ મહદુક્થમાપ્નોતિ તાનિ વા એતાનિ સર્વાણિ જ્યોતિષ્ટોમ એવાગ્નિષ્ટોમ આપ્યન્તે તસ્માદુ જ્યોતિષ્ટોમેનૈવાગ્નિષ્ટોમેન યજેત -