સેકોદ્દેશ · શ્લોક 1-20

સેકોદ્દેશઃ
ઓમ્ નમઃ કાલચક્રાય
સુચન્દ્ર આહ -
સેકઃ સપ્તવિધઃ શાસ્તસ્ત્રિવિધો ઽનુત્તરસ્તથા ।
લૌકિકોત્તરસિદ્ધ્યર્થં સંક્ષેપાત્ કથયસ્વ મે

ભગવાનાહ -
શૃણુ સુચન્દ્ર સેકાર્થં સપ્તધા ત્રિવિધં પરમ્ ।
નાડીસંચારમાયામમુદ્દેશાત્ કથયામિ તે

ઉદ્દેશસ્ત્રિવિધસ્તન્ત્રે નિર્દેશસ્ત્રિવિધો ભવેત્ ।
પ્રત્યુદ્દેશો મહોદ્દેશઃ પ્રતિનિર્દેશકો ઽપરઃ

ઉદ્દેશ એવ નિર્દેશસ્તન્ત્રસંગીતિરુચ્યતે ।
પ્રત્યુદ્દેશશ્ચ નિર્દેશઃ પઞ્જિકા પદભઞ્જિકા

મહોદ્દેશશ્ચ નિર્દેશષ્ટીકા સર્વાર્થસૂચિકા ।
અભિજ્ઞાલાભિભિઃ સા તુ કર્તવ્યા નૈવ પણ્ડિતૈઃ

એવં ષટ્કોટિભિઃ શુદ્ધં વજ્રયોગૈશ્ચતુર્વિધૈઃ ।
ચતુઃસમ્બોધિભિઃ સ્કન્ધધાત્વાયતનષટ્કુલૈઃ

પટલૈઃ પઞ્ચભિઃ શુદ્ધં લોકધાત્વાદિકૈર્મતૈઃ ।
સત્યાભ્યામાદિબુદ્ધં સ્યાત્ કાલચક્રાભિધાનકમ્

આદૌ સપ્તાભિષેકો યો બાલાનામવતારણમ્ ।
ત્રિવિધો લોકસંવૃત્યા ચતુર્થઃ પરમાર્થતઃ

સત્યદ્વયેન ધર્માણાં દેશના વજ્રિણો મમ ।
લોકસંવૃતિસત્યેન સત્યેન પરમાર્થતઃ

ઉદકં મુકુટઃ પટ્ટો વજ્રઘણ્ટા મહાવ્રતમ્ ।
નામાનુજ્ઞાસમાયુક્તઃ સેકઃ સપ્તવિધો નૃપ

કાયવાક્ચિત્તસંશુદ્ધિરભિષેકદ્વયં દ્વયમ્ ।
અનુજ્ઞા જ્ઞાનશુદ્ધિઃ સ્યાદન્યા ધાત્વાદિશુદ્ધિતઃ

ઉદકં ધાતુસંશુદ્ધિર્મૌલી સ્કન્ધવિશોધનમ્ ।
પટ્ટઃ પારમિતાશુદ્ધિર્વજ્રઘણ્ટા મહાક્ષરમ્

બુદ્ધભાષા ન વિચ્છિન્ના અર્કેન્દ્વેકત્રશોધનમ્ ।
વિષયેન્દ્રિયસંશુદ્ધિઃ સ્યાદ્વજ્રવ્રતમચ્યુતમ્

નામ મૈત્ર્યાદિશુદ્ધિઃ સ્યાદનુજ્ઞા બુદ્ધશોધનમ્ ।
એતે સપ્ત સેકા દેયા વર્તયિત્વા તુ મણ્ડલમ્

કુમ્ભો ગુહ્યાભિષેકશ્ચ પ્રજ્ઞાજ્ઞાનાભિધાનકઃ ।
પુનરેવ મહાપ્રજ્ઞા તસ્યા જ્ઞાનાભિધાનકઃ

ક્ષરઃ ક્ષરસ્તતઃ સ્પન્દો નિઃસ્પન્દશ્ચ તતો ઽપરઃ ।
કાયવાક્ચિત્તસંશુદ્ધ્યા અભિષેકત્રયં ક્રમાત્

ચતુર્થો જ્ઞાનસંશુદ્ધિઃ કાયવાક્ચિત્તશોધકઃ ।
બાલઃ પ્રૌઢસ્તથા વૃદ્ધશ્ચતુર્થસ્તુ પ્રજાપતિઃ

પ્રજ્ઞાસ્તનાઙ્ગસંસ્પર્શાદ્ બોધિચિત્તચ્યુતં સુખમ્ ।
પયોધરાભિષિક્તઃ સ બાલઃ પ્રાપ્તં યતઃ સુખમ્

ગુહ્યાસ્ફાલાચ્ચિરાજ્જાતં બોધિચિત્તચ્યુતં સુખમ્ ।
પ્રૌઢો ગુહ્યાભિષિક્તઃ સ ગુહ્યાત્ પ્રાપ્તં યતઃ સુખમ્

ગુહ્યાસ્ફાલાચ્ચિરાજ્જાતં વજ્રાગ્રે સ્પન્દતઃ સુખમ્ ।
પ્રજ્ઞાજ્ઞાનાભિષિક્તઃ સ વૃદ્ધઃ સ્પન્દં ગતો યતઃ