સર્વતથાગતતત્ત્વસંગ્રહ · અધ્યાય 9

અથાત્ર હૃદયાનિ ભવન્તિ ।
વજ્ર વજ્ર ॥
શુદ્ધ શુદ્ધ ॥
સત્વ સત્વ ॥
બુદ્ધ બુદ્ધ ॥
સર્વસિદ્ધિજ્ઞાનનિષ્પત્તયઃ ॥
અથ રહસ્યાધરણક્ષમો ભવતિ ॥
તસ્ય પ્રથમં તાવચ્છપથહૃદયં ભૂયાત્ ।
ઓં વજ્રસત્ત્વઃ સ્વયં તે ઽદ્ય હૃદયં સમવસ્થિતઃ ।
નિર્ભિદ્ય તત્ક્ષણં યાયાદ્યદિ ભૂયાદિદન્નયમ્ ॥
તત એવં વદેન્ "ન ત્વયેદં શપથહૃદયમતિક્રમિતવ્યમ્; મા તે વિષમાપરિહારેણાકાલમરણં સ્યાદ્, અનેનૈવ કાયેન નરકપતનમ્" ।
તતો રહસ્યમુદ્રાજ્ઞાનં શિક્ષયેત્ ।
વજ્રાવેશં સમુત્પાદ્ય તાલં દદ્યાત્ સમાહિતઃ ।
વજ્રાંજલિતલૈઃ સૂક્ષ્મં પર્વતો ઽપિ વશં નયેત્

વજ્રતાલમુદ્રા ॥
વજ્રાવેશવિધિં યોજ્ય વજ્રબન્ધતલૈઃ હનેત્ ।
સૂક્ષ્મતાલપ્રયોગેણ પર્વતે ઽપિ સમાવિશેત્

તથૈવાવેશવિધિના વજ્રબન્ધપ્રસારિતે ।
અગ્રાંગુલિસમાસ્ફોટાદ્ધનેત્ કુલશતં ક્ષણાત્

સૂક્ષ્માવેશવિધેર્યોગાત્સર્વાગુલિસમાહિતમ્ ।
વજ્રબન્ધવિનિર્મુક્તં સર્વદુઃખહરં પરમ્ ॥ ઇતિ