સંવિત્સિદ્ધિ (ટીકા સહિત) · અધ્યાય 3

પ્રમાણફલરૂપાયાઃ સંવિદઃ પ્રમેયતત્ત્વવ્યવસ્થાપિકાયાઃ સ્વરૂપાદિવિશોધ્યતે ઽત્ર સંવિસ્તિદ્ધૌ ।
ઇયમાદિમા સિદ્ધિત્રયે શ્લોકવાર્તિકચ્છ્લોકમાલિકારૂપા ।
તન્ત્રવાર્તિકવચ્ચાત્મેશ્વરસિદ્ધી ।
અત્ર ચોપક્રમમધ્યાવસાનેષુ ભૂયાન્ ગ્રન્થભાગો લુપ્તઃ ।
ઉપલભ્યમાનસંવિત્સિદ્ધિભાગે ચ બહુલમદ્વૈતિમતનિરાસો દૃશ્યતે ।
અદ્વૈતિનો હિ સદેવ સોમ્યેદમગ્ર આસીદેકમેવાદ્વિતીયમ્ ઇતિ કારણીભૂતસ્ય સચ્છબ્દિતસ્ય પરબ્રહ્મણો ઽદ્વિતીયત્વશ્રવણાત્ સત્યં જ્ઞાનમનન્તં બ્રહ્મે તિ જ્ઞાનમાત્રત્વશ્રવણાચ્ચ સજાતીયવિજાતીયસ્વગતભેદસામાન્યશૂન્યં બ્રહ્મૈવ ચિન્માત્રં સત્ પરમાર્થઃ, અન્યત્સર્વં તત્રૈવાવિદ્યયા પરિકલ્પિતં મિથ્યાભૂતમિત્યામનન્તિ ।
તત્રાદ્વિતીયશ્રુતેસ્તદભિમતાર્થપ્રતિપાદકત્વાસમ્ભવં વર્ણયિતુમાદૌ તન્મતમનુવદતિ એકમેવે તિ ।
યત્તદોર્નિત્યસંબન્ધાત્પૂર્વાર્ધે યદિ ત્યનુષજ્યતે ।
યત્ ઉપનિષદ્વચઃ, તદિત્યન્વયઃ ।
યદ્વા ઉત્તરાર્ધે તચ્છદ્બઃ પ્રસિદ્ધપરામર્શી ન તુ યચ્છબ્દનિર્દિષ્ટપ્રતિનિર્દેશરૂપઃ ।
તદ્બ્રહ્મેત્યત્રસદ્બ્રહ્મેતિ પાઠઃ સંભાવ્યતે ।
બ્રહ્મવાચિસત્પદવિશેષણમદ્વિતીયપદં બ્રહ્મણો ઽન્યસ્યાસત્ત્વપરમિતિ પૂર્વપક્ષિણામાશયઃ

અત્રે બ્રૂમો ઽદ્વિતીયોક્તૌ સમાસઃ કો વિવક્ષિતઃ ।
કિંસ્વિત્તત્પુરુષઃ કિં વા બહુવ્રીહિરથોચ્યતામ્