સામવેદઃ · અધ્યાય p1

અથ તૃતીયઃ પ્રપાઠકઃ
અથાતો ધન્યાનામ્

શુક્લવાસસા પ્રયોગઃ સ્નાનમવલેખનમનિષ્ઠીવનꣳ સદા ચાઞ્જનꣳ સત્યવચનꣳ સુમનસાં ધારણં કેશશ્મશ્રુલોમનખાનાં તુ નાન્યત્ર વ્રતાદ્દારાનેવોપેયાત્ કાલે । એવઁ વ્રતો યદુદીરત આ હર્યતાયેતિ વર્ગ એતેષામેકમનેકં વા સર્વાણિ વા પ્રયુઞ્જાનઃ શ્રીમાન્યશસ્વી પુષ્ટિમાન્ધન્યો ભવતિ

ગિર્વણઃ પાહિ નઃ સુતમિતિ ચૈતત્સદા પ્રયુઞ્જીત મયિ શ્રીરિતિ ચાસ્ય નિધનં કુર્ય્યાચ્છ્રીમાન્ ભવતિ

ત્રીન્વોદકાઞ્જલીન્સદાચામેદયꣳ સહસ્રમાનવ ઇત્યેતાભ્યાꣳ શ્રીરિતિ ચોત્તરસ્ય નિધનં કુર્યાચ્છ્રીમાન્ભવતિ

સક્તુમન્થં દધિમધુઘૃતમિશ્રમા ત્વા વિશન્ત્વિન્દવ ઇત્યનેન સન્નયેદા મા વિશન્ત્વિન્દવો ન મામિન્દ્રાતિરિચ્યત ઇત્યેતેન પિબેદલક્ષ્મીં નુદતે

તિષ્યેણ ઘૃતં ક્રીણીયાદાયાહિ સુષુમા હિ ત ઇત્યેતેન પિબેદલક્ષ્મીં નુદતે

ગૌરાન્ સર્ષપાꣳસ્તિષ્યેણ ચૂર્ણં કારયિત્વેન્દ્રેહિ મત્સ્યન્ધસ ઇત્યેતેન સઁયૂય તૈર્મુખં પાણી પાદૌ ચ સર્વાણિ ચાઙ્ગાનિ સર્વાꣳશ્ચ સઁશ્લેષાનુત્સાદયન્નલક્ષ્મીં નુદતે

ગૌરસર્ષપાનગ્ગ્નૌ જુહયાદ્યદ્વીડાવિન્દ્ર યત્ સ્થિર ઇત્યેતેન હિરણ્યં લભતે

વ્રીહિયવાનગ્નૌ જુહુયાત્ સુનીથો ઘા સ મર્ત્ય ઇત્યેતેન ધાન્યં લભતે

વ્રીહિયવૌ સર્પિર્મધુમિશ્રાવાસ્યેઽવધાય સપૂર્વ્યો મહોનામિત્યેતેન મનસાનુદ્રુત્યાન્તે સ્વાહાકારેણ નિગિરેદેવઁ સદા પ્રયુઞ્જાનઃ સહસ્ર લભતે

ઇમ ઉ ત્વા વિચક્ષત ઇત્યેતેનાહુતિસહસ્રં જુહુયાત્સહસ્રં લભતે

માસોપોષિતો બિલ્વાનાં દધિમધુઘૃતાક્તાનાં શ્રાયન્તીયેનાષ્ટસહસ્રં જુહુયાત્ । સિદ્ધે સૌવર્ણાન્યસિદ્ધે રાજતાનિ

નૈયગ્રોધં દન્તપવનં ઘૃતમધુલિપ્તં ગવ્યોષુણ ઇત્યેતાભ્યામનિષ્ઠીવન્ત્સંવત્સરં ભક્ષયન્ત્સહસઁ લભતે સહસઁ લભતે

ઇતિ પ્રથમઃ ખણ્ડઃ ॥૩।૧॥
3.2 ત્રિરાત્રોપોષિતો ભદ્રો નો અગ્ગ્નિરાહુત ઇત્યેતેનાહુતિસહસ્રં જુહુયાત્સહસ્રં લભતે

ઔદુમ્બરીર્વ્વા સમિધો ઘૃતાક્તાઃ સહસ્રં જુહુયાદ્ગા લભતે

વ્રીહિયવાનગ્નૌ જુહુયાદ્ધાન્યં લભતે

દ્વાદશરાત્રોપોષિતઃ એવા હ્યસિ વીરયુરિત્યેતેનાહુતિસહસ્રં જુહુયાદ્ગ્રામઁ લભત એતાઁશ્ચ સર્વાન્ કામાનવાપ્નોતિ

શ્રત્તાષ્ટકં પ્રયુઞ્જાનઃ પ્રથમેન હિરણ્યં લભતે દ્વિતીયેન ધાન્યં તૃતીયેન પશૂંશ્ચતુર્થેન પુત્રાન્ પઞ્ચમેન ગ્રામાન્ ષષ્ઠેન યશઃ સપ્તમેન બ્રહ્મવર્ચસમષ્ટમેન સ્વર્ગંલ્લોકમવાપ્નોતિ

સઁવત્સરં ગોર્ગ્રાસમાહરેદ્ગાવશ્ચિદ્ધા સમન્યવ ઇત્યેતેનાનન્ત્યાઁ વિન્દતે શ્રિયમ્

વૈરૂપાષ્ટકં નિત્યં પ્રયુઞ્જાનો લક્ષ્મીર્જુષતે

અન્ત્યં વા જાનુદઘ્ન ઉદકે તિષ્ઠન્

નાભિદઘ્ને ધાન્યં કક્ષદઘ્ને પશૂનાસ્યદઘ્ને પુત્રાન્ ગ્રામં ચ

અનપેક્ષિતો વાઽસકૃદ્ગીત્વોત્તીર્ણઃ સંહસ્રં લભતે

આહુતિસહસ્રં વા જુહુયાત્સામાન્તેષુ સ્વાહાકારૈઃ

એતેષાં કલ્પાનાઁ યથા ભૂયસ્તથા શ્રેયસ્તથા શ્રેયઃ

ઇતિ દ્વિતીયઃખણ્ડઃ॥૩।૨॥
3.3 ગાઃ પ્રકાલ્યમાનાશ્ચોપકાલ્યમાનાશ્ચ સદોપતિષ્ઠેત ગવ્યો ષુ ણ ઇત્યેતાભ્યાઁ સ્ફીયન્તે બહુલા ભવન્તિ

સદા ભોજનસ્યોપનીતસ્યાગ્રમગ્નૌ જુહુયાદગ્ને વિવસ્વદુષસ ઇતિ પૂર્વેણ બલિં ચોત્તરેણ કુર્યાદ્બહુપશુધનધાન્યો ભવતિ

અષ્ટરાત્રોપોષિતોઽમાવાસ્યાયાં નિશ્યેકવૃક્ષે ક્ષીરિણ્યરણ્યે માꣳસꣳ સુસꣳસ્કૃતમેકતૃપ્ત્યવરાર્દ્ધ્યં માણિભદ્રાયોપહરેદેષ સ્ય તે મધુમાꣳ ઇન્દ્ર સોમ ઇત્યેતેન। હિરણ્યદ્રોણં લભતે

ત્રિરાત્રોપોષિતઃ શુક્લચતુર્દશ્યાꣳ શૌનં માꣳસં પાયસઁ વોપહરેત્ ત્રિરસ્મૈ સપ્ત ધેનવો દુદુહ્રિર ઇત્યેતેન દૈવાન્પોષાન્પુષ્યતિ બહુપુરુષં ચાસ્ય ભવતિ ક્રિયાશ્ચાનેન કુરુતે

ત્રિરાત્રોપોષિતઃ કૃષ્ણચતુર્દશ્યાં મત્સ્યાનુપહરેન્મહારાજાય સઁશ્રવસ ઇતિ વર્ગેણાસુરાન્ પોષાન્ પુષ્યતિ બહુપુરુષં ચાસ્ય ભવતિ ક્રિયાશ્ચાનેન કુરુતે

અથાતો વાસ્તુશમનમ્

પ્રદક્ષિણં પ્રતિદિશં રજ્જ્વા યચ્છેદવાન્તરદેશેષુ ચ । યત્રાભિસમેયુસ્તત્રોપલિમ્પેત્ રજ્વન્તેષુ ચ શમીપલાશશ્રીપર્ણીનાં પત્રૈર્વાસ્તૂપકિરેદક્ષતૈશ્ચ સુમનોભિશ્ચ પૂર્વૈઃ પ્રોષ્ઠપદૈર્ગ્ગૃહેઽગ્ગ્નિં પ્રતિષ્ઠાપ્ય ધાનાવન્તં કરમ્ભિણમિત્યેતદ્ગીત્વા પાયસમગ્નૌ જુહુયાત્પરેષાં ચ પલાશપર્ણમધ્યેષુ બલ્યુપહારઃ પ્રજાપતયે સ્વાહેતિ મધ્ય ઉપહરેદિન્દ્રાયેતિ પુરસ્તાદ્વાયવ ઇત્યવાન્તરદેશે યમાયેતિ દક્ષિણતઃ પિતૃભ્ય ઇત્યવાન્તરદેશે વરુણાયેતિ પશ્ચાન્મહારાજાયેત્યવાન્તરદેશે સોમાયેત્યુત્તરતો મહેન્દ્રાયેત્યવાન્તરદેશે વાસુકય ઇત્યધસ્તાદૂર્ધ્વં નમો બ્રહ્મણ ઇતિ દિવિ બહુપશુધનધાન્યહિરણ્યમાયુષ્મત્પુરુષં વીરસૂઃ સુભગાવિધવસ્ત્રીકꣳ શિવં પુણ્યં વાસ્તુ ભવતિ, ચતુર્ષુ માસેષુ પ્રયોગઃ સંવત્સરે વા પુનઃ પ્રયોગઃ પુનઃ પ્રયોગઃ

ઇતિ તૃતીયઃ ખણ્ડઃ॥૩।૩॥
3.4 અથાતોઽદૃષ્ટદર્શનાનામ્

સઙ્કરાત્ સઙ્કરેવાસિનીમાવહેચ્છૂર્પેણાક્ષતાન્ગન્ધાન્સુમનસશ્ચાત્ર કૃત્વા સઁવિષ્ટઃ પ્રાક્શિરાઃ શુચૌ દેશે શિરસ્તઃ કૃત્વા ક ઇમમુહુવેત્યેતદ્ગીત્વા વાગ્યતઃ પ્રસ્વપેત્ પશ્યતિ હ

ગરગોલિકાઁ વા સમુદ્રેઽવધાયા યાહિ સુષુમા હિ ત ઇત્યેતદ્ગીત્વા વાગ્યતઃ પ્રસ્વપેત્ પશ્યતિ હ

કન્યાઁ વોપવાસયેદદૃષ્ટરજસમાદર્શં ચ અયમગ્ગ્નિઃ શ્રેષ્ઠતમ ઇત્યેતેન વ્યુષ્ટાયાઁ રાત્રાવેતેનૈવાભિગીય પરિમૃજ્ય બ્રૂયાત્ પશ્યેતિ પશ્યતિ હ

ઉદશરાવં વોપવાસયેત્ પ્ર મિત્રાય પ્રાર્ય્ગમ્ણ ઇત્યેતેન વ્યુષ્ટાયાઁ રાત્રાવેતેનૈવાભિગીય પરિમૃજ્ય બ્રૂયાત્ પશ્યેતિ પશ્યતિ હ

વંશમય્યૌ વા શલાકે ગન્ધૈઃ પ્રલિપ્ય મધ્યમેનોપવાસયેદ્ વ્યુષ્ટાયાઁ રાત્રાવેતેનૈવાભિગીય પરિમૃજ્ય બ્રહ્મચારિણૌ બ્રૂયાદ્ધારયત મિતિ સન્નમત્યોઃ સિદ્ધિં વિદ્યાત્

યષ્ટિં વાન્ત્યેન ચતુરઙ્ગુલશો નિમાયોપવાસયેત્ વ્યુષ્ટાયાઁ રાત્રાવેતેનૈવાભિગીય પરિમૃજ્ય પ્રમિણુયાદઙ્ગુલિપર્વભિઃ પૂર્યમાણેષુ સિદ્ધ્યતિ

આષાઢ્યાં પૌર્ણમાસ્યાં બીજાનિ ધારયિત્વોપવાસયેત્તુલાં ચ ઇન્દ્રમિદ્દેવતાતય ઇત્યેતેન વ્યુષ્ટાયાઁ રાત્રાવેતેનૈવાભિગીય પરિમૃજ્ય પ્રોક્ષ્ય ધારયેત યાનિ ગરીયાઁસિ તાન્યૃધ્યન્તે

અક્ષતાનાં દ્વૌ રાશી કુર્યાદ્ભાવાભાવયોરા નો વિશ્વાસુ હવ્યમિત્યેતેન વ્યુષ્ટાયાꣳ રાત્રાવેતેનૈવાભિગીય પ્રોક્ષ્ય બ્રૂયાદાલભસ્વેતિ ભાવમાલભમાને સિદ્ધ્યતિ

જ્યોતિષ્મતાઁ વિધૂમાનામઙ્ગારાણાં દ્વૌ રાશી કુર્યાદ્ યાવન્તો વા સ્યુસ્તેનાર્થિનઃ શ્રુષ્ટ્યગ્ગ્ને નવસ્ય મ ઇત્યેતેનૈનાન્ યુગપદ્ધૃતેનાભિષિઞ્ચેત્ યઃ પૂર્વઃ પ્રજ્વલિતો વિધૂમેનાર્ચિષા પ્રદક્ષિણમભિ પર્યાવર્ત્તતે સ જયતીતિ વિદ્યાત્

જ્યોતિષ્કાન્ કુર્ય્યાન્માનુષીણાં ઘૃતેન સદ્યો મથિતેન પ્ર સોમ દેવવીતય ઇત્યેતેનૈનાન્જ્વલયેદ્ યઃ પશ્ચાચ્છામ્યતિ સ ચિરં જીવતિ સ ચિરં જીવતિ

ઇતિ ચતુર્થઃ ખણ્ડઃ॥૩।૪॥
3.5 રાજાનમભિષેચયેત્તિષ્યેણ શ્રવણેન વા

વ્રીહિયવૈસ્તિલમાષૈર્દધિ મધુસુમનોજાતરૂપૈર્યશસ્વિનીભ્યો નદીભ્યઃ સમુદ્રાચ્ચોદકાન્યાહૃત્યૌદુમ્બરે ભદ્રાસને વૈયાઘ્રે ચર્મણ્યુત્તરલોમ્ન્યાસીનં જીવન્તીનાં ગવાꣳ શૃઙ્ગકોશૈરભિષિઞ્ચેદભ્રાતૃવ્ય ઇતિ રહસ્યેન

યં કામયેતૈકરાજઃ સ્યાન્નાસ્ય ચક્રં પ્રતિહન્યેતેત્યેકવૃષેણાભિષિઞ્ચેત્

અભિષેક્ત્રે દદ્યાદ્ ગ્રામવરં દાસીશતꣳ સહસ્રં તદધીનશ્ચ ભવેત

અદ્ભુતે યવદ્રોણં જુહુયાદ્વાત આ વાતુ ભેષજમિત્યેતેન શામ્યતિ હ

કૃષ્ણાꣳસ્તિલાનગ્ગ્નૌ જુહુયાત્પ્ર દૈવોદાસો અગ્ગ્નિરિત્યેતેન। નૈનં કૃતાનિ હિꣳસન્તિ તાન્યેવ પ્રતિગચ્છન્તિ

વ્રીહિયવાનગ્નૌ જુહુયાત્પઞ્ચનિધનેન વામદેવ્યેન નૈનં કૃતાનિ હિꣳસન્તિ તાન્યેવ પ્રતિગચ્છન્તિ

તામ્રરજતજાતરૂપાયસીં મુદ્રાં કારયિત્વોચ્ચા તે જાતમન્ધસ ઇતિ ચતુર્થેનાભિજુહુયાત્ સહસ્રકૃત્વઃ શતાવરં તાં મુદ્રાં દક્ષિણેન પાણિના ધારયેન્નૈનં કૃતાનિ હિꣳસન્તિ તાન્યેવ પ્રતિગચ્છન્તિ તાન્યેવ પ્રતિગચ્છન્તિ

ઇતિ પઞ્ચમઃ ખણ્ડઃ॥૩।૫॥
3.6 સઙ્ગ્રામં યુયુત્સમાનસ્યોદકમભિજુહુયાત્ સોમꣳ રાજાનઁ વરુણમિત્યેતેન। તત એનં પાયયેદ્યો રાજા ચર્ષણીનામિતિ પૂર્વેણ । યે ચાત્ર મુખ્યાઃ સ્યુસ્તાનુત્તરેણાભિષિઞ્ચેત્

અથ હૈનꣳ સંનાહયેત્ પ્ર સેનાનીરિતિ વર્ગેણ

અથાસ્ય રથં યુઞ્જ્યાદા ત્વા સહસ્રમાશતમિતિ વર્ગેણ

બૃહદ્રથન્તરાભ્યાં ચક્રે વામદેવ્યેનાધિષ્ઠાનમ્

સ ઘા તં વૃષણꣳ રથમિત્યેતેનાધિતિષ્ઠેત્ પ્રયાન્તં ચૈનમનુગાયેદિન્દ્રસ્ય નુ વીર્ય્યાણિ ઇતિ

આજિશીર્ષં ગત્વા ત્રીનિષૂનસ્યેદુ ત્વા મન્દન્તુ સોમા ઇત્યનેન જયતિ ન પરાજીયતે

સન્દર્શને ધૂમ્રાયાઃ ગોઃ સરૂપવત્સાયા ઘૃતદ્રોણં જુહુયાત્ સત્યમિત્થેતિ રહસ્યેન જયતિ ન પરાજીયતે

બાધકમયીનાꣳ સમિધાં ઘૃતાક્તાનાꣳ સહસ્રં જુહુયાદભિત્વા પૂર્વપીતય ઇતિ વષટ્કારં ચાસ્ય નિધનં કુર્યાજ્જયતિ ન પરાજીયતે

સૈધ્રકમયીનાꣳ સમિધાં ઘૃતાક્તાનાં સહસ્રં જુહુયાદભિત્યં મેષમિતીન્દ્ર ઇવ દસ્યૂꣳ પ્રમૃણ ઇતિ ચાસ્ય નિધનં કુર્યાજ્જયતિ ન પરાજીયતે

સપ્તરાત્રોપોષિતઃ સપ્તમુખ્યાનુદ્દિશ્ય સદ્યઃ પીડિતેન સર્ષપતૈલેન સપ્તહેનાહુતિસહસ્રં જુહયાત્સપ્તરાત્રાન્ન ભવન્તિ

હસ્ત્યશ્વ રથપદાતીનાં પિષ્ટમયીઃ પ્રતિકૃતીઃ કૃત્વા પિષ્ટસ્વેદꣳ સ્વેદયિત્વા સર્ષપતૈલેનાભ્યજ્ય તાસાં ક્ષુરેણાઙ્ગાન્યવદાયાગ્ગ્નૌ જુહુયાદભિ ત્વા શૂર નોનુમ ઇતિ રહસ્યેન યત્ર હીશબ્દો યાવતાં જુહોતિ સર્વે ન ભવન્તિ

ત્રિરાત્રોપોષિતઃ કૃષ્ણચતુર્દશ્યાꣳ શવાદઙ્ગારમાહૃત્ય ચતુષ્પથે બાધકમિધ્મમુપસમાધાય વૈભીતકેન સ્રુવેણ સર્ષપતૈલેનાહુતિસહસ્રં જુહુયાત્ સંમીલ્યેન યત્ર વૃશ્ચશબ્દઃ સ્યાત્તત્ર પુરુષઃ શૂલહસ્ત ઉત્તિષ્ઠતિ તં બ્રૂયાદમું જહીતિ હન્ત્યેનમ્

આમગર્ભસ્ય વા ક્ષુરેણાઙ્ગાન્યવદાય્યાગ્નૌ જુહુયાત્ કક્ષવર્ગાદ્યૈશ્ચતુર્ભિઃ સપત્નં મનસા ધ્યાયન્ત્સદ્યો ન ભવતિ સદ્યો ન ભવતિ

ઇતિ ષષ્ઠઃ ખણ્ડઃ॥૩।૬॥
3.7 અથ યઃ કામયેતામુહ્યન્ત્સર્વ્વાણ્યા જનિત્રાણિ પરિક્રામેયમિતિ મહે નો અદ્ય બોધયેત્યેતત્સદા પ્રયુઞ્જીતાન્તવેલાયાં ચૈતત્સ્મરેદમુહ્યન્ત્સર્વ્વાણ્યાજનિત્રાણિ પરિક્રામતિ

અથ યઃ કામયેત સર્વત્રાગ્નિર્મ્મે જ્વલેદિતિ સઁવત્સરꣳ શિરસાગ્ગ્નિં ધારયેદગ્ગ્ન આ યાહિ વીતય ઇતિ પ્રથમેનોપતિષ્ઠેત્ દ્વિતીયેન પરિહરેત્ તૃતીયેન પરિચરેત્ સર્વત્ર હાસ્ય જ્વલતિ યદિચ્છતિ તદ્દહતિ

અથ યઃ કામયેત પિશાચાન્ ગુણીભૂતાન્ પશ્યેયમિતિ સંવત્સરં ચતુર્થે કાલે ભુઞ્જાનઃ કપાલેન ભૈક્ષં ચરન્ પ્રાણાઃ શિશુરિત્યન્ત્યꣳ સદા સહસ્રકૃત્વ આવર્તયન્ પશ્યતિ

અયાચિતમેતેન કલ્પેન દ્વિતીયં પ્રયુઞ્જાનઃ પિતૄન્ પશ્યતિ

સઁવત્સરમષ્ટમે કાલે ભુઞ્જાનઃ પાણિભ્યાં પાત્રાર્થં કુર્વાણો વૃત્રસ્ય ત્વા શ્વસથાદીષમાણારિત્યેતયોઃ પૂર્વꣳ સદા સહસ્રકૃત્વ આવર્તયન્ ગન્ધર્વાપ્સરસઃ પશ્યતિ

અયાચિતમેતેન કલ્પેન દ્વિતીયં પ્રયુઞ્જાનો દેવાન્ પશ્યતિ

યદ્વર્ચ્ચ ઇતિ દિશાઁવ્રતં દશાનુગાનમેતેન કલ્પેન ચત્વારિ વર્ષાણિ પ્રયુઞ્જીત નિધયોઽસ્ય પ્રકાશન્તે યે દૈવાસ્તાઁસ્તેન

માસમુપવસેદેકમેકમયાચિતં ભુઞ્જીત મયિ વર્ચ ઇત્યેતેન કલ્પેન ચત્વારિ વર્ષાણિ પ્રયુઞ્જીત નિધયોઽસ્ય પ્રકાશન્તે યે પૃથિવ્યામ્

અષ્ટરાત્રોપોષિતોઽમાવાસ્યાયાં મુખ આજ્યં કૃત્વાગ્ગ્નિં નર ઇત્યેતયોઃ પૂર્વં મનસાનુદ્રુત્યાન્તે સ્વાહાકારેણાગ્ગ્નૌ જુહુયાત્ વ્યુષ્ટાયાઁ રાત્રૌ ભૂતૌ પશ્યતિ પઞ્ચ હાસ્ય કાર્ષાપણા ભવન્તિ વ્યયકૃતાશ્ચ પુનરાયન્તિ મૂલમશૂન્યં કુર્યાત્

ગવાં પ્રવિશન્તીનાઁ યા પશ્ચાત્ સ્યાત્તસ્યાઃ શિરોઽભ્યનુમૃજ્ય પુચ્છમનુમૃજ્ય પાણી સꣳહૃત્યાનઙ્ગમેજયસ્તિષ્ઠેત્ સર્વ્વાꣳ રાત્રિં દ્વિતીયમાવર્તયન્। જમ્ભકા હાસ્ય સાર્વકામિકા ભવન્તિ। સાર્વકામિકા ભવન્તિ

ઇતિ સપ્તમઃ ખણ્ડઃ॥૩।૭॥
3.8 અથ યઃ કામયેત પુનર્ન પ્રત્યાજાયેયમિતિ

રાત્રિં પ્રપદ્યે પુનર્ભૂમ્મયોભૂઙ્કન્યાꣳ શિખણ્ડિનીં પાશહસ્તાઁ યુવતિં કુમારિણીમાદિત્યશ્ચક્ષુષે વાતઃ પ્રાણાય સોમો ગન્ધાયાપઃ સ્નેહાય મનોઽનુજ્ઞાય પૃથિવ્યૈ શરીરમ

સા હૈનમુવાચાસ્મિન્ન્સઁવત્સરે મરિષ્યસ્યસ્મિન્નયનેઽસ્મિન્નૃતાવસ્મિન્માસેઽર્ધમાસેઽસ્મિન્ દ્વાદશરાત્રેઽસ્મિન્ ષડ્રાત્રેઽસ્મિꣳસ્ત્રિરાત્રેઽસ્મિન્ દ્વિરાત્રેઽસ્મિન્નહોરાત્રે ઽસ્મિન્નહન્યસ્યાꣳ રાત્રાવસ્યાઁ વેલાયામસ્મિન્મુહર્તે મરિષ્યસ્યેહિ સ્વર્ગ્ગંલ્લોકં ગચ્છ દેવલોકઁ વા બ્રહ્મલોકઁ વા ક્ષત્રલોકઁ વા વિરોચમાનસ્તિષ્ઠ વિરોચમાનામેહિ યોનિં પ્રવિશ

નાહઁ યોનિં પ્રવેક્ષ્યામિ ભૂતોત્તમાયા બ્રહ્મણો દુહિતુઃ સꣳરાગવસ્ત્રાયા જાયતે મ્રિયતે સન્ધીયતે ચ

રાત્રિસ્તુ મા પુનાતુ રાત્રિઃ ખમેતત્ પુષ્પાન્તં યત્પુરાણમાકાશં તત્ર મે સ્થાનં કુર્વપુનર્ભવાયા પુનર્જન્મન એતાવદેવ રાત્રૌ રાત્રેર્વ્રતં ચ રાત્રેર્વ્રતં ચ

ઇત્યષ્ટમઃ ખણ્ડઃ ॥
3.9 ચતુરો માસાન્ પયોભક્ષો ગા અનુ ગત્વારણ્યે શુચૌ દેશે મઠં કૃત્વા તત્ર પ્રવિશેત્ કમણ્ડલુમુદકોપસ્પર્શનાર્થમાદાય ત્રીન્સપ્તરાત્રાનનુદક ઉપવસન્નૃચꣳ સામ યજામહ ઇત્યેતયોઃ પૂર્વꣳ સદા સહસ્રકૃત્વ આવર્તયન યદિ દેવતાઃ પશ્યતિ સિદ્ધં તદિત્યથોત્થાનમન્તરિક્ષ્યા હાસ્ય સિદ્ધા ભવત્યન્તરિક્ષક્રમણં ચ દ્વારાણિ ચાસ્ય વિવ્લીયન્તે

દ્વિતીયમેતેન કલ્પેન પ્રયુઞ્જાનઃ કામચારી મનોજવા ભવતિ

શુક્લાનુપવસેત્ સર્વાન્ કાલાન્મૃષ્ટઃ શુક્લવાસાશ્ચન્દનેનાનુલિપ્તઃ સુમનસો ધારયꣳ
સ્ત્યમૂષુ પૂર્વꣳ સદા સહસ્રકૃત્વ આવર્તયન્ યે માનુષાઃ કામાસ્તાનવાપ્નોતિ

દ્વિતીયમેતેન કલ્પેન પ્રયુઞ્જાનો યે દૈવાસ્તાꣳસ્તેન

માસમુપવસેદેકમેકમયાચિતં ભુઞ્જીત મયિ વર્ચ ઇત્યેતેન કલ્પેન ચત્વારિ વર્ષાણિ પ્રયુઞ્જાનસ્ત્રયાણાઁ લોકાનામાધિપત્યં ગચ્છતિ વ્યૃદ્ધાવપ્યસ્યૈકસ્ય

અથ યાન્યનાદિષ્ટકામકલ્પાનિ તેષાઁ યથાશ્રુતિ સ્મૃતિલિઙ્ગૈઃ કામા: ક્ષુરસઁયુક્તાઃ

આભિપ્રાયિકં કર્મ

સોઽયં પ્રાજાપત્યો વિધિસ્તમિમં પ્રજાપતિર્બૃહસ્પતયે પ્રોવાચ બૃહસ્પતિર્ન્નારદાય નારદો વિષ્વક્સેનાય વિષ્વક્સેનો વ્યાસાય પારાશર્ય્યાય વ્યાસઃ પારાશર્યો જૈમિનયે જૈમિનિ: પૌષ્પિઞ્જ્યાય પૌષ્પિઞ્જ્યઃ પારાશર્યાયાયણાય પારાશર્યામિયણો બાદરાયણાય બાદરાયણસ્તાણ્ડિશાટ્યાયનિભ્યાં તાણ્ડિશાટ્યાયનિનૌ બહુભ્યઃ

સોઽયમનૂચાનાય બ્રહ્મચારિણે સમાવર્ત્તમાનાયાખ્યેય:

ઉપાધ્યાયાય ગ્રામવરꣳ સહસ્રꣳ શ્વેતં ચાશ્વં પ્રદાયાનુજ્ઞાતો વા યં કામં કામયતે તમાપ્નોતિ તમાપ્નોતિ

ઇતિ નવમ: ખણ્ડ: ॥૩।૯॥ ઇતિ તૃતીયઃ પ્રપાઠકઃ॥
ઇતિ તૃતીયં સામવિધાનબ્રાહ્મણમ્