ઋગ્વેદ · અધ્યાય 6.075

જીમૂતસ્યેવ ભવતિ પ્રતીકં યદ્ વર્મી યાતિ સમદામ્ ઉપસ્થે ।
અનાવિદ્ધયા તન્વા જય ત્વં સ ત્વા વર્મણો મહિમા પિપર્તુ ॥

ધન્વના ગા ધન્વનાજિં જયેમ ધન્વના તીવ્રાઃ સમદો જયેમ ।
ધનુઃ શત્રોર્ અપકામં કૃણોતિ ધન્વના સર્વાઃ પ્રદિશો જયેમ ॥

વક્ષ્યન્તીવેદ્ આ ગનીગન્તિ કર્ણમ્ પ્રિયં સખાયમ્ પરિષસ્વજાના ।
યોષેવ શિઙ્ક્તે વિતતાધિ ધન્વઞ્ જ્યા ઇયં સમને પારયન્તી ॥

તે આચરન્તી સમનેવ યોષા માતેવ પુત્રમ્ બિભૃતામ્ ઉપસ્થે ।
અપ શત્રૂન્ વિધ્યતાં સંવિદાને આર્ત્ની ઇમે વિષ્ફુરન્તી અમિત્રાન્ ॥

બહ્વીનામ્ પિતા બહુર્ અસ્ય પુત્રશ્ ચિશ્ચા કૃણોતિ સમનાવગત્ય ।
ઇષુધિઃ સઙ્કાઃ પૃતનાશ્ ચ સર્વાઃ પૃષ્ઠે નિનદ્ધો જયતિ પ્રસૂતઃ ॥

રથે તિષ્ઠન્ નયતિ વાજિનઃ પુરો યત્ર-યત્ર કામયતે સુષારથિઃ ।
અભીશૂનામ્ મહિમાનમ્ પનાયત મનઃ પશ્ચાદ્ અનુ યચ્છન્તિ રશ્મયઃ ॥

તીવ્રાન્ ઘોષાન્ કૃણ્વતે વૃષપાણયો ઽશ્વા રથેભિઃ સહ વાજયન્તઃ ।
અવક્રામન્તઃ પ્રપદૈર્ અમિત્રાન્ ક્ષિણન્તિ શત્રૂઁર્ અનપવ્યયન્તઃ ॥

રથવાહનં હવિર્ અસ્ય નામ યત્રાયુધં નિહિતમ્ અસ્ય વર્મ ।
તત્રા રથમ્ ઉપ શગ્મં સદેમ વિશ્વાહા વયં સુમનસ્યમાનાઃ ॥

સ્વાદુષંસદઃ પિતરો વયોધાઃ કૃચ્છ્રેશ્રિતઃ શક્તીવન્તો ગભીરાઃ ।
ચિત્રસેના ઇષુબલા અમૃધ્રાઃ સતોવીરા ઉરવો વ્રાતસાહાઃ ॥

બ્રાહ્મણાસઃ પિતરઃ સોમ્યાસઃ શિવે નો દ્યાવાપૃથિવી અનેહસા ।
પૂષા નઃ પાતુ દુરિતાદ્ ઋતાવૃધો રક્ષા માકિર્ નો અઘશંસ ઈશત ॥

સુપર્ણં વસ્તે મૃગો અસ્યા દન્તો ગોભિઃ સંનદ્ધા પતતિ પ્રસૂતા ।
યત્રા નરઃ સં ચ વિ ચ દ્રવન્તિ તત્રાસ્મભ્યમ્ ઇષવઃ શર્મ યંસન્ ॥

ઋજીતે પરિ વૃઙ્ધિ નો ઽશ્મા ભવતુ નસ્ તનૂઃ ।
સોમો અધિ બ્રવીતુ નો ઽદિતિઃ શર્મ યચ્છતુ ॥

આ જઙ્ઘન્તિ સાન્વ્ એષાં જઘનાઁ ઉપ જિઘ્નતે ।
અશ્વાજનિ પ્રચેતસો ઽશ્વાન્ સમત્સુ ચોદય ॥

અહિર્ ઇવ ભોગૈઃ પર્ય્ એતિ બાહું જ્યાયા હેતિમ્ પરિબાધમાનઃ ।
હસ્તઘ્નો વિશ્વા વયુનાનિ વિદ્વાન્ પુમાન્ પુમાંસમ્ પરિ પાતુ વિશ્વતઃ ॥

આલાક્તા યા રુરુશીર્ષ્ણ્ય્ અથો યસ્યા અયો મુખમ્ ।
ઇદમ્ પર્જન્યરેતસ ઇષ્વૈ દેવ્યૈ બૃહન્ નમઃ ॥

અવસૃષ્ટા પરા પત શરવ્યે બ્રહ્મસંશિતે ।
ગચ્છામિત્રાન્ પ્ર પદ્યસ્વ મામીષાં કં ચનોચ્ છિષઃ ॥

યત્ર બાણાઃ સમ્પતન્તિ કુમારા વિશિખા ઇવ ।
તત્રા નો બ્રહ્મણસ્ પતિર્ અદિતિઃ શર્મ યચ્છતુ વિશ્વાહા શર્મ યચ્છતુ ॥

મર્માણિ તે વર્મણા છાદયામિ સોમસ્ ત્વા રાજામૃતેનાનુ વસ્તામ્ ।
ઉરોર્ વરીયો વરુણસ્ તે કૃણોતુ જયન્તં ત્વાનુ દેવા મદન્તુ ॥

યો નઃ સ્વો અરણો યશ્ ચ નિષ્ટ્યો જિઘાંસતિ ।
દેવાસ્ તં સર્વે ધૂર્વન્તુ બ્રહ્મ વર્મ મમાન્તરમ્ ॥