ઋગ્વેદ · અધ્યાય 5.051

અગ્ને સુતસ્ય પીતયે વિશ્વૈર્ ઊમેભિર્ આ ગહિ ।
દેવેભિર્ હવ્યદાતયે ॥

ઋતધીતય આ ગત સત્યધર્માણો અધ્વરમ્ ।
અગ્નેઃ પિબત જિહ્વયા ॥

વિપ્રેભિર્ વિપ્ર સન્ત્ય પ્રાતર્યાવભિર્ આ ગહિ ।
દેવેભિઃ સોમપીતયે ॥

અયં સોમશ્ ચમૂ સુતો ઽમત્રે પરિ ષિચ્યતે ।
પ્રિય ઇન્દ્રાય વાયવે ॥

વાયવ્ આ યાહિ વીતયે જુષાણો હવ્યદાતયે ।
પિબા સુતસ્યાન્ધસો અભિ પ્રયઃ ॥

ઇન્દ્રશ્ ચ વાયવ્ એષાં સુતાનામ્ પીતિમ્ અર્હથઃ ।
તાઞ્ જુષેથામ્ અરેપસાવ્ અભિ પ્રયઃ ॥

સુતા ઇન્દ્રાય વાયવે સોમાસો દધ્યાશિરઃ ।
નિમ્નં ન યન્તિ સિન્ધવો ઽભિ પ્રયઃ ॥

સજૂર્ વિશ્વેભિર્ દેવેભિર્ અશ્વિભ્યામ્ ઉષસા સજૂઃ ।
આ યાહ્ય્ અગ્ને અત્રિવત્ સુતે રણ ॥

સજૂર્ મિત્રાવરુણાભ્યાં સજૂઃ સોમેન વિષ્ણુના ।
આ યાહ્ય્ અગ્ને અત્રિવત્ સુતે રણ ॥

સજૂર્ આદિત્યૈર્ વસુભિઃ સજૂર્ ઇન્દ્રેણ વાયુના ।
આ યાહ્ય્ અગ્ને અત્રિવત્ સુતે રણ ॥

સ્વસ્તિ નો મિમીતામ્ અશ્વિના ભગઃ સ્વસ્તિ દેવ્ય્ અદિતિર્ અનર્વણઃ ।
સ્વસ્તિ પૂષા અસુરો દધાતુ નઃ સ્વસ્તિ દ્યાવાપૃથિવી સુચેતુના ॥

સ્વસ્તયે વાયુમ્ ઉપ બ્રવામહૈ સોમં સ્વસ્તિ ભુવનસ્ય યસ્ પતિઃ ।
બૃહસ્પતિં સર્વગણં સ્વસ્તયે સ્વસ્તય આદિત્યાસો ભવન્તુ નઃ ॥

વિશ્વે દેવા નો અદ્યા સ્વસ્તયે વૈશ્વાનરો વસુર્ અગ્નિઃ સ્વસ્તયે ।
દેવા અવન્ત્વ્ ઋભવઃ સ્વસ્તયે સ્વસ્તિ નો રુદ્રઃ પાત્વ્ અંહસઃ ॥

સ્વસ્તિ મિત્રાવરુણા સ્વસ્તિ પથ્યે રેવતિ ।
સ્વસ્તિ ન ઇન્દ્રશ્ ચાગ્નિશ્ ચ સ્વસ્તિ નો અદિતે કૃધિ ॥

સ્વસ્તિ પન્થામ્ અનુ ચરેમ સૂર્યાચન્દ્રમસાવ્ ઇવ ।
પુનર્ દદતાઘ્નતા જાનતા સં ગમેમહિ ॥