ઋગ્વેદ · અધ્યાય 3.026

વૈશ્વાનરમ્ મનસાગ્નિં નિચાય્યા હવિષ્મન્તો અનુષત્યં સ્વર્વિદમ્ ।
સુદાનું દેવં રથિરં વસૂયવો ગીર્ભી રણ્વં કુશિકાસો હવામહે ॥

તં શુભ્રમ્ અગ્નિમ્ અવસે હવામહે વૈશ્વાનરમ્ માતરિશ્વાનમ્ ઉક્થ્યમ્ ।
બૃહસ્પતિમ્ મનુષો દેવતાતયે વિપ્રં શ્રોતારમ્ અતિથિં રઘુષ્યદમ્ ॥

અશ્વો ન ક્રન્દઞ્ જનિભિઃ સમ્ ઇધ્યતે વૈશ્વાનરઃ કુશિકેભિર્ યુગે-યુગે ।
સ નો અગ્નિઃ સુવીર્યં સ્વશ્વ્યં દધાતુ રત્નમ્ અમૃતેષુ જાગૃવિઃ ॥

પ્ર યન્તુ વાજાસ્ તવિષીભિર્ અગ્નયઃ શુભે સમ્મિશ્લાઃ પૃષતીર્ અયુક્ષત ।
બૃહદુક્ષો મરુતો વિશ્વવેદસઃ પ્ર વેપયન્તિ પર્વતાઁ અદાભ્યાઃ ॥

અગ્નિશ્રિયો મરુતો વિશ્વકૃષ્ટય આ ત્વેષમ્ ઉગ્રમ્ અવ ઈમહે વયમ્ ।
તે સ્વાનિનો રુદ્રિયા વર્ષનિર્ણિજઃ સિંહા ન હેષક્રતવઃ સુદાનવઃ ॥

વ્રાતં-વ્રાતં ગણં-ગણં સુશસ્તિભિર્ અગ્નેર્ ભામમ્ મરુતામ્ ઓજ ઈમહે ।
પૃષદશ્વાસો અનવભ્રરાધસો ગન્તારો યજ્ઞં વિદથેષુ ધીરાઃ ॥

અગ્નિર્ અસ્મિ જન્મના જાતવેદા ઘૃતમ્ મે ચક્ષુર્ અમૃતમ્ મ આસન્ ।
અર્કસ્ ત્રિધાતૂ રજસો વિમાનો ઽજસ્રો ઘર્મો હવિર્ અસ્મિ નામ ॥

ત્રિભિઃ પવિત્રૈર્ અપુપોદ્ ધ્ય્ અ1ર્કં હૃદા મતિં જ્યોતિર્ અનુ પ્રજાનન્ ।
વર્ષિષ્ઠં રત્નમ્ અકૃત સ્વધાભિર્ આદ્ ઇદ્ દ્યાવાપૃથિવી પર્ય્ અપશ્યત્ ॥

શતધારમ્ ઉત્સમ્ અક્ષીયમાણં વિપશ્ચિતમ્ પિતરં વક્ત્વાનામ્ ।
મેળિમ્ મદન્તમ્ પિત્રોર્ ઉપસ્થે તં રોદસી પિપૃતં સત્યવાચમ્ ॥