ઋગ્વેદ · અધ્યાય 10.078

વિપ્રાસો ન મન્મભિઃ સ્વાધ્યો દેવાવ્યો3 ન યજ્ઞૈઃ સ્વપ્નસઃ ।
રાજાનો ન ચિત્રાઃ સુસંદૃશઃ ક્ષિતીનાં ન મર્યા અરેપસઃ ॥

અગ્નિર્ ન યે ભ્રાજસા રુક્મવક્ષસો વાતાસો ન સ્વયુજઃ સદ્યઊતયઃ ।
પ્રજ્ઞાતારો ન જ્યેષ્ઠાઃ સુનીતયઃ સુશર્માણો ન સોમા ઋતં યતે ॥

વાતાસો ન યે ધુનયો જિગત્નવો ઽગ્નીનાં ન જિહ્વા વિરોકિણઃ ।
વર્મણ્વન્તો ન યોધાઃ શિમીવન્તઃ પિતૄણાં ન શંસાઃ સુરાતયઃ ॥

રથાનાં ન યે1 ઽરાઃ સનાભયો જિગીવાંસો ન શૂરા અભિદ્યવઃ ।
વરેયવો ન મર્યા ઘૃતપ્રુષો ઽભિસ્વર્તારો અર્કં ન સુષ્ટુભઃ ॥

અશ્વાસો ન યે જ્યેષ્ઠાસ આશવો દિધિષવો ન રથ્યઃ સુદાનવઃ ।
આપો ન નિમ્નૈર્ ઉદભિર્ જિગત્નવો વિશ્વરૂપા અઙ્ગિરસો ન સામભિઃ ॥

ગ્રાવાણો ન સૂરયઃ સિન્ધુમાતર આદર્દિરાસો અદ્રયો ન વિશ્વહા ।
શિશૂલા ન ક્રીળયઃ સુમાતરો મહાગ્રામો ન યામન્ન્ ઉત ત્વિષા ॥

ઉષસાં ન કેતવો ઽધ્વરશ્રિયઃ શુભંયવો નાઞ્જિભિર્ વ્ય્ અશ્વિતન્ ।
સિન્ધવો ન યયિયો ભ્રાજદૃષ્ટયઃ પરાવતો ન યોજનાનિ મમિરે ॥

સુભાગાન્ નો દેવાઃ કૃણુતા સુરત્નાન્ અસ્માન્ સ્તોતૄન્ મરુતો વાવૃધાનાઃ ।
અધિ સ્તોત્રસ્ય સખ્યસ્ય ગાત સનાદ્ ધિ વો રત્નધેયાનિ સન્તિ ॥