રેવાખાણ્ડ (સંશોધિત પાઠ) · અધ્યાય 62

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે શક્રેશ્વરતીર્થમાહાત્મ્યવર્ણનં નામૈકષષ્ટિતમો ઽધ્યાયઃ ॥
ર્ક્વ્ અધ્યાય 62
શ્રીમાર્કણ્ડેય ઉવાચ:
તતો ગચ્છેત્તુ રાજેન્દ્ર કરોડીશ્વરમ્ ઉત્તમમ્ ।
યત્ર વૈ નિહતાસ્તાત દાનવાઃ સપદાનુગાઃ

ઇન્દ્રાદિદેવૈઃ સંહૃષ્ટૈઃ સતતં જયબુદ્ધિભિઃ ।
તેષાં યે પુત્રપૌત્રાશ્ચ પૂર્વવૈરમ્ અનુસ્મરમ્

ક્રુદ્ધૈર્દેવસમૂહૈશ્ચ દાનવા નિહતા રણે ।
તેષાં શિરાંસિ સંગૃહ્ય સર્વે દેવાઃ સવાસવાઃ

નિક્ષિપ્ય નર્મદાતોયે બન્ધુભાવમ્ અનુસ્મરમ્ ।
તત્ર સ્નાત્વા સુરાઃ સર્વે સ્થાપયિત્વા ઉમાપતિમ્

ઇન્દ્રેણ સહિતાઃ સર્વે ઽપૂજયંલ્લોકસિદ્ધયે ।
હૃષ્ટચિત્તાઃ સુરાઃ સર્વે જગ્મુરાકાશમણ્ડલમ્

દાનવાનાં મહાભાગ સૂદિતા કોટિરુત્તમા ।
તદા પ્રભૃતિ તત્તીર્થં કરોડીતિ મહીતલે

વિખ્યાતં તુ તદા લોકે પાપઘ્નં પાણ્ડુનન્દન ।
અષ્ટમ્યાં ચ ચતુર્દશ્યામ્ ઉભૌ પક્ષૌ ચ ભક્તિતઃ ।
ઉપોષ્ય શૂલિનશ્ચાગ્રે રાત્રૌ કુર્વીત જાગરમ્

સત્કથાપાઠસંયુક્તો વેદાધ્યયનસંયુતઃ ।
પ્રભાતે વિમલે પ્રાપ્તે પૂજયેત્ ત્રિદશેશ્વરમ્

પઞ્ચામૃતેન સંસ્નાપ્ય શ્રીખણ્ડેન ચ ગુણ્ઠયેત્ ।
શસ્તૈઃ પલ્લવપુષ્પૈશ્ચ પૂજયેત્તુ પ્રયત્નતઃ

બહુરૂપં જપન્મન્ત્રં દક્ષિણાશાં વ્યવસ્થિતઃ ।
યથોક્તેન વિધાનેન નાભિમાત્રે જલે ક્ષિપેત્

તિલાઞ્જલિં તુ પ્રેતાય દક્ષિણાશામ્ ઉપસ્થિતઃ ।
શ્રાદ્ધં તત્રૈવ વિપ્રાય કારયેદ્ વિજિતેન્દ્રિયઃ

વિષમૈરગ્રજાતૈશ્ચ વેદાભ્યસનતત્પરૈઃ ।
ગોહિરણ્યેન સમ્પૂજ્ય તામ્બૂલૈર્ભોજનૈસ્તથા

ભૂષણૈઃ પાદુકાભિશ્ચ બ્રાહ્મણાન્પાણ્ડુનન્દન ।
ભવેત્કોટિગુણં તસ્ય નાત્ર કાર્યા વિચારણા

તસ્મિંસ્ તીર્થે તુ યઃ કશ્ચિત્ ત્યજેદ્ દેહં વિધાનતઃ ।
તસ્ય ભવતિ યત્પુણ્યં તચ્છૃણુષ્વ નરાધિપ

યાવદસ્થીનિ તિષ્ઠન્તિ મર્ત્યસ્ય નર્મદાજલે ।
તાવદ્વસતિ ધર્માત્મા શિવલોકે સુદુર્લભે

તતઃ કાલાચ્ચ્યુતસ્તસ્માદિહ માનુષતાં ગતઃ ।
કોટિધનપતિઃ શ્રીમાઞ્જાયતે રાજપૂજિતઃ

સર્વધર્મસમાયુક્તો મેધાવી બીજપુત્રકઃ ।
વિખ્યાતો વસુધાપૃષ્ઠે દીર્ઘાયુર્માનવો ભવેત્

પુનઃ સ્મરતિ તત્તીર્થં તત્ર ગત્વા નૃપોત્તમ ।
કરોડેશ્વરમભ્યર્ચ્ય પ્રાપ્નોતિ પરમાં ગતિમ્

ઇન્દ્રચન્દ્રયમૈર્ રુદ્રૈરાદિત્યૈર્વસુભિસ્તથા ।
વિશ્વેદેવૈસ્તથા સર્વૈઃ સ્થાપિતસ્ત્રિદશેશ્વરઃ

રેવાયા ઉત્તરે કૂલે લોકાનાં હિતકામ્યયા ।
માનવો ભક્તિસંયુક્તઃ પ્રાસાદં કારયેત્તુ યઃ

તસ્મિંસ્તીર્થે નરશ્રેષ્ઠ સદ્ગતિં સમવાપ્નુયાત્ ।
ન્યાયોપાત્તધનેનૈવ દારુપાષાણકેષ્ટકૈઃ

બ્રાહ્મણઃ ક્ષત્રિયૈર્વૈશ્યૈઃ શૂદ્રૈઃ સ્ત્રીભિશ્ચ શક્તિતઃ ।
તે ઽપિ યાન્તિ નરા લોકે શાંકરે સુરપૂજિતે

યઃ શૃણોતિ સદા ભક્ત્યા માહાત્મ્યં તીર્થજં નૃપ ।
તસ્ય પાપં પ્રણશ્યેત ષણ્માસાભ્યન્તરં ચ યત્