રેવાખાણ્ડ (સંશોધિત પાઠ) · અધ્યાય 198

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે મૂલસ્થાનતીર્થમાહાત્મ્યવર્ણનં નામ સપ્તનવત્યુત્તરશતતમો ઽધ્યાયઃ ॥
ર્ક્વ્ અધ્યાય 198
માર્કણ્ડેય ઉવાચ:
તતો ગચ્છેન્મહીપાલ ભદ્રકાલીતિસઙ્ગમમ્ ।
શૂલતીર્થમિતિ ખ્યાતં સ્વયં દેવેન નિર્મિતમ્

પઞ્ચાયતનમધ્યે તુ તિષ્ઠતે પરમેશ્વરઃ ।
શૂલપાણિર્મહાદેવઃ સર્વદેવતપૂજિતઃ

સ સઙ્ગમો નૃપશ્રેષ્ઠ નિત્યં દેવૈર્નિષેવિતઃ ।
દર્શનાત્તસ્ય તીર્થસ્ય સ્નાનદાનાદ્વિશેષતઃ

દૌર્ભાગ્યં દુર્નિમિત્તં ચ હ્યભિશાપો નૃપગ્રહઃ ।
યદન્યદ્દુષ્કૃતં કર્મ નશ્યતે શઙ્કરો ઽબ્રવીત્

યુધિષ્ઠિર ઉવાચ:
કથં શૂલેશ્વરી દેવી કથં શૂલેશ્વરો હરઃ ।
પ્રથિતો નર્મદાતીરે એતદ્વિસ્તરતો વદ

માર્કણ્ડેય ઉવાચ:
બભૂવ બ્રાહ્મણઃ કશ્ચિન્માણ્ડવ્ય ઇતિ વિશ્રુતઃ ।
વૃત્તિમાન્સર્વધર્મજ્ઞઃ સત્યે તપસિ ચ સ્થિતઃ

અશોકાશ્રમમધ્યસ્થો વૃક્ષમૂલે મહાતપાઃ ।
ઊર્ધ્વબાહુર્મહાતેજાસ્તસ્થૌ મૌનવ્રતાન્વિતઃ

તસ્ય કાલેન મહતા તીવ્રે તપસિ વર્તતઃ ।
તમાશ્રમમનુપ્રાપ્તા દસ્યવો લોપ્ત્રહારિણઃ

અનુસર્પ્યમાણા બહુભિઃ પુરુષૈર્ ભરતર્ષભ ।
તે તસ્યાવસથે લોપ્ત્રં ન્યદધુઃ કુરુનન્દન

નિધાય ચ તદા લીનાસ્તત્રૈવાશ્રમમણ્ડલે ।
તેષુ લીનેષ્વથો શીઘ્રં તતસ્ તદ્રક્ષિણાં બલમ્

આજગામ તતો ઽપશ્યંસ્તમ્ ઋષિં તસ્કરાનુગાઃ ।
તમપૃચ્છંસ્તદા વૃત્તં રક્ષિણસ્તં તપોધનમ્

વદ કેન પથા યાતા દસ્યવો દ્વિજસત્તમ ।
તેન ગચ્છામહે બ્રહ્મન્ યથા શીઘ્રતરં વયમ્

તથા તુ વચનં તેષાં બ્રુવતાં સ તપોધનઃ ।
ન કિંચિદ્ વચનં રાજન્નવદત્સાધ્વસાધુ વા

તતસ્તે રાજપુરુષા વિચિન્વન્તસ્તમાશ્રમમ્ ।
સંયમ્યૈનં તતો રાજ્ઞે સર્વાન્ દસ્યૂન્ ન્યવેદયન્

તં રાજા સહિતૈશ્ ચોરૈર્ અન્વશાદ્ વધ્યતામ્ ઇતિ ।
સમ્બધ્ય તં ચ તૈર્ રાજઞ્છૂલે પ્રોતો મહાતપાઃ

તતસ્તે શૂલમારોપ્ય તં મુનિં રક્ષિણસ્તદા ।
પ્રતિજગ્મુર્ મહીપાલ ધનાન્યાદાય તાન્યથ

શૂલસ્થઃ સ તુ ધર્માત્મા કાલેન મહતા તદા ।
ધ્યાયન્દેવં ત્રિલોકેશં શઙ્કરં તમુમાપતિમ્

બહુકાલં મહેશાનં મનસાધ્યાય સંસ્થિતઃ ।
નિરાહારો ઽપિ વિપ્રર્ષિર્મરણં નાભ્યપદ્યત

ધારયામાસ વિપ્રાણામ્ ઋષભઃ સ હૃદા હરિમ્ ।
શૂલાગ્રે તપ્યમાનેન તપસ્તેન કૃતં તદા

સન્તાપં પરમં જગ્મુઃ શ્રુત્વૈતન્ મુનયો ઽખિલાઃ ।
તે રાત્રૌ શકુના ભૂત્વા સંન્યવર્તન્ત ભારત

દર્શયન્તો મુનેઃ શક્તિં તમપૃચ્છન્ દ્વિજોત્તમમ્ ।
શ્રોતુમ્ ઇચ્છામ તે બ્રહ્મન્ કિં પાપં કૃતવાનસિ

શ્રીમાર્કણ્ડેય ઉવાચ:
તતઃ સ મુનિશાર્દૂલસ્ તાન્ ઉવાચ તપોધનાન્ ।
દોષતઃ કિં ગમિષ્યામિ ન હિ મે ઽન્યો પરાધ્યતિ

એવમુક્ત્વા તતઃ સર્વાન્ આચચક્ષે તતો મુનિઃ ।
મુનયશ્ચ તતો રાજ્ઞે દ્વિતીયે ઽહ્નિ ન્યવેદયન્

રાજા તુ તમૃષિં શ્રુત્વા નિષ્ક્રાન્તઃ સહ બન્ધુભિઃ ।
પ્રસાદયામાસ તદા શૂલસ્થમ્ ઋષિસત્તમમ્

રાજોવાચ:
યન્મયા ઽપકૃતં તાત તવાજ્ઞાનવશાદ્બહુ ।
પ્રસાદયે ત્વાં તત્રાહં ન મે ત્વં ક્રોદ્ધુમ્ અર્હસિ

એવમુક્તસ્ તતો રાજ્ઞા પ્રસાદમ્ અકરોન્ મુનિઃ ।
કૃતપ્રસાદં રાજા તં તતઃ સમવતારયત્

અવતીર્યમાણસ્તુ મુનિઃ શૂલે માંસત્વમ્ આગતે ।
અતિસંપીડિતો વિપ્રઃ શઙ્કરં મનસાગમત્

સંધ્યાતઃ શઙ્કરસ્ તેન બહુકાલોપવાસતઃ ।
પ્રાદુર્ભૂતો મહાદેવઃ શૂલં તસ્ય તથાછિનત્

શૂલમૂલસ્થિતઃ શમ્ભુસ્તુષ્ટઃ પ્રાહ પુનઃપુનઃ ।
બ્રૂહિ કિં ક્રિયતાં વિપ્ર સત્ત્વસ્થાનપરાયણ

અદેયમપિ દાસ્યામિ તુષ્ટો ઽસ્મ્યદ્યોમયા સહ ।
કિં તુ સત્યવતાં લોકે સિદ્ધિર્ન સ્યાચ્ચ ભૂયસી

સ્વકર્મણો ઽનુરૂપં હિ ફલં ભુઞ્જન્તિ જન્તવઃ ।
શુભેન કર્મણા ભૂતિર્દુઃખં સ્યાત્ પાતકેન તુ

બહુભેદપ્રભિન્નં તુ મનુષ્યેષુ વિપચ્યતે ।
કેષાં દરિદ્રભાવેન કેષાં ધનવિપત્તિજમ્

સન્તત્યભાવજં કેષાં કેષાંચિત્ તદ્વિપર્યયઃ ।
તથા દુર્વૃત્તિતસ્તેષાં ફલમાવિર્ભવેન્ નૃણામ્

કેષાંચિત્પુત્રમરણે વિયોગાત્ પ્રિયમિત્રયોઃ ।
રાજચૌરાગ્નિતઃ કેષાં દુઃખં સ્યાદ્દૈવનિર્મિતમ્

તચ્છરીરે તુ કેષાંચિત્કર્મણા સમ્પ્રદૃશ્યતે ।
જરાશ્ચ વિવિધાઃ કેષાં દૃશ્યન્તે વ્યાધયસ્ તથા

દૃશ્યન્તે ચાભિશાપાશ્ચ પૂર્વકર્માનુસંચિતાઃ ।
કષ્ટાઃ કષ્ટતરાવસ્થા ગતાઃ કેચિદ્ અનાગસઃ

પૂર્વકર્મવિપાકેન ધર્મેણ તપસિ સ્થિતાઃ ।
દાન્તાઃ સ્વદારનિરતા ભૂરિદાઃ પરિપૂજકાઃ

હ્રીમન્તો નયસંયુક્તા અન્યે બહુગુણૈર્ યુતાઃ ।
દુર્ગમામાપદં પ્રાપ્ય નિજકર્મસમુદ્ભવામ્

ન સંજ્વરન્તિ યે મર્ત્યા ધર્મનિન્દાં ન કુર્વતે ।
ઇદમેવ તપો મત્વા ક્ષિપન્તિ સુવિચેતસઃ

હા ભ્રાતર્માતઃ પુત્રેતિ કષ્ટેષુ ન વદન્તિ યે ।
સ્મરન્તિ માં મહેશાનમથવા પુષ્કરેક્ષણમ્

દુષ્કૃતં પૂર્વજં ભોક્તું ધ્રુવં તદુપશામ્યતિ

દિનાનિ યાવન્તિ વસેત્સ કષ્ટે યથાકૃતં ચિન્તયદ્ દેવમીશમ્ ।
તાવન્તિ સૌમ્યાનિ કૃતાનિ તેન ભવન્તિ વિપ્ર શ્રુતિનોદનૈષા

યસ્માત્ત્વયા કષ્ટગતેન નિત્યં સ્મૃતશ્ચાહં મનસા પૂજિતશ્ચ ।
ગૌરીસહાયસ્તેન ઇહાગતો ઽસ્મિ બ્રૂહ્યદ્ય કૃત્યં ક્રિયતાં કિં નુ વિપ્ર

માણ્ડવ્ય ઉવાચ:
તુષ્ટો યદ્યુમયા સાર્ધં વરદો યદિ શઙ્કર ।
તદા મે શૂલસંસ્થસ્ય સંશયં પરમં વદ

ન રુજા મમ કાપિ સ્યાચ્છૂલસંપ્રોતિતે ઽગકે ।
અમૃતસ્રાવિ તચ્છૂલં પ્રભાવાત્ કસ્ય શંસ મે

શ્રીશૂલપાણિર્ ઉવાચ:
શૂલસ્થેન ત્વયા વિપ્ર મનસા ચિન્તિતો ઽસ્મિ યત્ ।
અનયાનાં નિહન્તાહં દુઃખાનાં વિનિબર્હણઃ

ધ્યાતમાત્રો હ્યહં વિપ્ર પાતાલે વાપિ સંસ્થિતઃ ।
શૂલમૂલે ત્વહં શમ્ભુરગ્રે દેવી સ્વયં સ્થિતા ।
જગન્માતામ્બિકા દેવી ત્વામૃતેનાન્વપૂરયત્

માણ્ડવ્ય ઉવાચ:
પૂર્વમેવ સ્થિતો યસ્માચ્છૂલં વ્યાપ્યોમયા સહ ।
પ્રસાદપ્રવણો મહ્યમિદાનીં ચાનયા સહ

યસ્યાઃ સંસ્મરણાદ્ એવ દૌર્ભાગ્યં પ્રલયં વ્રજેત્ ।
ન દૌર્ભાગ્યાત્ પરં લોકે દુઃખાદ્દુઃખતરં કિલ

કિલૈવં શ્રૂયતે ગાથા પુરાણેષુ સુરોત્તમ ।
ત્રૈલોક્યં દહતસ્ તુભ્યં સૌભાગ્યમેકતાં ગતમ્

વિષ્ણોર્વક્ષઃસ્થલં પ્રાપ્ય તત્સ્થિતં ચેતિ નઃ શ્રુતમ્ ।
પીતં તદ્વક્ષસસ્ત્રસ્તદક્ષેણ પરમેષ્ઠિના

તસ્માત્ સતીતિ સંજજ્ઞ ઇયમિન્દીવરેક્ષણા ।
યજતસ્તસ્ય દેવેશ તવ માનાવખણ્ડનાત્

જુહાવાગ્નૌ તુ સા દેવી હ્યાત્માનં પ્રાણસંજ્ઞિકમ્ ।
આત્માનં ભસ્મસાત્કૃત્વા પ્રાલેયાદ્રેસ્તતઃ સુતા

મેનકાયાં પ્રભો જાતા સામ્પ્રતં યા હ્યુમાભિધા ।
અનાદિનિધના દેવી હ્યપ્રતર્ક્યા સુરેશ્વર

યદિ તુષ્ટો ઽસિ દેવેશ હ્યુમા મે વરદા યદિ ।
ઉભાવપ્યત્ર વૈ સ્થાને સ્થિતૌ શૂલાગ્રમૂલયોઃ

અવતારો યત્ર તત્ર સંસ્થિતિં વૈ તતઃ કુરુ

શ્રીમાર્કણ્ડેય ઉવાચ:
તેનૈવમુક્તે સહસા કૃત્વા ભૂમણ્ડલં દ્વિધા ।
નિઃસૃતૌ શૂલમૂલાગ્રાલ્લિઙ્ગાર્ચાપ્રતિરૂપિણૌ

પ્રદ્યોતયદ્દિશઃ સર્વા લિઙ્ગં મૂલે પ્રદૃશ્યતે ।
વામતઃ પ્રતિમા દેવી તદા શૂલેશ્વરી સ્થિતા

વિલોભયન્તી ચ જગદ્ભાતિ પૂરયતી દિશઃ ।
દૃષ્ટ્વા કૃતાઞ્જલિપુટઃ સ્તુતિં ચક્રે દ્વિજોત્તમઃ

માણ્ડવ્ય ઉવાચ:
ત્વમસ્ય જગતો માતા જગત્સૌભાગ્યદેવતા ।
ન ત્વયા રહિતં કિંચિદ્ બ્રહ્માણ્ડે ઽસ્તિ વરાનને

પ્રસાદં કુરુ ધર્મજ્ઞે મમ ત્વાજ્ઞપ્તુમ્ અર્હસિ ।
ઈદૃશેનૈવ રૂપેણ કેષુ સ્થાનેષુ તિષ્ઠસિ ।
પ્રસાદપ્રવણા ભૂત્વા વદ તાનિ મહેશ્વરિ

શ્રીદેવ્યુવાચ:
સર્વગા સર્વભૂતેષુ દ્રષ્ટવ્યા સર્વતો ભુવિ ।
સર્વલોકેષુ યત્કિંચિદ્વિહિતં ન મયા વિના

તથાપિ યેષુ સ્થાનેષુ દ્રષ્ટવ્યા સિદ્ધિમ્ ઈપ્સુભિઃ ।
સ્મર્તવ્યા ભૂતિકામેન તાનિ વક્ષ્યામિ તત્ત્વતઃ

વારાણસ્યાં વિશાલાક્ષી નૈમિષે લિઙ્ગધારિણી ।
પ્રયાગે લલિતા દેવી કામુકા ગન્ધમાદને

માનસે કુમુદા નામ વિશ્વકાયા તથા ઽપરે ।
ગોમન્તે ગોમતી નામ મન્દરે કામચારિણી

મદોત્કટા ચૈત્રરથે હયન્તી હાસ્તિને પુરે ।
કાન્યકુબ્જે સ્થિતા ગૌરી રમ્ભા હ્યમલપર્વતે

એકામ્રકે કીર્તિમતી વિશ્વાં વિશ્વેશ્વરે વિદુઃ ।
પુષ્કરે પુરુહૂતા ચ કેદારે માર્ગદાયિની

નન્દા હિમવતઃ પ્રસ્થે ગોકર્ણે ભદ્રકર્ણિકા ।
સ્થાનેશ્વરે ભવાની તુ બિલ્વકે બિલ્વપત્ત્રિકા

શ્રીશૈલે માધવી નામ ભદ્રે ભદ્રેશ્વરીતિ ચ ।
જયા વરાહશૈલે તુ કમલા કમલાલયે

રુદ્રકોટ્યાં તુ કલ્યાણી કાલી કાલઞ્જરે તથા ।
મહાલિઙ્ગે તુ કપિલા માકોટે મુકુટેશ્વરી

શાલિગ્રામે મહાદેવી શિવલિઙ્ગે જલપ્રિયા ।
માયાપુર્યાં કુમારી તુ સંતાને લલિતા તથા

ઉત્પલાક્ષી સહસ્રાક્ષે હિરણ્યાક્ષે મહોત્પલા ।
ગયાયાં વિમલા નામ મઙ્ગલા પુરુષોત્તમે

વિપાશાયામમોઘાક્ષી પાટલા પુણ્ડ્રવર્ધને ।
નારાયણી સુપાર્શ્વે તુ ત્રિકૂટે ભદ્રસુન્દરી

વિપુલે વિપુલા નામ કલ્યાણી મલયાચલે ।
કોટવી કોટિતીર્થેષુ સુગન્ધા ગન્ધમાદને

ગોદાશ્રમે ત્રિસન્ધ્યા તુ ગઙ્ગાદ્વારે રતિપ્રિયા ।
શિવચણ્ડે સભાનન્દા નન્દિની દેવિકાતટે

રુક્મિણી દ્વારવત્યાં તુ રાધા વૃન્દાવને વને ।
દેવકી મથુરાયાં તુ પાતાલે પરમેશ્વરી

ચિત્રકૂટે તથા સીતા વિન્ધ્યે વિન્ધ્યનિવાસિની ।
સહ્યાદ્રાવેકવીરા તુ હરિશ્ચન્દ્રે તુ ચણ્ડિકા

રમણા રામતીર્થે તુ યમુનાયાં મૃગાવતી ।
કરવીરે મહાલક્ષ્મી રૂપાદેવી વિનાયકે

આરોગ્યા વૈદ્યનાથે તુ મહાકાલે મહેશ્વરી ।
અભયેત્યુષ્ણતીર્થે તુ મૃગી વા વિન્ધ્યકન્દરે

માણ્ડવ્યે માણ્ડુકી નામ સ્વાહા માહેશ્વરે પુરે ।
છાગલિઙ્ગે પ્રચણ્ડા તુ ચણ્ડિકામરકણ્ટકે

સોમેશ્વરે વરારોહા પ્રભાસે પુષ્કરાવતી ।
વેદમાતા સરસ્વત્યાં પારા પારાતટે મુને

મહાલયે મહાભાગા પયોષ્ણ્યાં પિઙ્ગલેશ્વરી ।
સિંહિકા કૃતશૌચે તુ કર્તિકે ચૈવ શાંકરી

ઉત્પલાવર્તકે લોલા સુભદ્રા શોણસઙ્ગમે ।
મતા સિદ્ધવટે લક્ષ્મીસ્ તરંગા ભારતાશ્રમે

જાલન્ધરે વિશ્વમુખી તારા કિષ્કિન્ધપર્વતે ।
દેવદારુવને પુષ્ટિર્મેધા કાશ્મીરમણ્ડલે

ભીમાદેવી હિમાદ્રૌ તુ પુષ્ટિર્વસ્ત્રેશ્વરે તથા ।
કપાલમોચને શુદ્ધિર્માતા કાયાવરોહણે

શઙ્ખોદ્ધારે ધ્વનિર્નામ ધૃતિઃ પિણ્ડારકે તથા ।
કાલા તુ ચન્દ્રભાગાયામચ્છોદે શક્તિધારિણી

વેણાયામમૃતા નામ બદર્યામુર્વશી તથા ।
ઓષધી ચોત્તરકુરૌ કુશદ્વીપે કુશોદકા

મન્મથા હેમકૂટે તુ કુમુદે સત્યવાદિની ।
અશ્વત્થે વન્દિનીકા તુ નિધિર્વૈશ્રવણાલયે

ગાયત્રી વેદવદને પાર્વતી શિવસન્નિધૌ ।
દેવલોકે તથેન્દ્રાણી બ્રહ્માસ્યે તુ સરસ્વતી

સૂર્યબિમ્બે પ્રભા નામ માત્ઃણાં વૈષ્ણવી મતા ।
અરુન્ધતી સતીનાં તુ રામાસુ ચ તિલોત્તમા

ચિત્રે બ્રહ્મકલા નામ શક્તિઃ સર્વશરીરિણામ્ ।
શૂલેશ્વરી ભૃગુક્ષેત્રે ભૃગૌ સૌભાગ્યસુન્દરી

એતદુદ્દેશતઃ પ્રોક્તં નામાષ્ટશતમુત્તમમ્ ।
અષ્ટોત્તરં ચ તીર્થાનાં શતમેતદ્ ઉદાહૃતમ્

ઇદમેવ પરં વિપ્ર સર્વેષાં તુ ભવિષ્યતિ ।
પઠત્યષ્ટોત્તરશતં નામ્નાં યઃ શિવસન્નિધૌ

સ મુચ્યતે નરઃ પાપૈઃ પ્રાપ્નોતિ સ્ત્રિયમીપ્સિતામ્ ।
સ્નાત્વા નારી તૃતીયાયાં માં સમભ્યર્ચ્ય ભક્તિતઃ

ન સા સ્યાદ્દુઃખિની જાતુ મત્પ્રભાવાન્નરોત્તમ ।
નિત્યં મદ્દર્શને નારી નિયતાયા ભવિષ્યતિ

પતિપુત્રકૃતં દુઃખં ન સા પ્રાપ્સ્યતિ કર્હિચિત્ ।
મદાલયે તુ યા નારી તુલાપુરુષસંજ્ઞિતમ્

સમ્પૂજ્ય મણ્ડયેદ્ દેવાંલ્લોકપાલાંશ્ચ સાગ્નિકાન્ ।
સપત્નીકાન્દ્વિજાન્પૂજ્ય વાસોભિર્ ભૂષણૈસ્ તથા

ભૂતેભ્યસ્ તુ બલિં દદ્યાદૃત્વિગ્ભિઃ સહ દેશિકઃ ।
તતઃ પ્રદક્ષિણીકૃત્ય તુલામિત્યભિમન્ત્રયેત્

શુચિરક્તામ્બરો વા સ્યાદ્ ગૃહીત્વા કુસુમાઞ્જલિમ્ ।
નમસ્તે સર્વદેવાનાં શક્તિસ્ત્વં પરમા સ્થિતા

સાક્ષિભૂતા જગદ્ધાત્રી નિર્મિતા વિશ્વયોનિના ।
ત્વં તુલે સર્વભૂતાનાં પ્રમાણમિહ કીર્તિતા

કરાભ્યાં બદ્ધમુષ્ટિભ્યામાસ્તે પશ્યન્નુમામુખમ્ ।
તતો ઽપરે તુલાભાગેન્યસેયુર્ દ્વિજપુંગવાઃ

દ્રવ્યમષ્ટવિધં તત્ર હ્યાત્મવિત્તાનુસારતઃ ।
મન્દશભૂતે વિપ્રેન્દ્ર પૃથિવ્યાં યદધિષ્ઠિતમ્

સુવર્ણં ચૈવ નિષ્પાવાંસ્તથા રાજિકુસુમ્ભકમ્ ।
તૃણરાજેન્દુલવણં કુઙ્કુમં તુ તથાષ્ટમમ્

એષામેકતમં કુર્યાદ્ યથા વિત્તાનુસારતઃ ।
સામ્યાદભ્યધિકં યાવત્ કાઞ્ચનાદિ ભવેદ્દ્વિજ

તાવત્તિષ્ઠેન્નરો નારી પશ્ચાદિદમુદીરયેત્ ।
નમો નમસ્તે લલિતે તુલાપુરુષસંજ્ઞિતે

ત્વમુમે તારયસ્વાસ્માનસ્માત્સંસારકર્દમાત્ ।
તતો ઽવતીર્ય મુરવે પૂર્વમર્દ્ધં નિવેદયેત્

ઋત્વિગ્ભ્યો ઽપરમર્દ્ધં ચ દદ્યાદુદકપૂર્વકમ્ ।
તેભ્યો લબ્ધા તતો ઽનુજ્ઞાં દદ્યાદ્ અન્યેષુ ચાર્થિષુ

સપત્નીકં ગુરું રક્તવાસસી પરિધાપયેત્ ।
અન્યાંશ્ચ ઋત્વિજઃ શક્ત્યા ગુરું કેયૂરકઙ્કણૈઃ

શુક્લાં ગાં ક્ષીરિણીં દદ્યાલ્લલિતા પ્રીયતામિતિ ।
અનેન વિધિના યા તુ કુર્યાન્નારી મમાલયે

મત્તુલ્યા સા ભવેદ્રાજ્ઞાં તેજસા શ્રીરિવામલા ।
સાવિત્રીવ ચ સૌન્દર્યે જન્માનિ દશ પઞ્ચ ચ

શ્રીમાર્કણ્ડેય ઉવાચ:
એવં નિશમ્ય વચનં ગૌર્યા દ્વિજવરોત્તમઃ ।
નમસ્કૃત્ય જગામાશુ ધર્મરાજ નિવેશનમ્

તદા પ્રભૃતિ તત્તીર્થં ખ્યાતં શૂલેશ્વરીતિ ચ ।
તસ્મિંસ્તીર્થે તુ યઃ સ્નાત્વા તર્પયેત્પિતૃદેવતાઃ

બ્રાહ્મણાન્ અન્નવાસોભિઃ પિણ્ડૈઃ પિતૃપિતામહાન્ ।
ભક્તોપહારૈર્દેવેશમુમયા સહ શઙ્કરં

ધૂપગુગ્ગુલદાનૈશ્ચ દીપદાનૈઃ સુબોધિતૈઃ ।
સર્વપાપવિનિર્મુક્તઃ સ ગચ્છેચ્છિવસન્નિધિમ્

તસ્મિંસ્તીર્થે તુ યઃ કશ્ચિદ્ અભિયુક્તો નરેશ્વર ।
અમ્ભિશાપિ તથા સ્નાતસ્ત્રિદિનં મુચ્યતે નરઃ

કૃષ્ણપક્ષે ચતુર્દશ્યાં રાત્રૌ જાગર્તિ યો નરઃ ।
ઉપવાસપરઃ શુદ્ધઃ શિવં સમ્પૂજયેન્નરઃ ।
પ્રમુચ્ય પાપસંમોહં રુદ્રલોકં સ ગચ્છતિ

ત્રિનેત્રશ્ચ ચતુર્બાહુઃ સાક્ષાદ્રુદ્રો ઽપરઃ ।
ક્રીડતે દેવકન્યાભિર્યાવચ્ચન્દ્રાર્કતારકમ્