રેવાખાણ્ડ (સંશોધિત પાઠ) · અધ્યાય 18

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે શ્રીનર્મદામાહાત્મ્યે દ્વાદશાદિત્યરૂપેણ જગત્સંહરણવર્ણનં નામ સપ્તદશો ઽધ્યાયઃ ॥
ર્ક્વ્ અધ્યાય 18
શ્રીમાર્કણ્ડેય ઉવાચ:
નિર્દગ્ધે ઽસ્મિંસ્તતો લોકે સૂર્યૈરીશ્વરસમ્ભવૈઃ ।
સપ્તભિશ્ચાર્ણવૈઃ શુષ્કૈર્દ્વીપૈઃ સપ્તભિરેવ ચ

તતો મુખાત્ તસ્ય ઘના મહોલ્બણા નિશ્ચેરુરિન્દ્રાયુધતુલ્યરૂપાઃ ।
ઘોરાઃ પયોદા જગદન્ધકારં કુર્વન્ત ઈશાનવરપ્રયુક્તાઃ

નીલોત્પલાભાઃ ક્વચિદંજનાભા ગોક્ષીરકુન્દેન્દુનિભાશ્ચ કેચિત્ ।
મયૂરચન્દ્રાકૃતયસ્ તથા ઽન્યે કેચિદ્વિધૂમાનલસપ્રભાશ્ચ

કેચિન્મહાપર્વતકલ્પરૂપાઃ કેચિન્મહામીનકુલોપમાશ્ચ ।
કેચિદ્ગજેન્દ્રાકૃતયઃ સુરૂપાઃ કેચિન્મહાકૂટનિભાઃ પયોદાઃ

ચલત્તરઙ્ગોર્મિસમાનરૂપા મહાપુરોધાનનિભાશ્ચ કેચિત્ ।
સગોપુરાટ્ટાલકસંનિકાશાઃ સવિદ્યુદુલ્કાશનિમણ્ડિતાન્તાઃ

સમાવૃતાઙ્ગઃ સ બભૂવ દેવઃ સંવર્તકોનામ ગણઃ સ રૌદ્રઃ ।
પ્રવર્ષમાણો જગદપ્રમાણમેકાર્ણવં સર્વમિદં ચકાર

તતો મહામેઘવિવર્ધમાનમ્ ઈશાનમ્ ઇન્દ્રાશનિભિર્ વૃતાઙ્ગમ્ ।
દદર્શ નાહં ભયવિહ્વલાઙ્ગો ગઙ્ગાજલૌઘૈશ્ચ સમાવૃતાઙ્ગઃ

ગજાઃ પુનશ્ચૈવ પુનઃ પિબન્તો જગત્ સમન્તાત્ પરિદહ્યમાનમ્ ।
આપૂરિતં ચૈવ જગત્ સમન્તાત્ સર્વૈશ્ચ તૈર્જગ્મુરદર્શનં ચ તે

મહાર્ણવાઃ સપ્ત સરાંસિ દ્વીપા નદ્યો ઽથ સર્વા અથ ભૂર્ભુવશ્ચ ।
આપૂર્યમાણાઃ સલિલૌઘજાલૈર્ એકાર્ણવં સર્વમિદં બભૂવ

ન દૃશ્યતે કિંચિદહો ચરાચરં નિરગ્નિચન્દ્રાર્કમયે ઽપિ લોકે ।
પ્રણષ્ટનક્ષત્રતમોઽન્ધકારે પ્રશાન્તવાતાસ્તમિતૈકનીડેઃ

મહાજલૌઘે ઽસ્ય વિશુદ્ધસત્ત્વા સ્તુતિર્મયા ભૂપ કૃતા તદાનીમ્ ।
તતોઽહમિત્યેવ વિચિન્તયાનઃ શરણ્યમ્ એકં ક્વ નુ યામિ શાન્તમ્

સ્મરામિ દેવં હૃદિ ચિન્તયિત્વા પ્રભું શરણ્યં જલસંનિવિષ્ટઃ ।
નમામિ દેવં શરણં પ્રપદ્યે ધ્યાનં ચ તસ્યેતિ કૃતં મયા ચ

ધ્યાત્વા તતો ઽહં સલિલં તતાર તસ્ય પ્રસાદાદવિમૂઢચેતાઃ ।
ગ્લાનિઃ શ્રમશ્ચૈવ મમ પ્રણષ્ટૌ દેવ્યાઃ પ્રસાદેન નરેન્દ્રપુત્ર