રસપ્રકાશસુધાકર · અધ્યાય 13

શ્રીવાસમસ્તકીનાગ કેસરં ચ લવંગકમ્
કંકોલં તુલસીબીજં ખુરાસાન્યહીફેનકમ્ ॥

જાવિત્રિકાબ્ધિશોષં ચ કરભાગુરુકુંકુમમ્
કઙ્કોલકતુગાક્ષીરી જાતીફલસમાંશકાન્ ॥

સર્વાણ્યેવં વિચૂર્ણ્યાથ નાલિકેરોદરે ક્ષિપેત્
દુગ્ધમધ્યે વિપાચ્યૈનં દિનાન્યેવં હિ પઞ્ચ ચ ॥

નાલિકેરફલાદ્ગ્રાહ્યં મર્દયેન્મધુના સહ
ગુટિકા કોલમાત્રા હિ ભક્ષણીયા નિશામુખે ॥

વીર્યસ્તંભં કરોત્યુગ્રં ચતુર્યામાવધિં તથા ॥

લવંગં શુદ્ધકર્પૂરં જાતીપત્રં ફલં તથા
કુઙ્કુમં સ્વર્ણબીજં ચ ધૂર્તપર્ણં પ્રસૂનકમ્ ॥

મૂલં ત્વક્ ચાબ્ધિશોષસ્ય સર્વાણ્યેકત્ર મર્દયેત્
ગોદુગ્ધે શોધનીયં ચ ભાગમેકં પ્રકલ્પયેત્ ॥

ભૃઙ્ગીપત્ત્રભવં ચૂર્ણં ભાગૈકં સ્વર્ણગૈરિકમ્
ભાવનાં પોસ્તતોયેન એકવિંશતિસંખ્યયા ॥

કારયેન્મતિમાન્ વૈદ્યઃ શુક્રસ્તંભકરીં વટીમ્ ॥

જાતીફલાર્કકરહાટલવઙ્ગશુણ્ઠીકઙ્કોલકેશરકણાહરિચન્દનાનિ એતૈઃ સમાનમહિફેનમનેન ચાભ્રં શ્વેતં નિધાય મધુના વટકાન્ વિદધ્યાત્
માષદ્વયોન્મિતમમું નિશિ ભક્ષયિત્વા મૃષ્ટં પયસ્તદનુ માહિષમાશુ પીત્વા કુર્વન્તુ કામુકજનાઃ પ્રતિરુદ્ધપાતાશ્ચેતાંસિ તાનિ ચકિતાનિ કલાવતીનામ્ ॥

સ્કન્ધદેશાચ્ચ સંજાતં વીર્યં દર્દુરસંભવમ્
ઘનસારેણ સંયુક્તં કરહાટસ્ય ચૂર્ણકમ્ ॥

સંમર્દ્ય કારયેચ્ચૂર્ણં વટીં મુદ્ગપ્રમાણકામ્
સંઘર્ષ્ય મુખતોયેન લિંગલેપં પ્રકારયેત્ ॥

યામાર્ધં ધારયેદ્બિન્દું સત્યં ગુરુવચો યથા ॥

પોસ્તકં પલમેકં વૈ શુંઠીકર્ષઃ સિતા પલૈકા ચ ।
કર્ષમિતા ત્વક્પયસા પીતં રેતો ધ્રુવં ધત્તે ॥

શ્રીગઙ્ગાધરભક્તિસક્તમનસો વિદ્યાવિનોદામ્બુધેઃ શ્રીગોડાન્વયપદ્મનાભસુધિયસ્ તસ્યાત્મજેનાપ્યયમ્
સદ્વૈદ્યેન યશોધરેણ કવિના વિદ્વજ્જનાનન્દકૃદ્ ગ્રન્થોઽયં ગ્રથિતઃ કરોતુ સતતં સૌખ્યં સતાં માનસે ॥

દેશાનાં સુરરાષ્ટ્રમ્ ઉત્તમતમં તત્રાપિ જીર્ણાભિધઃ પ્રાકારોઽસ્તિ સ વેદશાસ્ત્રનિરતૈર્વિપ્રૈશ્ચ સંશોભિતઃ
તસ્મિન્ શંભુપદારવિન્દરતિકૃચ્છ્રીપદ્મનાભઃ સ્વયમ્ તત્પુત્રેણ યશોધરેણ કવિના ગ્રંથઃ સ્વયં નિર્મિતઃ ॥

સંબોધાય સતાં સુખાય સરુજાં શિષ્યાર્થસંસિદ્ધયે વૈદ્યાનામુપજીવનાય વિદુષામ્ ઉદ્વેગનાશાય વૈ
શ્રીમદ્દુર્ગપુરાતને ઽતિનિપુણઃ શ્રીપદ્મનાભાત્મજઃ શ્રીમદ્ભટ્ટયશોધરઃ કવિવરો ગ્રન્થઃ સ્વયં નિર્મમે ॥