રામોદન્ત · શ્લોક 101*-120*

તતો માલ્યવતઃ પૃષ્ઠે રામો લક્ષ્મણસંયુતઃ
ઉવાસ ચતુરો માસાન્ સીતાવિરહદુઃખિતઃ ॥

અથ રામસ્ય નિર્દેશાલ્ લક્ષ્મણો વાનરાધિપમ્
આનયત્ પ્લવગૈઃ સાર્ધં હનૂમત્પ્રમુખૈર્ ગિરિમ્ ॥

સુગ્રીવો રાઘવં દૃષ્ટ્વા વચનાત્ તસ્ય વાનરાન્
ન્યયુઙ્ક્ત સીતામ્ અન્વેષ્ટુમ્ આશાસુ ચતસૃષ્વ્ અપિ ॥

તતો હનુમતઃ પાણૌ દદૌ રામો ઽઙ્ગુલીયકમ્
વિશ્વાસાય તુ વૈદેહ્યાસ્ તદ્ ગૃહીત્વા સ નિર્યયૌ ॥

તતો હનૂમત્પ્રમુખા વાનરા દક્ષિણાં દિશમ્
ગત્વા સીતાં વિચિન્વન્તઃ પર્વતં વિન્ધ્યમ્ આપ્નુવન્ ॥

સમયાતિક્રમાત્ તત્ર ચક્રુઃ પ્રાયોપવેશનમ્
તે ઽત્ર સમ્પાતિના પ્રોક્તાં સીતાવાર્ત્તાં ચ શુશ્રુવુઃ ॥

તતઃ પ્રાપુર્ ઉદન્વન્તમ્ અઙ્ગદાદ્યાઃ પ્લવઙ્ગમાઃ
તં વિલઙ્ઘયિતું તેષાં ન કશ્ ચિદ્ અભવત્ ક્ષમઃ ॥

સ્વપ્રભાવપ્રશંસાભિસ્ તદા જામ્બવદુક્તિભિઃ
સંવર્ધિતો મહેન્દ્રાદ્રિમ્ આરુરોહાનિલાત્મજઃ ॥

અભિવન્દ્યાથ સકલાન્ અમરાન્ પવનાત્મજઃ
પુપ્લુવે ચ ગિરેસ્ તસ્માદ્ વિલઙ્ઘયિતુમ્ અર્ણવમ્ ॥

સ સમુલ્લઙ્ઘ્ય મૈનાકં સુરસામ્ અભિવન્દ્ય ચ
નિહત્ય સિંહિકાં નીત્યા પારં પ્રાપ મહોદધેઃ ॥

લઙ્કાધિદેવતાં જિત્વા તાં પ્રવિશ્યાનિલાત્મજઃ
સીતાં વિચિન્વન્ન્ અદ્રાક્ષીન્ નિદ્રાણં નિશિ રાવણં ॥

અપશ્યંસ્ તત્ર વૈદેહીં વિચિન્વાનસ્ તતસ્ તતઃ
અશોકવનિકાં ગત્વા કાં ચિદ્ આર્તાં દદર્શ સઃ ॥

પાદપં કં ચિદ્ આરુહ્ય તત્પલાશૈઃ સુસંવૃતઃ
આસ્તે સ્મ મારુતિસ્ તત્ર સીતેયમ્ ઇતિ તર્કયન્ ॥

રાવણસ્ તુ તદાભ્યેત્ય મૈથિલીં મદનાર્દિતઃ
ભાર્યા ભવ મમેત્ય્ એવં બહુધા સમયાચત ॥

અહં ત્વદ્વશગા ન સ્યામ્ ઇત્ય્ એષા તં નિરાકરોત્
કામમન્યુપરીતાત્મા રાવણો ઽપિ તદા યયૌ ॥

નિર્ગતે રાવણે સીતાં પ્રલપન્તીં સ મારુતિઃ
ઉક્ત્વા રામસ્ય વૃત્તાન્તં પ્રદદૌ ચાઙ્ગુલીયકમ્ ॥

તત્ સમાદાય વૈદેહી વિલપ્ય ચ ભૃશં પુનઃ
ચૂડામણિં દદૌ તસ્ય કરે જગ્રાહ સો ઽપિ તમ્ ॥

મા વિષાદં કૃથા દેવિ રાઘવો રાવણં રણે
હત્વા ત્વાં નેષ્યતીત્ય્ એનામ્ આશ્વાસ્ય સ વિનિર્યયૌ ॥

નીતિમાન્ સો ઽપિ સંચિન્ત્ય બભઞ્જોપવનં ચ તત્
અક્ષાદીનિ ચ રક્ષાંસિ બહૂનિ સમરે ઽવધીત્ ॥

તતઃ શક્રજિતા યુદ્ધે બદ્ધઃ પવનનન્દનઃ
પ્રતાપં રઘુનાથસ્ય રાવણાય ન્યવેદયત્ ॥