રામોદન્ત · શ્લોક 121*-140

રક્ષોદીપિતલાઙ્ગૂલઃ સ તુ લઙ્કામ્ અશેષતઃ
દગ્ધ્વા સાગરમ્ ઉત્તીર્ય વાનરાન્ સમુપાગમત્ ॥

સ ગત્વા વાનરૈઃ સાકં રાઘવાયાત્મના કૃતમ્
નિવેદયિત્વા સકલં દદૌ ચૂડામણિં ચ તમ્ ॥

અથાસંખ્યૈઃ કપિગણૈઃ સુગ્રીવપ્રમુખૈઃ સહ
નિર્યયૌ રાઘવસ્ તૂર્ણં તીરં પ્રાપ મહોદધેઃ ॥

તદા વિભીષણો ભ્રાત્રા ત્યક્તો રામમ્ ઉપાગમત્
લઙ્કાધિપત્યે ઽભ્યષિઞ્ચદ્ એનં રમો ઽરિમર્દનઃ ॥

દત્તમાર્ગઃ સમુદ્રેણ તત્ર સેતું નલેન સઃ
કારયિત્વા તેન ગત્વા સુવેલં પ્રાપ પર્વતમ્ ॥

તતો રાઘવનિર્દિષ્ટા નીલમુખ્યાઃ પ્લવઙ્ગમાઃ
રુરુધુઃ સર્વતો લઙ્કાં વૃક્ષપાષાણપાણયઃ ॥

રાવણસ્ય નિયોગેન નિર્ગતાન્ યુધિ રાક્ષસાન્
પ્રહસ્તપ્રમુખાન્ હત્વા નેદુસ્ તે સિંહવિક્રમાઃ ॥

સુગ્રીવશ્ ચ હનૂમાંશ્ ચ તથા રાઘવલક્ષ્મણૌ
રાક્ષસાન્ સુબહૂન્ યુદ્ધે જઘ્નુર્ ભીમપરાક્રમાઃ ॥

રાવણિસ્ તુ તદાભ્યેત્ય સમરે રામલક્ષ્મણૌ
નનાહ નાગપાશેન નાગારિસ્ તૌ વ્યમોચયત્ ॥

રાવણો ઽપિ તતો યુદ્ધે રાઘવેણ પરાજિતઃ
કુમ્ભકર્ણં પ્રબોધ્યાશુ રામં હન્તું ન્યયુઙ્ક્ત ચ ॥

રક્ષોભિઃ સહ નિર્યાય ભક્ષયન્તં પ્લવઙ્ગમાન્
સહાનુગં કુમ્ભકર્ણં જઘાનાશુ સ રાઘવઃ ॥

ઇન્દ્રજિત્ પુનર્ અપ્ય્ આજૌ સાનુજં ચ રઘૂત્તમમ્
અમોહયદ્ વાનરાંશ્ ચ બ્રહ્માસ્ત્રેણાસ્ત્રકોવિદઃ ॥

તદૈવ ગત્વા હનુમાન્ આનીયૌષધિપર્વતમ્
તાન્ સર્વાન્ બોધયિત્વાશુ તત્સ્થાને ઽસ્થાપયચ્ ચ તમ્ ॥

તતો નિકુમ્ભિલાં ગત્વા સૌમિત્રિઃ સવિભીષણઃ
નિષિદ્ધ્યેન્દ્રજિતો હોમં સંયુગે તં જઘાન ચ ॥

તચ્ છ્રુત્વા રાવણઃ ક્રુદ્ધો નિર્યાય શરવૃષ્ટિભિઃ
પ્લવઙ્ગમાન્ પીડયિત્વા રામેણ યુયુધે ભૃશં ॥

રામો ઽપિ સુચિરં તેન કૃત્વા યુદ્ધં સુદારુણં
બ્રહ્માસ્ત્રેણ જઘાનૈનં બ્રહ્મદત્તવરં રિપુમ્ ॥

તદા શક્રાદયો દેવા હૃષ્ટા રાવણનિગ્રહાત્
રઘૂત્તમસ્યોત્તમાઙ્ગે પુષ્પવૃષ્ટિમ્ અકુર્વત ॥

રાક્ષસાનામ્ અધિપતિં કૃત્વા રામો વિભીષણમ્
અગ્નિપ્રવેશસંશુદ્ધાં પરિજગ્રાહ મૈથિલીમ્ ॥

પુરન્દરવરેણાશુ જીવયિત્વા પ્લવઙ્ગમાન્
અતોષયદ્ રઘુશ્રેષ્ઠો વિવિધૈર્ ધનસંચયૈઃ ॥

તતઃ પુષ્પકમ્ આરુહ્ય સસીતઃ સહલક્ષ્મણઃ
નિર્યયૌ વાનરૈઃ સાકં રામો રક્ષોઽધિપેન ચ ॥