રામાયણ · અધ્યાય 5.021

ઇત્ય્ ઉક્ત્વા મૈથિલીં રાજા રાવણઃ શત્રુરાવણઃ
સંદિશ્ય ચ તતઃ સર્વા રાક્ષસીર્ નિર્જગામ હ

નિષ્ક્રાન્તે રાક્ષસેન્દ્રે તુ પુનર્ અન્તઃપુરં ગતે
રાક્ષસ્યો ભીમરૂપાસ્ તાઃ સીતાં સમભિદુદ્રુવુઃ

તતઃ સીતામ્ ઉપાગમ્ય રાક્ષસ્યઃ ક્રોધમૂર્છિતાઃ
પરં પરુષયા વાચા વૈદેહીમ્ ઇદમ્ અબ્રુવન્

પૌલસ્ત્યસ્ય વરિષ્ઠસ્ય રાવણસ્ય મહાત્મનઃ
દશગ્રીવસ્ય ભાર્યાત્વં સીતે ન બહુ મન્યસે

તતસ્ ત્વ્ એકજટા નામ રાક્ષસી વાક્યમ્ અબ્રવીત્
આમન્ત્ર્ય ક્રોધતામ્રાક્ષી સીતાં કરતલોદરીમ્

પ્રજાપતીનાં ષણ્ણાં તુ ચતુર્થો યઃ પ્રજાપતિઃ
માનસો બ્રહ્મણઃ પુત્રઃ પુલસ્ત્ય ઇતિ વિશ્રુતઃ

પુલસ્ત્યસ્ય તુ તેજસ્વી મહર્ષિર્ માનસઃ સુતઃ
નામ્ના સ વિશ્રવા નામ પ્રજાપતિસમપ્રભઃ

તસ્ય પુત્રો વિશાલાક્ષિ રાવણઃ શત્રુરાવણઃ
તસ્ય ત્વં રાક્ષસેન્દ્રસ્ય ભાર્યા ભવિતુમ્ અર્હસિ
મયોક્તં ચારુસર્વાઙ્ગિ વાક્યં કિં નાનુમન્યસે

તતો હરિજટા નામ રાક્ષસી વાક્યમ્ અબ્રવીત્
વિવૃત્ય નયને કોપાન્ માર્જારસદૃશેક્ષણા

યેન દેવાસ્ ત્રયસ્ત્રિંશદ્ દેવરાજશ્ ચ નિર્જિતઃ
તસ્ય ત્વં રાક્ષસેન્દ્રસ્ય ભાર્યા ભવિતુમ્ અર્હસિ

વીર્યોત્સિક્તસ્ય શૂરસ્ય સંગ્રામેષ્વ્ અનિવર્તિનઃ
બલિનો વીર્યયુક્તસ્યા ભાર્યાત્વં કિં ન લપ્સ્યસે

પ્રિયાં બહુમતાં ભાર્યાં ત્યક્ત્વા રાજા મહાબલઃ
સર્વાસાં ચ મહાભાગાં ત્વામ્ ઉપૈષ્યતિ રાવણઃ

સમૃદ્ધં સ્ત્રીસહસ્રેણ નાનારત્નોપશોભિતમ્
અન્તઃપુરં સમુત્સૃજ્ય ત્વામ્ ઉપૈષ્યતિ રાવણઃ

અસકૃદ્ દેવતા યુદ્ધે નાગગન્ધર્વદાનવાઃ
નિર્જિતાઃ સમરે યેન સ તે પાર્શ્વમ્ ઉપાગતઃ

તસ્ય સર્વસમૃદ્ધસ્યા રાવણસ્ય મહાત્મનઃ
કિમર્થં રાક્ષસેન્દ્રસ્ય ભાર્યાત્વં નેચ્છસે ઽધમે

યસ્ય સૂર્યો ન તપતિ ભીતો યસ્ય ચ મારુતઃ
ન વાતિ સ્માયતાપાઙ્ગે કિં ત્વં તસ્ય ન તિષ્ઠસિ

પુષ્પવૃષ્ટિં ચ તરવો મુમુચુર્ યસ્ય વૈ ભયાત્
શૈલાશ્ ચ સુભ્રુ પાનીયં જલદાશ્ ચ યદેચ્છતિ

તસ્ય નૈરૃતરાજસ્ય રાજરાજસ્ય ભામિનિ
કિં ત્વં ન કુરુષે બુદ્ધિં ભાર્યાર્થે રાવણસ્ય હિ

સાધુ તે તત્ત્વતો દેવિ કથિતં સાધુ ભામિનિ
ગૃહાણ સુસ્મિતે વાક્યમ્ અન્યથા ન ભવિષ્યસિ