રામાયણ · અધ્યાય 3.046

એવં બ્રુવત્યાં સીતાયાં સંરબ્ધઃ પરુષાક્ષરમ્
લલાટે ભ્રુકુટીં કૃત્વા રાવણઃ પ્રત્યુવાચ હ

ભ્રાતા વૈશ્રવણસ્યાહં સાપત્ન્યો વરવર્ણિનિ
રાવણો નામ ભદ્રં તે દશગ્રીવઃ પ્રતાપવાન્

યસ્ય દેવાઃ સગન્ધર્વાઃ પિશાચપતગોરગાઃ
વિદ્રવન્તિ ભયાદ્ ભીતા મૃત્યોર્ ઇવ સદા પ્રજાઃ

યેન વૈશ્રવણો ભ્રાતા વૈમાત્રઃ કારણાન્તરે
દ્વન્દ્વમ્ આસાદિતઃ ક્રોધાદ્ રણે વિક્રમ્ય નિર્જિતઃ

મદ્ભયાર્તઃ પરિત્યજ્ય સ્વમ્ અધિષ્ઠાનમ્ ઋદ્ધિમત્
કૈલાસં પર્વતશ્રેષ્ઠમ્ અધ્યાસ્તે નરવાહનઃ

યસ્ય તત્ પુષ્પકં નામ વિમાનં કામગં શુભમ્
વીર્યાદ્ આવર્જિતં ભદ્રે યેન યામિ વિહાયસં

મમ સંજાતરોષસ્ય મુખં દૃષ્ટ્વૈવ મૈથિલિ
વિદ્રવન્તિ પરિત્રસ્તાઃ સુરાઃ શક્રપુરોગમાઃ

યત્ર તિષ્ઠામ્ય્ અહં તત્ર મારુતો વાતિ શઙ્કિતઃ
તીવ્રાંશુઃ શિશિરાંશુશ્ ચ ભયાત્ સંપદ્યતે રવિઃ

નિષ્કમ્પપત્રાસ્ તરવો નદ્યશ્ ચ સ્તિમિતોદકાઃ
ભવન્તિ યત્ર યત્રાહં તિષ્ઠામિ ચ ચરામિ ચ

મમ પારે સમુદ્રસ્ય લઙ્કા નામ પુરી શુભા
સંપૂર્ણા રાક્ષસૈર્ ઘોરૈર્ યથેન્દ્રસ્યામરાવતી

પ્રાકારેણ પરિક્ષિપ્તા પાણ્ડુરેણ વિરાજિતા
હેમકક્ષ્યા પુરી રમ્યા વૈદૂર્યમય તોરણા

હસ્ત્યશ્વરથસંભાધા તૂર્યનાદવિનાદિતા
સર્વકામફલૈર્ વૃક્ષૈઃ સંકુલોદ્યાનશોભિતા

તત્ર ત્વં વસતી સીતે રાજપુત્રિ મયા સહ
ન સ્રમિષ્યસિ નારીણાં માનુષીણાં મનસ્વિનિ

ભુઞ્જાના માનુષાન્ ભોગાન્ દિવ્યાંશ્ ચ વરવર્ણિનિ
ન સ્મરિષ્યસિ રામસ્ય માનુષસ્ય ગતાયુષઃ

સ્થાપયિત્વા પ્રિયં પુત્રં રાજ્ઞા દશરથેન યઃ
મન્દવીર્યઃ સુતો જ્યેષ્ઠસ્ તતઃ પ્રસ્થાપિતો વનમ્

તેન કિં ભ્રષ્ટરાજ્યેન રામેણ ગતચેતસા
કરિષ્યસિ વિશાલાક્ષિ તાપસેન તપસ્વિના

સર્વરાક્ષસભર્તારં કામાત્ સ્વયમ્ ઇહાગતમ્
ન મન્મથશરાવિષ્ટં પ્રત્યાખ્યાતું ત્વમ્ અર્હસિ

પ્રત્યાખ્યાય હિ માં ભીરુ પરિતાપં ગમિષ્યસિ
ચરણેનાભિહત્યેવ પુરૂરવસમ્ ઉર્વશી

એવમ્ ઉક્તા તુ વૈદેહી ક્રુદ્ધા સંરક્તલોચના
અબ્રવીત્ પરુષં વાક્યં રહિતે રાક્ષસાધિપમ્

કથં વૈશ્રવણં દેવં સર્વભૂતનમસ્કૃતમ્
ભ્રાતરં વ્યપદિશ્ય ત્વમ્ અશુભં કર્તુમ્ ઇચ્છસિ

અવશ્યં વિનશિષ્યન્તિ સર્વે રાવણ રાક્ષસાઃ
યેષાં ત્વં કર્કશો રાજા દુર્બુદ્ધિર્ અજિતેન્દ્રિયઃ

અપહૃત્ય શચીં ભાર્યાં શક્યમ્ ઇન્દ્રસ્ય જીવિતુમ્
ન તુ રામસ્ય ભાર્યાં મામ્ અપનીયાસ્તિ જીવિતમ્

જીવેચ્ ચિરં વજ્રધરસ્ય હસ્તાચ્ છચીં પ્રધૃષ્યાપ્રતિરૂપરૂપામ્
ન માદૃશીં રાક્ષસધર્ષયિત્વા પીતામૃતસ્યાપિ તવાસ્તિ મોક્ષઃ