રામાયણ · અધ્યાય 2.077

તતઃ સમુત્થિતઃ કાલ્યમ્ આસ્થાય સ્યન્દનોત્તમમ્
પ્રયયૌ ભરતઃ શીઘ્રં રામદર્શનકાઙ્ક્ષયા

અગ્રતઃ પ્રયયુસ્ તસ્ય સર્વે મન્ત્રિપુરોધસઃ
અધિરુહ્ય હયૈર્ યુક્તાન્ રથાન્ સૂર્યરથોપમાન્

નવનાગસહસ્રાણિ કલ્પિતાનિ યથાવિધિ
અન્વયુર્ ભરતં યાન્તમ્ ઇક્ષ્વાકુ કુલનન્દનમ્

ષષ્ઠી રથસહસ્રાણિ ધન્વિનો વિવિધાયુધાઃ
અન્વયુર્ ભરતં યાન્તં રાજપુત્રં યશસ્વિનમ્

શતં સહસ્રાણ્ય્ અશ્વાનાં સમારૂઢાનિ રાઘવમ્
અન્વયુર્ ભરતં યાન્તં રાજપુત્રં યશસ્વિનમ્

કૈકેયી ચ સુમિત્રા ચ કૌસલ્યા ચ યશસ્વિની
રામાનયનસંહૃષ્ટા યયુર્ યાનેન ભાસ્વતા

પ્રયાતાશ્ ચાર્યસંઘાતા રામં દ્રષ્ટું સલક્ષ્મણમ્
તસ્યૈવ ચ કથાશ્ ચિત્રાઃ કુર્વાણા હૃષ્ટમાનસાઃ

મેઘશ્યામં મહાબાહું સ્થિરસત્ત્વં દૃઢવ્રતમ્
કદા દ્રક્ષ્યામહે રામં જગતઃ શોકનાશનમ્

દૃષ્ટ એવ હિ નઃ શોકમ્ અપનેષ્યતિ રાઘવઃ
તમઃ સર્વસ્ય લોકસ્ય સમુદ્યન્ન્ ઇવ ભાસ્કરઃ

ઇત્ય્ એવં કથયન્તસ્ તે સંપ્રહૃષ્ટાઃ કથાઃ શુભાઃ
પરિષ્વજાનાશ્ ચાન્યોન્યં યયુર્ નાગરિકાસ્ તદા

યે ચ તત્રાપરે સર્વે સંમતા યે ચ નૈગમાઃ
રામં પ્રતિ યયુર્ હૃષ્ટાઃ સર્વાઃ પ્રકૃતયસ્ તદા

મણિ કારાશ્ ચ યે કે ચિત્ કુમ્ભકારાશ્ ચ શોભનાઃ
સૂત્રકર્મકૃતશ્ ચૈવ યે ચ શસ્ત્રોપજીવિનઃ

માયૂરકાઃ ક્રાકચિકા રોચકા વેધકાસ્ તથા
દન્તકારાઃ સુધાકારાસ્ તથા ગન્ધોપજીવિનઃ

સુવર્ણકારાઃ પ્રખ્યાતાસ્ તથા કમ્બલધાવકાઃ
સ્નાપકાચ્છાદકા વૈદ્યા ધૂપકાઃ શૌણ્ડિકાસ્ તથા

રજકાસ્ તુન્નવાયાશ્ ચ ગ્રામઘોષમહત્તરાઃ
શૈલૂષાશ્ ચ સહ સ્ત્રીભિર્ યાન્તિ કૈવર્તકાસ્ તથા

સમાહિતા વેદવિદો બ્રાહ્મણા વૃત્તસંમતાઃ
ગોરથૈર્ ભરતં યાન્તમ્ અનુજગ્મુઃ સહસ્રશઃ

સુવેષાઃ શુદ્ધવસનાસ્ તામ્રમૃષ્ટાનુલેપનાઃ
સર્વે તે વિવિધૈર્ યાનૈઃ શનૈર્ ભરતમ્ અન્વયુઃ

પ્રહૃષ્ટમુદિતા સેના સાન્વયાત્ કૈકયીસુતમ્
વ્યવતિષ્ઠત સા સેના ભરતસ્યાનુયાયિની

નિરીક્ષ્યાનુગતાં સેનાં તાં ચ ગઙ્ગાં શિવોદકામ્
ભરતઃ સચિવાન્ સર્વાન્ અબ્રવીદ્ વાક્યકોવિદઃ

નિવેશયત મે સૈન્યમ્ અભિપ્રાયેણ સર્વશઃ
વિશ્રાન્તઃ પ્રતરિષ્યામઃ શ્વ ઇદાનીં મહાનદીમ્

દાતું ચ તાવદ્ ઇચ્છામિ સ્વર્ ગતસ્ય મહીપતેઃ
ઔર્ધ્વદેહ નિમિત્તાર્થમ્ અવતીર્યોદકં નદીમ્

તસ્યૈવં બ્રુવતો ઽમાત્યાસ્ તથેત્ય્ ઉક્ત્વા સમાહિતાઃ
ન્યવેશયંસ્ તાંશ્ છન્દેન સ્વેન સ્વેન પૃથક્પૃથક્

નિવેશ્ય ગઙ્ગામ્ અનુ તાં મહાનદીં ચમૂં વિધાનૈઃ પરિબર્હ શોભિનીમ્
ઉવાસ રામસ્ય તદા મહાત્મનો વિચિન્તયાનો ભરતો નિવર્તનમ્