રામાયણ · અધ્યાય 2.075

તતો નાન્દીમુખીં રાત્રિં ભરતં સૂતમાગધાઃ
તુષ્ટુવુર્ વાગ્વિશેષજ્ઞાઃ સ્તવૈર્ મઙ્ગલસંહિતૈઃ

સુવર્ણકોણાભિહતઃ પ્રાણદદ્ યામદુન્દુભિઃ
દધ્મુઃ શઙ્ખાંશ્ ચ શતશો વાદ્યાંશ્ ચોચ્ચાવચસ્વરાન્

સ તૂર્ય ઘોષઃ સુમહાન્ દિવમ્ આપૂરયન્ન્ ઇવ
ભરતં શોકસંતપ્તં ભૂયઃ શોકૈર્ અરન્ધ્રયત્

તતો પ્રબુદ્ધો ભરતસ્ તં ઘોષં સંનિવર્ત્ય ચ
નાહં રાજેતિ ચાપ્ય્ ઉક્ત્વા શત્રુઘ્નમ્ ઇદમ્ અબ્રવીત્

પશ્ય શત્રુઘ્ન કૈકેય્યા લોકસ્યાપકૃતં મહત્
વિસૃજ્ય મયિ દુઃખાનિ રાજા દશરથો ગતઃ

તસ્યૈષા ધર્મરાજસ્ય ધર્મમૂલા મહાત્મનઃ
પરિભ્રમતિ રાજશ્રીર્ નૌર્ ઇવાકર્ણિકા જલે

ઇત્ય્ એવં ભરતં પ્રેક્ષ્ય વિલપન્તં વિચેતનમ્
કૃપણં રુરુદુઃ સર્વાઃ સસ્વરં યોષિતસ્ તદા

તથા તસ્મિન્ વિલપતિ વસિષ્ઠો રાજધર્મવિત્
સભામ્ ઇક્ષ્વાકુનાથસ્ય પ્રવિવેશ મહાયશાઃ

શાત કુમ્ભમયીં રમ્યાં મણિરત્નસમાકુલામ્
સુધર્મામ્ ઇવ ધર્માત્મા સગણઃ પ્રત્યપદ્યત

સ કાઞ્ચનમયં પીઠં પરાર્ધ્યાસ્તરણાવૃતમ્
અધ્યાસ્ત સર્વવેદજ્ઞો દૂતાન્ અનુશશાસ ચ

બ્રાહ્મણાન્ ક્ષત્રિયાન્ યોધાન્ અમાત્યાન્ ગણબલ્લભાન્
ક્ષિપ્રમ્ આનયતાવ્યગ્રાઃ કૃત્યમ્ આત્યયિકં હિ નઃ

તતો હલહલાશબ્દો મહાન્ સમુદપદ્યત
રથૈર્ અશ્વૈર્ ગજૈશ્ ચાપિ જનાનામ્ ઉપગચ્છતામ્

તતો ભરતમ્ આયાન્તં શતક્રતુમ્ ઇવામરાઃ
પ્રત્યનન્દન્ પ્રકૃતયો યથા દશરથં તથા

હ્રદ ઇવ તિમિનાગસંવૃતઃ સ્તિમિતજલો મણિશઙ્ખશર્કરઃ
દશરથસુતશોભિતા સભા સદશરથેવ બભૌ યથા પુરા