રામાયણ (સંશોધિત પાઠ) · અધ્યાય 3.47

સીતાયા વચનં શ્રુત્વા દશગ્રીવઃ પ્રતાપવાન્
હસ્તે હસ્તં સમાહત્ય ચકાર સુમહદ્ વપુઃ ॥

સ મૈથિલીં પુનર્ વાક્યં બભાષે ચ તતો ભૃશમ્
નોન્મત્તયા શ્રુતૌ મન્યે મમ વીર્યપરાક્રમૌ ॥

ઉદ્વહેયં ભુજાભ્યાં તુ મેદિનીમ્ અમ્બરે સ્થિતઃ
આપિબેયં સમુદ્રં ચ મૃત્યું હન્યાં રણે સ્થિતઃ ॥

અર્કં રુન્ધ્યાં શરૈસ્ તીક્ષ્ણૈર્ વિભિન્દ્યાં હિ મહીતલમ્
કામરૂપિણમ્ ઉન્મત્તે પશ્ય માં કામદં પતિમ્ ॥

એવમ્ ઉક્તવતસ્ તસ્ય રાવણસ્ય શિખિપ્રભે
ક્રુદ્ધસ્ય હરિપર્યન્તે રક્તે નેત્રે બભૂવતુઃ ॥

સદ્યઃ સૌમ્યં પરિત્યજ્ય ભિક્ષુરૂપં સ રાવણઃ
સ્વં રૂપં કાલરૂપાભં ભેજે વૈશ્રવણાનુજઃ ॥

સંરક્તનયનઃ શ્રીમાંસ્ તપ્તકાઞ્ચનકુણ્ડલઃ
દશાસ્યઃ કાર્મુકી બાણી બભૂવ ક્ષણદાચરઃ ॥

સ પરિવ્રાજકચ્છદ્મ મહાકાયો વિહાય તત્
પ્રતિપેદે સ્વકં રૂપં રાવણો રાક્ષસાધિપઃ ॥

સંરક્તનયનઃ ક્રોધાજ્ જીમૂતનિચયપ્રભઃ
રક્તામ્બરધરસ્ તસ્થૌ સ્ત્રીરત્નં પ્રેક્ષ્ય મૈથિલીમ્ ॥

સ તામ્ અસિતકેશાન્તાં ભાસ્કરસ્ય પ્રભામ્ ઇવ
વસનાભરણોપેતાં મૈથિલીં રાવણો ઽબ્રવીત્ ॥

ત્રિષુ લોકેષુ વિખ્યાતં યદિ ભર્તારમ્ ઇચ્છસિ
મામ્ આશ્રય વરારોહે તવાહં સદૃશઃ પતિઃ ॥

માં ભજસ્વ ચિરાય ત્વમ્ અહં શ્લાઘ્યસ્ તવ પ્રિયઃ
નૈવ ચાહં ક્વચિદ્ ભદ્રે કરિષ્યે તવ વિપ્રિયમ્
ત્યજ્યતાં માનુષો ભાવો મયિ ભાવઃ પ્રણીયતામ્ ॥

રાજ્યાચ્ ચ્યુતમ્ અસિદ્ધાર્થં રામં પરિમિતાયુષમ્
કૈર્ ગુણૈર્ અનુરક્તાસિ મૂઢે પણ્ડિતમાનિનિ ॥

યઃ સ્ત્રિયા વચનાદ્ રાજ્યં વિહાય સસુહૃજ્જનમ્
અસ્મિન્ વ્યાલાનુચરિતે વને વસતિ દુર્મતિઃ ॥

ઇત્ય્ ઉક્ત્વા મૈથિલીં વાક્યં પ્રિયાર્હાં પ્રિયવાદિનીમ્
જગ્રાહ રાવણઃ સીતાં બુધઃ ખે રોહિણીમ્ ઇવ ॥

વામેન સીતાં પદ્માક્ષીં મૂર્ધજેષુ કરેણ સઃ
ઊર્વોસ્ તુ દક્ષિણેનૈવ પરિજગ્રાહ પાણિના ॥

તં દૃષ્ટ્વા ગિરિશૃઙ્ગાભં તીક્ષ્ણદંષ્ટ્રં મહાભુજમ્
પ્રાદ્રવન્ મૃત્યુસંકાશં ભયાર્તા વનદેવતાઃ ॥

સ ચ માયામયો દિવ્યઃ ખરયુક્તઃ ખરસ્વનઃ
પ્રત્યદૃશ્યત હેમાઙ્ગો રાવણસ્ય મહારથઃ ॥

તતસ્ તાં પરુષૈર્ વાક્યૈર્ અભિતર્જ્ય મહાસ્વનઃ
અઙ્કેનાદાય વૈદેહીં રથમ્ આરોપયત્ તદા ॥

સા ગૃહીતાતિચુક્રોશ રાવણેન યશસ્વિની
રામેતિ સીતા દુઃખાર્તા રામં દૂરગતં વને ॥

તામ્ અકામાં સ કામાર્તઃ પન્નગેન્દ્રવધૂમ્ ઇવ
વિવેષ્ટમાનામ્ આદાય ઉત્પપાતાથ રાવણઃ ॥

તતઃ સા રાક્ષસેન્દ્રેણ હ્રિયમાણા વિહાયસા
ભૃશં ચુક્રોશ મત્તેવ ભ્રાન્તચિત્તા યથાતુરા ॥

હા લક્ષ્મણ મહાબાહો ગુરુચિત્તપ્રસાદક
હ્રિયમાણાં ન જાનીષે રક્ષસા કામરૂપિણા ॥

જીવિતં સુખમ્ અર્થાંશ્ ચ ધર્મહેતોઃ પરિત્યજન્
હ્રિયમાણામ્ અધર્મેણ માં રાઘવ ન પશ્યસિ ॥

નનુ નામાવિનીતાનાં વિનેતાસિ પરંતપ
કથમ્ એવંવિધં પાપં ન ત્વં શાધિ હિ રાવણમ્ ॥

નનુ સદ્યો ઽવિનીતસ્ય દૃશ્યતે કર્મણઃ ફલમ્
કાલો ઽપ્ય્ અઙ્ગી ભવત્ય્ અત્ર સસ્યાનામ્ ઇવ પક્તયે ॥

સ કર્મ કૃતવાન્ એતત્ કાલોપહતચેતનઃ
જીવિતાન્તકરં ઘોરં રામાદ્ વ્યસનમ્ આપ્નુહિ ॥

હન્તેદાનીં સકામા તુ કૈકેયી બાન્ધવૈઃ સહ
હ્રિયેયં ધર્મકામસ્ય ધર્મપત્ની યશસ્વિનઃ ॥

આમન્ત્રયે જનસ્થાનં કર્ણિકારાંશ્ ચ પુષ્પિતાન્
ક્ષિપ્રં રામાય શંસધ્વં સીતાં હરતિ રાવણઃ ॥

માલ્યવન્તં શિખરિણં વન્દે પ્રસ્રવણં ગિરિમ્
ક્ષિપ્રં રામાય શંસધ્વં સીતાં હરતિ રાવણઃ ॥

હંસસારસસંઘુષ્ટાં વન્દે ગોદાવરીં નદીમ્
ક્ષિપ્રં રામાય શંસધ્વં સીતાં હરતિ રાવણઃ ॥

દૈવતાનિ ચ યાન્ત્ય્ અસ્મિન્ વને વિવિધપાદપે
નમસ્કરોમ્ય્ અહં તેભ્યો ભર્તુઃ શંસત માં હૃતામ્ ॥

યાનિ કાનિચિદ્ અપ્ય્ અત્ર સત્ત્વાનિ નિવસન્ત્ય્ ઉત
સર્વાણિ શરણં યામિ મૃગપક્ષિગણાન્ અપિ ॥

હ્રિયમાણાં પ્રિયાં ભર્તુઃ પ્રાણેભ્યો ઽપિ ગરીયસીમ્
વિવશાપહૃતા સીતા રાવણેનેતિ શંસત ॥

વિદિત્વા માં મહાબાહુર્ અમુત્રાપિ મહાબલઃ
આનેષ્યતિ પરાક્રમ્ય વૈવસ્વતહૃતામ્ અપિ ॥

રામાય તુ યથાતત્ત્વં જટાયો હરણં મમ
લક્ષ્મણાય ચ તત્ સર્વમ્ આખ્યાતવ્યમ્ અશેષતઃ ॥