રામાયણ (સંશોધિત પાઠ) · અધ્યાય 3.38
મારીચેન તુ તદ્ વાક્યં ક્ષમં યુક્તં ચ રાવણઃ
ઉક્તો ન પ્રતિજગ્રાહ મર્તુકામ ઇવૌષધમ્ ॥
તં પથ્યહિતવક્તારં મારીચં રાક્ષસાધિપઃ
અબ્રવીત્ પરુષં વાક્યમ્ અયુક્તં કાલચોદિતઃ ॥
યત્ કિલૈતદ્ અયુક્તાર્થં મારીચ મયિ કથ્યતે
વાક્યં નિષ્ફલમ્ અત્યર્થં બીજમ્ ઉપ્તમ્ ઇવોષરે ॥
ત્વદ્વાક્યૈર્ ન તુ માં શક્યં ભેત્તું રામસ્ય સંયુગે
પાપશીલસ્ય મૂર્ખસ્ય માનુષસ્ય વિશેષતઃ ॥
યસ્ ત્યક્ત્વા સુહૃદો રાજ્યં માતરં પિતરં તથા
સ્ત્રીવાક્યં પ્રાકૃતં શ્રુત્વા વનમ્ એકપદે ગતઃ ॥
અવશ્યં તુ મયા તસ્ય સંયુગે ખરઘાતિનઃ
પ્રાણૈઃ પ્રિયતરા સીતા હર્તવ્યા તવ સંનિધૌ ॥
એવં મે નિશ્ચિતા બુદ્ધિર્ હૃદિ મારીચ વર્તતે
ન વ્યાવર્તયિતું શક્યા સેન્દ્રૈર્ અપિ સુરાસુરૈઃ ॥
દોષં ગુણં વા સંપૃષ્ટસ્ ત્વમ્ એવં વક્તુમ્ અર્હસિ
અપાયં વાપ્ય્ ઉપાયં વા કાર્યસ્યાસ્ય વિનિશ્ચયે ॥
સંપૃષ્ટેન તુ વક્તવ્યં સચિવેન વિપશ્ચિતા
ઉદ્યતાઞ્જલિના રાજ્ઞો ય ઇચ્છેદ્ ભૂતિમ્ આત્મનઃ ॥
વાક્યમ્ અપ્રતિકૂલં તુ મૃદુપૂર્વં શુભં હિતમ્
ઉપચારેણ યુક્તં ચ વક્તવ્યો વસુધાધિપઃ ॥
સાવમર્દં તુ યદ્ વાક્યં મારીચ હિતમ્ ઉચ્યતે
નાભિનન્દતિ તદ્ રાજા માનાર્હો માનવર્જિતમ્ ॥
પઞ્ચરૂપાણિ રાજાનો ધારયન્ત્ય્ અમિતૌજસઃ
અગ્નેર્ ઇન્દ્રસ્ય સોમસ્ય યમસ્ય વરુણસ્ય ચ
ઔષ્ણ્યં તથા વિક્રમં ચ સૌમ્યં દણ્ડં પ્રસન્નતામ્ ॥
તસ્માત્ સર્વાસ્વ્ અવસ્થાસુ માન્યાઃ પૂજ્યાશ્ ચ પાર્થિવાઃ
ત્વં તુ ધર્મમ્ અવિજ્ઞાય કેવલં મોહમ્ આસ્થિતઃ ॥
અભ્યાગતં માં દૌરાત્મ્યાત્ પરુષં વદસીદૃશમ્
ગુણદોષૌ ન પૃચ્છામિ ક્ષમં ચાત્મનિ રાક્ષસ
અસ્મિંસ્ તુ સ ભવાન્ કૃત્યે સાહાય્યં કર્તુમ્ અર્હસિ ॥
સૌવર્ણસ્ ત્વં મૃગો ભૂત્વા ચિત્રો રજતબિન્દુભિઃ
પ્રલોભયિત્વા વૈદેહીં યથેષ્ટં ગન્તુમ્ અર્હસિ ॥
ત્વાં તુ માયામૃગં દૃષ્ટ્વા કાઞ્ચનં જાતવિસ્મયા
આનયૈનમ્ ઇતિ ક્ષિપ્રં રામં વક્ષ્યતિ મૈથિલી ॥
અપક્રાન્તે ચ કાકુત્સ્થે લક્ષ્મણે ચ યથાસુખમ્
આનયિષ્યામિ વૈદેહીં સહસ્રાક્ષઃ શચીમ્ ઇવ ॥
એવં કૃત્વા ત્વ્ ઇદં કાર્યં યથેષ્ટં ગચ્છ રાક્ષસ
રાજ્યસ્યાર્ધં પ્રદાસ્યામિ મારીચ તવ સુવ્રત ॥
ગચ્છ સૌમ્ય શિવં માર્ગં કાર્યસ્યાસ્ય વિવૃદ્ધયે
પ્રાપ્ય સીતામ્ અયુદ્ધેન વઞ્ચયિત્વા તુ રાઘવમ્
લઙ્કાં પ્રતિ ગમિષ્યામિ કૃતકાર્યઃ સહ ત્વયા ॥
એતત્ કાર્યમ્ અવશ્યં મે બલાદ્ અપિ કરિષ્યસિ
રાજ્ઞો હિ પ્રતિકૂલસ્થો ન જાતુ સુખમ્ એધતે ॥
આસાદ્ય તં જીવિતસંશયસ્ તે મૃત્યુર્ ધ્રુવો હ્ય્ અદ્ય મયા વિરુધ્ય
એતદ્ યથાવત્ પરિગૃહ્ય બુદ્ધ્યા યદ્ અત્ર પથ્યં કુરુ તત્ તથા ત્વમ્ ॥
મૂળ પાઠ: Rāmāyaṇa-rev-2-3 · Data entry Muneo Tokunaga · GRETIL (Göttingen) · CC BY-NC-SA 4.0