રામાયણ (સંશોધિત પાઠ) · અધ્યાય 3.36

કદાચિદ્ અપ્ય્ અહં વીર્યાત્ પર્યટન્ પૃથિવીમ્ ઇમામ્
બલં નાગસહસ્રસ્ય ધારયન્ પર્વતોપમઃ ॥

નીલજીમૂતસંકાશસ્ તપ્તકાઞ્ચનકુણ્ડલઃ
ભયં લોકસ્ય જનયન્ કિરીટી પરિઘાયુધઃ
વ્યચરં દણ્ડકારણ્યમ્ ઋષિમાંસાનિ ભક્ષયન્ ॥

વિશ્વામિત્રો ઽથ ધર્માત્મા મદ્વિત્રસ્તો મહામુનિઃ
સ્વયં ગત્વા દશરથં નરેન્દ્રમ્ ઇદમ્ અબ્રવીત્ ॥

અયં રક્ષતુ માં રામઃ પર્વકાલે સમાહિતઃ
મારીચાન્ મે ભયં ઘોરં સમુત્પન્નં નરેશ્વર ॥

ઇત્ય્ એવમ્ ઉક્તો ધર્માત્મા રાજા દશરથસ્ તદા
પ્રત્યુવાચ મહાભાગં વિશ્વામિત્રં મહામુનિમ્ ॥

ઊનષોડશવર્ષો ઽયમ્ અકૃતાસ્ત્રશ્ ચ રાઘવઃ
કામં તુ મમ યત્ સૈન્યં મયા સહ ગમિષ્યતિ
વધિષ્યામિ મુનિશ્રેષ્ઠ શત્રું તવ યથેપ્સિતમ્ ॥

ઇત્ય્ એવમ્ ઉક્તઃ સ મુની રાજાનં પુનર્ અબ્રવીત્
રામાન્ નાન્યદ્ બલં લોકે પર્યાપ્તં તસ્ય રક્ષસઃ ॥

બાલો ઽપ્ય્ એષ મહાતેજાઃ સમર્થસ્ તસ્ય નિગ્રહે
ગમિષ્યે રામમ્ આદાય સ્વસ્તિ તે ઽસ્તુ પરંતપ ॥

ઇત્ય્ એવમ્ ઉક્ત્વા સ મુનિસ્ તમ્ આદાય નૃપાત્મજમ્
જગામ પરમપ્રીતો વિશ્વામિત્રઃ સ્વમ્ આશ્રમમ્ ॥

તં તદા દણ્ડકારણ્યે યજ્ઞમ્ ઉદ્દિશ્ય દીક્ષિતમ્
બભૂવાવસ્થિતો રામશ્ ચિત્રં વિસ્ફારયન્ ધનુઃ ॥

અજાતવ્યઞ્જનઃ શ્રીમાન્ બાલઃ શ્યામઃ શુભેક્ષણઃ
એકવસ્ત્રધરો ધન્વી શિખી કનકમાલયા ॥

શોભયન્ દણ્ડકારણ્યં દીપ્તેન સ્વેન તેજસા
અદૃશ્યત તદા રામો બાલચન્દ્ર ઇવોદિતઃ ॥

તતો ઽહં મેઘસંકાશસ્ તપ્તકાઞ્ચનકુણ્ડલઃ
બલી દત્તવરો દર્પાદ્ આજગામ તદાશ્રમમ્ ॥

તેન દૃષ્ટઃ પ્રવિષ્ટો ઽહં સહસૈવોદ્યતાયુધઃ
માં તુ દૃષ્ટ્વા ધનુઃ સજ્યમ્ અસમ્ભ્રાન્તશ્ ચકાર હ ॥

અવજાનન્ન્ અહં મોહાદ્ બાલો ઽયમ્ ઇતિ રાઘવમ્
વિશ્વામિત્રસ્ય તાં વેદિમ્ અધ્યધાવં કૃતત્વરઃ ॥

તેન મુક્તસ્ તતો બાણઃ શિતઃ શત્રુનિબર્હણઃ
તેનાહં તાડિતઃ ક્ષિપ્તઃ સમુદ્રે શતયોજને ॥

રામસ્ય શરવેગેન નિરસ્તો ભ્રાન્તચેતનઃ
પાતિતો ઽહં તદા તેન ગમ્ભીરે સાગરામ્ભસિ
પ્રાપ્ય સંજ્ઞાં ચિરાત્ તાત લઙ્કાં પ્રતિ ગતઃ પુરીમ્ ॥

એવમ્ અસ્મિ તદા મુક્તઃ સહાયાસ્ તે નિપાતિતાઃ
અકૃતાસ્ત્રેણ રામેણ બાલેનાક્લિષ્ટકર્મણા ॥

તન્ મયા વાર્યમાણસ્ ત્વં યદિ રામેણ વિગ્રહમ્
કરિષ્યસ્ય્ આપદં ઘોરાં ક્ષિપ્રં પ્રાપ્ય નશિષ્યસિ ॥

ક્રીડારતિવિધિજ્ઞાનાં સમાજોત્સવશાલિનામ્
રક્ષસાં ચૈવ સંતાપમ્ અનર્થં ચાહરિષ્યસિ ॥

હર્મ્યપ્રાસાદસમ્બાધાં નાનારત્નવિભૂષિતામ્
દ્રક્ષ્યસિ ત્વં પુરીં લઙ્કાં વિનષ્ટાં મૈથિલીકૃતે ॥

અકુર્વન્તો ઽપિ પાપાનિ શુચયઃ પાપસંશ્રયાત્
પરપાપૈર્ વિનશ્યન્તિ મત્સ્યા નાગહ્રદે યથા ॥

દિવ્યચન્દનદિગ્ધાઙ્ગાન્ દિવ્યાભરણભૂષિતાન્
દ્રક્ષ્યસ્ય્ અભિહતાન્ ભૂમૌ તવ દોષાત્ તુ રાક્ષસાન્ ॥

હૃતદારાન્ સદારાંશ્ ચ દશ વિદ્રવતો દિશઃ
હતશેષાન્ અશરણાન્ દ્રક્ષ્યસિ ત્વં નિશાચરાન્ ॥

શરજાલપરિક્ષિપ્તામ્ અગ્નિજ્વાલાસમાવૃતામ્
પ્રદગ્ધભવનાં લઙ્કાં દ્રક્ષ્યસિ ત્વમ્ અસંશયમ્ ॥

પ્રમદાનાં સહસ્રાણિ તવ રાજન્ પરિગ્રહઃ
ભવ સ્વદારનિરતઃ સ્વકુલં રક્ષ રાક્ષસ ॥

માનં વૃદ્ધિં ચ રાજ્યં ચ જીવિતં ચેષ્ટમ્ આત્મનઃ
યદીચ્છસિ ચિરં ભોક્તું મા કૃથા રામવિપ્રિયમ્ ॥

નિવાર્યમાણઃ સુહૃદા મયા ભૃશં પ્રસહ્ય સીતાં યદિ ધર્ષયિષ્યસિ
ગમિષ્યસિ ક્ષીણબલઃ સબાન્ધવો યમક્ષયં રામશરાત્તજીવિતઃ ॥