રામાયણ (સંશોધિત પાઠ) · અધ્યાય 2.78
તતો નિવિષ્ટાં ધ્વજિનીં ગઙ્ગામ્ અન્વાશ્રિતાં નદીમ્
નિષાદરાજો દૃષ્ટ્વૈવ જ્ઞાતીન્ સંત્વરિતો ઽબ્રવીત્ ॥
મહતીયમ્ અતઃ સેના સાગરાભા પ્રદૃશ્યતે
નાસ્યાન્તમ્ અવગચ્છામિ મનસાપિ વિચિન્તયન્ ॥
સ એષ હિ મહાકાયઃ કોવિદારધ્વજો રથે
બન્ધયિષ્યતિ વા દાશાન્ અથ વાસ્માન્ વધિષ્યતિ ॥
અથ દાશરથિં રામં પિત્રા રાજ્યાદ્ વિવાસિતમ્
ભરતઃ કૈકેયીપુત્રો હન્તું સમધિગચ્છતિ ॥
ભર્તા ચૈવ સખા ચૈવ રામો દાશરથિર્ મમ
તસ્યાર્થકામાઃ સંનદ્ધા ગઙ્ગાનૂપે ઽત્ર તિષ્ઠત ॥
તિષ્ઠન્તુ સર્વદાશાશ્ ચ ગઙ્ગામ્ અન્વાશ્રિતા નદીમ્
બલયુક્તા નદીરક્ષા માંસમૂલફલાશનાઃ ॥
નાવાં શતાનાં પઞ્ચાનાં કૈવર્તાનાં શતં શતમ્
સંનદ્ધાનાં તથા યૂનાં તિષ્ઠન્ત્વ્ ઇત્ય્ અભ્યચોદયત્ ॥
યદા તુષ્ટસ્ તુ ભરતો રામસ્યેહ ભવિષ્યતિ
સેયં સ્વસ્તિમયી સેના ગઙ્ગામ્ અદ્ય તરિષ્યતિ ॥
ઇત્ય્ ઉક્ત્વોપાયનં ગૃહ્ય મત્સ્યમાંસમધૂનિ ચ
અભિચક્રામ ભરતં નિષાદાધિપતિર્ ગુહઃ ॥
તમ્ આયાન્તં તુ સમ્પ્રેક્ષ્ય સૂતપુત્રઃ પ્રતાપવાન્
ભરતાયાચચક્ષે ઽથ વિનયજ્ઞો વિનીતવત્ ॥
એષ જ્ઞાતિસહસ્રેણ સ્થપતિઃ પરિવારિતઃ
કુશલો દણ્ડકારણ્યે વૃદ્ધો ભ્રાતુશ્ ચ તે સખા ॥
તસ્માત્ પશ્યતુ કાકુત્સ્થ ત્વાં નિષાદાધિપો ગુહઃ
અસંશયં વિજાનીતે યત્ર તૌ રામલક્ષ્મણૌ ॥
એતત્ તુ વચનં શ્રુત્વા સુમન્ત્રાદ્ ભરતઃ શુભમ્
ઉવાચ વચનં શીઘ્રં ગુહઃ પશ્યતુ મામ્ ઇતિ ॥
લબ્ધ્વાભ્યનુજ્ઞાં સંહૃષ્ટો જ્ઞાતિભિઃ પરિવારિતઃ
આગમ્ય ભરતં પ્રહ્વો ગુહો વચનમ્ અબ્રવીત્ ॥
નિષ્કુટશ્ ચૈવ દેશો ઽયં વઞ્ચિતાશ્ ચાપિ તે વયમ્
નિવેદયામસ્ તે સર્વે સ્વકે દાશકુલે વસ ॥
અસ્તિ મૂલં ફલં ચૈવ નિષાદૈઃ સમુપાહૃતમ્
આર્દ્રં ચ માંસં શુષ્કં ચ વન્યં ચોચ્ચાવચં મહત્ ॥
આશંસે સ્વાશિતા સેના વત્સ્યતીમાં વિભાવરીમ્
અર્ચિતો વિવિધૈઃ કામૈઃ શ્વઃ સસૈન્યો ગમિષ્યસિ ॥
મૂળ પાઠ: Rāmāyaṇa-rev-2-3 · Data entry Muneo Tokunaga · GRETIL (Göttingen) · CC BY-NC-SA 4.0