રામાયણ (સંશોધિત પાઠ) · અધ્યાય 2.28

તતો ઽબ્રવીન્ મહાતેજા રામો લક્ષ્મણમ્ અગ્રતઃ
સ્થિતં પ્રાગ્ગામિનં વીરં યાચમાનં કૃતાઞ્જલિમ્ ॥

મયાદ્ય સહ સૌમિત્રે ત્વયિ ગચ્છતિ તદ્ વનમ્
કો ભરિષ્યતિ કૌસલ્યાં સુમિત્રાં વા યશસ્વિનીમ્ ॥

અભિવર્ષતિ કામૈર્ યઃ પર્જન્યઃ પૃથિવીમ્ ઇવ
સ કામપાશપર્યસ્તો મહાતેજા મહીપતિઃ ॥

સા હિ રાજ્યમ્ ઇદં પ્રાપ્ય નૃપસ્યાશ્વપતેઃ સુતા
દુઃખિતાનાં સપત્નીનાં ન કરિષ્યતિ શોભનમ્ ॥

એવમ્ ઉક્તસ્ તુ રામેણ લક્ષ્મણઃ શ્લક્ષ્ણયા ગિરા
પ્રત્યુવાચ તદા રામં વાક્યજ્ઞો વાક્યકોવિદમ્ ॥

તવૈવ તેજસા વીર ભરતઃ પૂજયિષ્યતિ
કૌસલ્યાં ચ સુમિત્રાં ચ પ્રયતો નાત્ર સંશયઃ ॥

કૌસલ્યા બિભૃયાદ્ આર્યા સહસ્રમ્ અપિ મદ્વિધાન્
યસ્યાઃ સહસ્રં ગ્રામાણાં સમ્પ્રાપ્તમ્ ઉપજીવનમ્ ॥

ધનુર્ આદાય સશરં ખનિત્રપિટકાધરઃ
અગ્રતસ્ તે ગમિષ્યામિ પન્થાનમ્ અનુદર્શયન્ ॥

આહરિષ્યામિ તે નિત્યં મૂલાનિ ચ ફલાનિ ચ
વન્યાનિ યાનિ ચાન્યાનિ સ્વાહારાણિ તપસ્વિનામ્ ॥

ભવાંસ્ તુ સહ વૈદેહ્યા ગિરિસાનુષુ રંસ્યતે
અહં સર્વં કરિષ્યામિ જાગ્રતઃ સ્વપતશ્ ચ તે ॥

રામસ્ ત્વ્ અનેન વાક્યેન સુપ્રીતઃ પ્રત્યુવાચ તમ્
વ્રજાપૃચ્છસ્વ સૌમિત્રે સર્વમ્ એવ સુહૃજ્જનમ્ ॥

યે ચ રાજ્ઞો દદૌ દિવ્યે મહાત્મા વરુણઃ સ્વયમ્
જનકસ્ય મહાયજ્ઞે ધનુષી રૌદ્રદર્શને ॥

અભેદ્યકવચે દિવ્યે તૂણી ચાક્ષયસાયકૌ
આદિત્યવિમલૌ ચોભૌ ખડ્ગૌ હેમપરિષ્કૃતૌ ॥

સત્કૃત્ય નિહિતં સર્વમ્ એતદ્ આચાર્યસદ્મનિ
સ ત્વમ્ આયુધમ્ આદાય ક્ષિપ્રમ્ આવ્રજ લક્ષ્મણ ॥

સ સુહૃજ્જનમ્ આમન્ત્ર્ય વનવાસાય નિશ્ચિતઃ
ઇક્ષ્વાકુગુરુમ્ આમન્ત્ર્ય જગ્રાહાયુધમ્ ઉત્તમમ્ ॥

તદ્ દિવ્યં રાજશાર્દૂલઃ સત્કૃતં માલ્યભૂષિતમ્
રામાય દર્શયામાસ સૌમિત્રિઃ સર્વમ્ આયુધમ્ ॥

તમ્ ઉવાચાત્મવાન્ રામઃ પ્રીત્યા લક્ષ્મણમ્ આગતમ્
કાલે ત્વમ્ આગતઃ સૌમ્ય કાઙ્ક્ષિતે મમ લક્ષ્મણ ॥

અહં પ્રદાતુમ્ ઇચ્છામિ યદ્ ઇદં મામકં ધનમ્
બ્રાહ્મણેભ્યસ્ તપસ્વિભ્યસ્ ત્વયા સહ પરંતપ ॥

વસન્તીહ દૃઢં ભક્ત્યા ગુરુષુ દ્વિજસત્તમાઃ
તેષામ્ અપિ ચ મે ભૂયઃ સર્વેષાં ચોપજીવિનામ્ ॥

વસિષ્ઠપુત્રં તુ સુયજ્ઞમ્ આર્યં ત્વમ્ આનયાશુ પ્રવરં દ્વિજાનામ્
અભિપ્રયાસ્યામિ વનં સમસ્તાન્ અભ્યર્ચ્ય શિષ્ટાન્ અપરાન્ દ્વિજાતીન્ ॥