રામાયણ (સંશોધિત પાઠ) · અધ્યાય 2.22

સાપનીય તમ્ આયાસમ્ ઉપસ્પૃશ્ય જલં શુચિ
ચકાર માતા રામસ્ય મઙ્ગલાનિ મનસ્વિની ॥

સ્વસ્તિ સાધ્યાશ્ ચ વિશ્વે ચ મરુતશ્ ચ મહર્ષયઃ
સ્વસ્તિ ધાતા વિધાતા ચ સ્વસ્તિ પૂષા ભગો ઽર્યમા ॥

ઋતવશ્ ચૈવ પક્ષાશ્ ચ માસાઃ સંવત્સરાઃ ક્ષપાઃ
દિનાનિ ચ મુહૂર્તાશ્ ચ સ્વસ્તિ કુર્વન્તુ તે સદા ॥

સ્મૃતિર્ ધૃતિશ્ ચ ધર્મશ્ ચ પાન્તુ ત્વાં પુત્ર સર્વતઃ
સ્કન્દશ્ ચ ભગવાન્ દેવઃ સોમશ્ ચ સબૃહસ્પતિઃ ॥

સપ્તર્ષયો નારદશ્ ચ તે ત્વાં રક્ષન્તુ સર્વતઃ
નક્ષત્રાણિ ચ સર્વાણિ ગ્રહાશ્ ચ સહદેવતાઃ
મહાવનાનિ ચરતો મુનિવેષસ્ય ધીમતઃ ॥

પ્લવગા વૃશ્ચિકા દંશા મશકાશ્ ચૈવ કાનને
સરીસૃપાશ્ ચ કીટાશ્ ચ મા ભૂવન્ ગહને તવ ॥

મહાદ્વિપાશ્ ચ સિંહાશ્ ચ વ્યાઘ્રા ઋક્ષાશ્ ચ દંષ્ટ્રિણઃ
મહિષાઃ શૃઙ્ગિણો રૌદ્રા ન તે દ્રુહ્યન્તુ પુત્રક ॥

નૃમાંસભોજના રૌદ્રા યે ચાન્યે સત્ત્વજાતયઃ
મા ચ ત્વાં હિંસિષુઃ પુત્ર મયા સમ્પૂજિતાસ્ ત્વ્ ઇહ ॥

આગમાસ્ તે શિવાઃ સન્તુ સિધ્યન્તુ ચ પરાક્રમાઃ
સર્વસમ્પત્તયો રામ સ્વસ્તિમાન્ ગચ્છ પુત્રક ॥

સ્વસ્તિ તે ઽસ્ત્વ્ આન્તરિક્ષેભ્યઃ પાર્થિવેભ્યઃ પુનઃ પુનઃ
સર્વેભ્યશ્ ચૈવ દેવેભ્યો યે ચ તે પરિપન્થિનઃ ॥

સર્વલોકપ્રભુર્ બ્રહ્મા ભૂતભર્તા તથર્ષયઃ
યે ચ શેષાઃ સુરાસ્ તે ત્વાં રક્ષન્તુ વનવાસિનમ્ ॥

ઇતિ માલ્યૈઃ સુરગણાન્ ગન્ધૈશ્ ચાપિ યશસ્વિની
સ્તુતિભિશ્ ચાનુરૂપાભિર્ આનર્ચાયતલોચના ॥

યન્ મઙ્ગલં સહસ્રાક્ષે સર્વદેવનમસ્કૃતે
વૃત્રનાશે સમભવત્ તત્ તે ભવતુ મઙ્ગલમ્ ॥

યન્ મઙ્ગલં સુપર્ણસ્ય વિનતાકલ્પયત્ પુરા
અમૃતં પ્રાર્થયાનસ્ય તત્ તે ભવતુ મઙ્ગલમ્ ॥

ઓષધીં ચાપિ સિદ્ધાર્થાં વિશલ્યકરણીં શુભામ્
ચકાર રક્ષાં કૌસલ્યા મન્ત્રૈર્ અભિજજાપ ચ ॥

આનમ્ય મૂર્ધ્નિ ચાઘ્રાય પરિષ્વજ્ય યશસ્વિની
અવદત્ પુત્ર સિદ્ધાર્થો ગચ્છ રામ યથાસુખમ્ ॥

અરોગં સર્વસિદ્ધાર્થમ્ અયોધ્યાં પુનર્ આગતમ્
પશ્યામિ ત્વાં સુખં વત્સ સુસ્થિતં રાજવેશ્મનિ ॥

મયાર્ચિતા દેવગણાઃ શિવાદયો મહર્ષયો ભૂતમહાસુરોરગાઃ
અભિપ્રયાતસ્ય વનં ચિરાય તે હિતાનિ કાઙ્ક્ષન્તુ દિશશ્ ચ રાઘવ ॥

ઇતીવ ચાશ્રુપ્રતિપૂર્ણલોચના સમાપ્ય ચ સ્વસ્ત્યયનં યથાવિધિ
પ્રદક્ષિણં ચૈવ ચકાર રાઘવં પુનઃ પુનશ્ ચાપિ નિપીડ્ય સસ્વજે ॥

તથા તુ દેવ્યા સ કૃતપ્રદક્ષિણો નિપીડ્ય માતુશ્ ચરણૌ પુનઃ પુનઃ
જગામ સીતાનિલયં મહાયશાઃ સ રાઘવઃ પ્રજ્વલિતઃ સ્વયા શ્રિયા ॥