Prasannapada · અધ્યાય 37

ઇત્યાચાર્યચન્દ્રકીર્તિપાદોપરચિતાયાં પ્રસન્નપદાયાં મધ્યમકવૃત્તૌ સંસ્કારપરીક્ષા નામ ત્રયોદશમં પ્રકરણમ્ ॥
14
સંસર્ગપરીક્ષા ચતુર્દશમં પ્રકરણમ્ ।
અત્રાહ- અસ્ત્યેવ ભાવસ્વભાવઃ, તત્સંસર્ગોપદેશાત્ । ઇહ યન્નાસ્તિ, ન તસ્ય સંસર્ગઃ, તદ્યથા વન્ધ્યાસુતદુહિત્રોઃ । અસ્તિ ચ સંસ્કારાણાં સંસર્ગોપદેશઃ । ચક્ષુઃ પ્રતીત્ય રૂપાણિ ચોત્પદ્યતે ચક્ષુર્વિજ્ઞાનમ્, ત્રયાણાં સંનિપાતઃ સ્પર્શઃ, સ્પર્શસહજા વેદનેતિ વિસ્તરઃ । તથા સંજ્ઞા ચ વેદના ચ સંસૃષ્ટાવેતૌ ધર્મૌ નાસંસૃષ્ટાવિતિ સંસ્કારાણાં સંસર્ગોપદેશઃ । તદેવં સંસર્ગોપદેશાદ્વિદ્યત એવ ભાવસ્વભાવ ઇતિ । ઉચ્યતે । સ્યાદેતદેવમ્, યદિ સંસર્ગ એવ ભવતો ભવેત્, ન ત્વસ્તિ, યસ્માત્-
દ્રષ્ટવ્યં દર્શનં દ્રષ્ટા ત્રીણ્યેતાનિ દ્વિશો દ્વિશઃ ।
સર્વશશ્ચ ન સંસર્ગમન્યોન્યેન બ્રજન્ત્યુત