પૈપ્પલાદ-સંહિતા · અધ્યાય 9.18

ઇષુર્ ઇવ દિગ્ધા નૃપતે
પૃદાકૂર્ ઇવ ગોપતે ।
સા બ્રાહ્મણસ્યેષુર્ દિગ્ધા
તયા વિધ્યતિ પીયકઃ ॥

તીક્ષ્ણેષવો બ્રાહ્મણા હેતિમન્તો
યામ્ અસ્યન્તિ શરવ્યાં ન સા મૃષા ।
અનુહાય તપસા મન્યુના ચોત
દૂરાદ્ અવ ભિન્દન્તિ તે તયા ॥

જિહ્વા જ્યા ભવતિ કુલ્મલં વાઙ્
નાડીકા દન્તાસ્ તપસા સુદિગ્ધાઃ ।
તેભિર્ બ્રહ્મા વિધ્યતિ દેવપીયૂન્
હૃદ્બલૈર્ ધનુર્ભિર્ દેવજૂતૈઃ ॥

યે બ્રાહ્મણં હિંસિતારસ્ તપસ્વિનં
મનીષિણં બ્રહ્મચર્યેણ શ્રાન્તમ્ ।
અવર્તિમદ્ ભવિતા રાષ્ટ્રમ્ એષાં
તમસીવ નિહિતં નાનુ વેત્તાઃ ॥

યે સહસ્રમ્ અરાજન્ન્
આસન્ દશશતા ઉત ।
તે બ્રાહ્મણસ્ય ગાં જગ્ધ્વા
વૈતહવ્યાઃ પરાભવન્ ॥

ગૌર્ એવ તાન્ હન્યમાના
વૈતહવ્યાઁ અવાતિરત્ ।
યે કેશર પ્રાબન્ધાયાશ્
ચરમાજામ્ અપેચિરન્ ॥

અતિમાત્રા અજાયન્ત
નોદ્ ઇવ દિવમ્ અસ્પૃશન્ ।
ભૃગું હિંસિત્વા માહીના
અસંભવ્યં પરાભવન્ ॥

યે બૃહત્સામાનમ્ આઙ્ગિરસમ્
આર્પયન્ બ્રાહ્મણં જનાઃ ।
યેત્વસ્ તેષામ્ ઉભયાદન્ન્
અવિસ્ તોકાન્ય્ આવયત્ ॥

યે બ્રાહ્મણં પ્રત્યષ્ઠીવન્
યે ચાસ્મિચ્ છુક્લમ્ ઈષિરે ।
અસ્નસ્ તે મધ્યે કુલ્યાયાઃ
કેશાન્ ખાદન્ત આસતે ॥

અષ્ટાપદી ચતુરક્ષી
ચતુઃશ્રોત્રા ચતુર્હનુઃ ।
દ્વિજિહ્વા દ્વિપ્રાણા ભૂત્વા
સા રાષ્ટ્રમ્ અવ ધૂનુતે ॥