પૈપ્પલાદ-સંહિતા · અધ્યાય 9.17

નૈતાં તે દેવા અદદુસ્
તુભ્યં નૃપતે અત્તવે ।
મા બ્રાહ્મણસ્ય રાજન્ય
ગાં જિઘત્સો અનાદ્યામ્ ॥

અક્ષદ્રુગ્ધો રાજન્યઃ
પાપ આત્મપરાજિતઃ ।
સ બ્રાહ્મણસ્ય ગામ્ અદ્યાદ્
અદ્ય જીવાનિ મા શ્વઃ ॥

નિર્ વૈ ક્ષત્રં નયતિ હન્તિ વર્ચો
ઽગ્નિર્ ઇવારબ્ધઃ પ્ર દુનોતિ રાષ્ટ્રમ્ ।
યો બ્રાહ્મણં દેવબન્ધું હિનસ્તિ
ન સ પિતૄણામ્ અપ્ય્ એતિ લોકમ્ ॥

દેવપીયુશ્ ચરતિ મર્ત્યેષુ
ગરગીર્ણો ભવત્ય્ અસ્થિભૂયાન્ ।
યો બ્રાહ્મણં મન્યતે અન્નમ્ એવ
સ વિષસ્ય પિબતિ તૈમાતસ્ય ॥

વિષં સ પિબતિ તૈમાતં
પશ્યન્ન્ અગ્નિં પ્ર સીદતિ ।
યો બ્રાહ્મણસ્ય સદ્ ધનમ્
અભિ નારદ મન્યતે ॥

શતાપાષ્ઠાં નિ ગિરતિ
તાં ન શક્નોતિ નિષ્ખિદમ્ ।
અન્નં યો બ્રહ્મણાં મલ્વઃ
સ્વાદ્વ્ અદ્મીતિ મન્યતે ॥

ય એનાં હન્તિ મૃદુ મન્યમાનો
દેવપીયુર્ ધનકામો ન ચિત્તાત્ ।
સં તસ્યેન્દ્રો હૃદયે અગ્નિમ્ ઇન્ધ
ઉભે એનં દ્યુષ્ટો નભસી ચરન્તમ્ ॥

ન બ્રાહ્મણો હિંસિતવા
અગ્નેઃ પ્રિયતમા તનૂઃ ।
સોમો હ્ય્ અસ્ય દાયાદ
ઇન્દ્રો અસ્યાભિશસ્તિપાઃ ॥

અગ્નિર્ વૈ નઃ પદવાયઃ
સોમો દાયાદ ઉચ્યતે ।
જેતા અભિશસ્તેન્દ્રસ્
તત્ સત્યં દેવસંહિતમ્ ॥

આવિષ્ટિતાઘવિષા
પૃદાકૂર્ ઇવ ચર્મણા ।
સા બ્રાહ્મણસ્ય રાજન્ય
તૃષ્ટૈષા ગૌર્ અનાદ્યા ॥